هندوستان ییتکرمهلری، کابل و ینگی دهلی اورتهسیده مناسبتلرنینگ ینگی فصلی آچیلگنیدن خبر بیرهدیلر. ینگیلیکده، «هندو» کوندهلیگی، اسلام امیرلیگی تشقی ایشلر وزیرلیگینینگ ییریک عملدارلریدن بولمیش نوراحمد نور، هندوستانده افغانستان ایلچیخانهسی سرپرستلیگینی آلیش اوچون ینگی دهلی گه بارگنینی بیلدیرگن.
اوشبو ییتکرمه، هندوستان رسمی منبعلریگه اساسلنیب ایتیشیچه، نور جنابلری ایلچیخانه سرپرستلیگینی قولگه آلیش اوچون رسمی مکتوبینی هنوزگچه هندوستان دولتی گه تاپشیرمهگن.
اسلام امیرلیگی بو مسئلهنی رسمی طرزده تصدیقلمهگن بولسه-ده؛ بیراق تشقی ایشلر وزیرلیگیدن منبع سلاموطندار بیلن صحبتده، نوراحمد نور افغانستان ایلچیخانهسی سرپرستلیگینی آلیش اوچون ینگی دهلی گه بارگنینی تصدیقلهگن.
«هندو» کوندهلیگی گزارشی بیر بولیمیده، نور جنابلری تامانیدن سرپرستلیک مسئولیتی رسمی شکلده آلینیشی بیلن، بیر مدت گچه، افغانستان سابق بیراغی و ایلچیخانه خادملری اوز جاییده قالیشی قید ایتیلگن. «اسلام امیرلیگی کابل حاکمیتینی آلگنیدن قریب بیش ییل اوتماقده، اسلام امیرلیگی تامانیدن افغانستان ایلچیخانهسی مسئولیتینی آلیش اوچون بیرینچی دیپلمات ینگی دهلی گه ییتیب کیلدی، نوراحمد نور هنوزگچه ایلچیخانه سرپرستلیگینی آلیش رسمی مکتوبینی تاپشیرمهگن.»
هندوستان ییتکرمهلریگه کوره، اسلام امیرلیگی تشقی ایشلر وزیری امیرخان متقی میلادی ۲۰۲۵ ییل اکتوبر آیی ده هنوستان گه قیلگن سفری دایرهسیده بو قرار قبول قیلینگن.
سیاسی بیلرمانلر، بو ایشنی هندوستان و افغانستان اورتهسیده دیپلماتیک همکارلیک اوچون ینگی حرکت دیب، بو ایش ایکی تامان مناسبتلری مستحکملنیشی گه سبب بولیشینی ایتگنلر.
سیاسی بیلرمان اکرم عارفی شوندهی دییدی: «ایکی مملکت سیاسی، اقتصادی و سودا مناسبتلرینی مستحکملشگه قرار قیلگن. هندوستان گه سفرلر ایکی مملکت اورتهسیده مناسبت مستحکملنیشی و شرطنامهلر امضالنیشی گه سبب بولگن. ایندی مناسبتلرنی کینگهیتیریش اوچون دیپلمات بارلیگی کیرهک.»
سونگی بیر ییل ایچیده، کابل و ینگی دهلی اورتهسیدهگی علاقهلر کینگهیب بارماقده و بو علاقهلر ینگی و کینگراق باسقیچ گه کیرگن.
اسلام امیرلیگی تشقی ایشلر وزیری امیرخان میلادی ۲۰۲۵ ییل اکتوبر آییده ینگی دهلی گه سفر قیلگنیدن سونگ، ایکی تامان اورتهسیده علاقهلر و همکارلیکلر سیزیلرلی درجهده آشدی.
هندوستان نیچه مراتبه افغانستان بیلن عملدهگی علاقهلری انسان سیورلیک یاردملر، اقتصادی ظرفیتلرنی آشیریش و افغانستان خلقینینگ حیات درجهسینی قوللب-قوتلش گه قرهتیلگن دیب اعلان قیلگن.
هندوستان حاضرده افغانستان گه دارو-درمان صادر قیلیش، افغانستان توارلری صادر قیلینیش یوللری اینیقسه چابهار بندری آرقهلی قولیلیک یرهتیشده مهم رول اوینهماقده.
