بدخشان یشاوچیلریدن قطاری بو ولایتده سیزیلرلی درجهده اورمانلر کیسیلیشیدن خواطر بیلدیریب و بو جریاننینگ یشش محیط اوچون جدی تهدید بیلهدیلر. اولرنینگ ایتیشلریچه، سونگی آیلر ناقانونی شکلده اورمانلرنینگ کیسیلیشی کوپهیب و بو وضعیت، یشش محیط و طبیعی منبعلر بوییچه کینگ کولملی عاقبتلرگه سبب بولیشی ممکن.
بدخشان یشاوچیلریدن صبور نورینینگ ایتیشیچه، سونگی آیلرده اورمانلر کیسیلیشی کوپهیب و بو جریان، مذکور ولایتنینگ تورلی بولیملریده سوو تاشقینلر یوز بیریشی، توپراق خراب بولیشی و ییرلر قوریشینینگ کینگهیشیگه سبب بولگن. اونینگ کوپهیتیریشیچه: «اورمانلرگه ایگه بولگن منطقهلر، یشیل کوریلهر ایدی و انه شوو اورمانلر سوو تاشقینلر یوز بیرمسلیگیگه سبب بولگن ایدی. قیغو بیلن حاضر بوزیلگن. چوللر و جودهیم چیرایلی بولگن چمنزارلر سوو تاشقینلر طفیلی بوزیلیب و فایدهلنمهیگن حالتگه اوزگرگن. بو وضعیت اهالیگه کوپینچه زیان ییتیشیشی و سوو تاشقینلر یوز بیریشیگه سبب بولهدی.»
بدخشان یشاوچیلریدن باشقه بیری جاوید امینینینگ ایتیشیچه، اهالیدن قطاری ناقانونی شکلده کانلرنی قازیب چیقریش و بو منبعلرگه قول تاپیش یولی یرهتیلیشی مقصد، اورمانلرنی بوزهدیلر. اونگه کوره، مذکور حرکتلر اورمان ساحهلرینینگ کینگ کولملی شکلده بوزیلیشی و اوزاق مدتده بو منطقهلرده تیریکچیلیک قیلهدیگن یشاوچیلر گه جدی قیینچیلیکلرنی یرهتیشی ممکن. «قیش موسومی ییتیب کیلگنی بیلن، اهالیدن کوپ قطاری اقتصادی نقطهی نظریدن یخشی بیر وضعیتده ایمس و منطقه یشیللیگیگه سبب بولهدیگن اورمانلرنی قیشدهگی نیازلرنی تامینلش اوچون کیسهدیلر. شونینگدیک بیر قطار کیشی اورمانلرنی کیسیب و اولرنینگ ساتیش اورنیده درآمد قولگه کیلتیرهدی.»
شونینگدیک بدخشان یشاوچیسی بولمیش عبدالرحماننینگ ایتیشیچه، سونگی پیتلرده اوشبو ولایتده سوو تاشقینلر طفیلی زیانلر کوپهیگن. او بو وضعیتنینگ اصلی سببلریدن بیرینی اورمانلر کیسیلیشی دیب و اورغولشیچه، اورمانلر بوزیلیشی، بو ولایتده مثلی کوریلمهگن مالی و جانی زیانلرگه سبب بولگن. «اوتمیشده دم آلیش اوچون باریلهدیگن جایلر حاضر یوق. چونکه کانلر قازیب چیقریلیشی اوچون بوزیلیب و چول کبی بولیب قالگن. اصلا توشینیب بولمهیدی که بیر زمانلر بو ییرده دم آلیش محل بولگن بولسه.»
طبیعی منبعلر بوییچه ایش بیلرمان عزیز محمدینینگ سلاموطندار گه ایتیشیچه، اورمانلر کیسیلیشی یشش محیطگه جدی عاقبتلر آلیب کیلهدی. اونگه کوره، اورمانلر بوزیلیشی ییرنینگ ایسیشی، سوو تاشقینلر یوز بیریشی کوپهیشی، توپراقلر بوزیلیشی، زلزله خوفلری آشیشی، اکسیجن تولید بولیشی کمهیشی و طبیعتنینگ بوزیلیشیگه سبب بولهدی. «اورمانلر کیسیلیشی هوانینگ تازهلنه آلمسلیگیگه سبب بولهدی و بو وضعیت سرطان و یورهک و باشقه بیر قطار کسللیکلرگه سبب بولهدی. اوتمیشده یشیل بیر ولایت صفتیده تانیلهر ایدی و حاضر ایسه، منطقهلریدن کوپ قطاری قوریب و اوتسیز بولیب قالگن.»
شوندهی بیرحالده، بدخشان ایکینچیلیک، سووغاریش و چاروهچیلیک ریاستی طبیعی منبعلر بوییچه آمری روحالله نورینینگ ایتیشیچه، قیش موسومی ییتیب کیلگنی بیلن یشاوچیلردن قطاری یاقیلغی ماده تامینلش اوچون درختلرنی کیسیشگه مجبور بولهدی. اونینگ کوپهیتیریشیچه، بو قیینچیلیک یانیده ستندردسیز شکلده کانلر قازیب چیقریلیشی، اورمانلرنینگ کینگ کولملی شکلده بوزیلیشیگه سبب بولگن.
نوری گه کوره: «گزارشلر اساسیده بهارک-فیضآباد یولیده جایلشگن ارغنجخواه تومنی همده شهر بزرگ، کران و منجان تومنلری، یوقاری درجهده اورمانلر کیسیلیشی بیلن روپهره دیر. بو توغریده ایکینچیلیک ریاستی مستقیم اجرا قیلیش امکانیتیگه ایگه ایمس؛ بیراق مکتوبلر و بیانیهلر آرقهلی اورمانلرنینگ کیسیلمسلیگی توغریسیده اهالینی آگاهلنتیرهدی.»
بو توغریده بدخشان امنیه قوماندانلیگی سوزلاوچیسی فکرینی آلیش اوچون کوپینچه سعیوحرکت قیلدیک؛ لیکن بو گزارشنینگ ترقهتیلیش جریانیگچه قونقیراق و پیاملریمیزگه جواب قیتیریلمهدی.
بدخشان، مملکتنینگ یشیل ولایتلریدن حسابلنهدی؛ بیراق سونگی ییللرده اورمانلر کیسیلیشی کوپهیگنی یشاوچیلر و ایش بیلرمانلر آرهسیده یشش محیط بوییچه خواطرلرگه سبب بولگن که مذکور خواطرلرگه توجه بولمهگنی صورتده، بدخشان یشاوچیلری حیاتی و طبیعتگه یامان عاقبتلرگه سبب بولیشی ممکن.
