صناعت و کانلر هفتهلیگینینگ بیشینچی ملی و خلقارا کورگزمهسی قریب بیر میلیارد دالرلیک ۵۰ شرطنامه امضالنیشی بیلن، بوگون (۱۶-سرطان، سهشنبه)، یکونلنگن.
مذکور کورگزمهنینگ مطبوعات مسئولی منصور یوسفزیگه کوره، بو ییل پایتخت کابل شهری افغانستان ملی و خلقارا کورگزمهلر مرکزیده اوتکزیلگن ییتی کونلیک اوشبو کورگزمهده، ۳۲۸ شرکتنینگ ۳۶ بولیمدهٔگی محصوللری نمایش گه قوییلیب و یوزلب مینگ کیشی اولردن کوریب چیققن.
جناب یوسفزینینگ ایتیشیچه: «بو کورگزمهده ۳۲۸ شرکتنینگ قریب ۴۰۰ غرفهسی بار ایدی و قریب بیر میلیارد دالرلیک ۵۰ شرطنامه تورلی بولیملرده امضالندی. بو آرهده یالغیز شرطنامهدن ۱۰ تهسی ایشخانهلرنی جهازلش و خام مادهلرنی تامینلش توغریسیده افغانستان تیمیر ییریتیش بیرلشمهسی و ایران آرهسیده امضالندی.»
بو کورگزمهنینگ یکونلنیش مراسمیده اسلام امیرلیگی سودا و صناعت وزیری نورالدین عزیزینینگ ایتیشیچه، افغانستان ایچکی تولیدلری ستندردلنیش یولیگه قرار تاپگن. اونگه کوره، صناعت رواجلنیشی اوچون حاضرگچه افغانستان بویلب ۱۵۰ مینگ جریب ییر بو وزیرلیککه انتقال بیریلیب و بو توغریده اوتگن ییل ۲ مینگ ۸۰۰ جریب ییر ۵۷۶ شرکتگه ترقهتیلگن.
جناب عریزینینگ کوپهیتیریشیچه، شونینگدیک ایچکی تولیدلر سانی ۵۰۰ قلمدن ۲ مینگ قلمگه آشیب و افغانستان ۳۰۰ قلم توارنی ایشلب چیقریشده خودکفالیککه ییتیشگن. «الحمدالله فابریکهلریمیز فعال دیر و ینگی سکتورلرده تولیدنی باشلهگنلر. افغانستاننینگ اینگ کوپ وارداتی بولیمی بولگن باتری هم حاضر خودکفا بولگن. بیزلر وارداتنی آز قیلیب و سالیقنی اولرگه کمهیتیرهمیز دیب سوز بیردیم. شونینگدیک دارو و کسلخانهلر اوسکونهلری بولیمیده هم خودکفالیککه بارهمیز. اولردن حمایت قیلیشگه سعیوحرکت قیلهمیز.»
اسلام امیرلیگی سودا و صناعت وزیریگه کوره، اسلام امیرلیگینینگ قدرت گه ایریشگنیدن کیین ۵ مینگ ۹۰۰ شرکتگه فعالیت جوازی بیریلیب و شونینگدیک جواز بیریش جریانیهم سادهلشتیریلگن. او، سرمایه یاتقیزیش اوچون ینگی بیر مینگ بولیم تانیلگنیدن خبر بیریب و ایتیشیچه، هر بیر کیشی بو بولیملرده سرمایه یاتقیزگنی صورتده، بیش ییلگچه سالیق تولشدن معاف بولیشی ممکن.
شونینگدیک اوشبو ییغیلیشده صناعت و کانلر اتاقینینگ کاتبیت باشلیغی عبدالمتین قلندری، ایش جوازینینگ یالغیز سرمایه یاتقیزیشگه قیزیققن کیشیلرگه بیریلیشینی ایستهگن. شونینگدیک او صادرات و واردات آرهسیده برابرلیک یرهتیلیشی ضرورلیگیگه تاکیدلب و ایتیشیچه: «سودا و صناعت وزیرلیگی آرقهلی سرمایه یاتقیزیشگه قیزیققن کیشیلرگه جواز و ییر بیریلیشینی ایستهیمن. حکومت بو موضوعگه اعتبار قرهتسین. شونینگدیک واردات گه نسبت ایچکی تولیدلرگه بیر آسایشتهلیک یرهتسین.»
اقتصادی ایش بیلرمانلر، بو کبی کورگزمهلر اوتکزیلیشینی ایچکی تولیدلر کوچلنیشی اوچون فایدهلی بیلیب و ایتیشلریچه، اوشبو جریاننینگ کوچهیشی و افغانستاننینگ تورلی زونلریده بو کبی کورگزمهلر اوتکزیلیشی کیرهک.
بو توغریده اقتصادی ایش بیلرمانلردن عبدالنصیر رشتیانینگ ایتیشیچه: «بو کبی کورگزمهلر اوتکزیشی کسبوکارلر توغریسیده جودهیم ایجابی تاثیرلری بار، چونکه کورگزمهگه برچه شرکتلر و تولید قیلووچیلر محصول و تولیدلرینی نمایش گه قویه آلهدیلر و اهالی اولرنی باریب کوره آلهدی که بو اوزی ایشانچنی کوپهیتیرهدی.»
کانلر و صناعت خلقارا کوگزمهسی هر ییلی بیر هفتهلیک شکلده اوتکزیلیب، ایچکی شرکتلرگه علاوه، منطقه مملکتلردن قطارینینگ هیئتلری همده تولیدی شرکتلری هم شرکت قیلهدی.
