اسلام امیرلیگی ایکینیچلیک، سوغاریش و چاروهچیلیک وزیرلیگی، اوشبو قویاش ییلده بغلان ولایتیده شالی ایکیلهدیگن ییرلر و حاصلی، اوتگن ییل گه قرهگنده کوپهیگنینی معلوم قیلگن.
اوشبو وزیرلیک، ۳۰-میزان، چهارشنبه کونی بیر بیانیه ترقهتیب بو حقده خبر بیرگن.
بیانیه گه کوره، اوشبو قویاش ییلده بغلان ولایتیده ۲۸ مینگ ۷۲۰ هکتار ییرده شالی ایکیلگن و بو ییرلردن ۱۲۰ مینگ ۶۲۴ متریک تُن گوریچ (برنج) حاصل آلینگن.
ایکینیچلیک، سوغاریش و چاروهچیلیک وزیرلیگینینگ بیانیهسی اساسیده، اوتگن ییلده ۲۷ مینگ ۵۹۲ هکتار ییرده شالی ایکیلیب و ۱۱۵ مینگ ۸۸۶ متریک تُن حاصل آلینگن اېدی، بو رقم اوتگن ییل گه قرهگنده شالی ایکینی و حاصلی کوپهیگنینی کورستهدی.
بغلان ولایتیدهگی محنتکارلر، اصلاح ایتیلگن اوروغ، کیمیاوی اوگیت (کود)لردن فایدهلنیش، زمانهوی دهقانچیلیک اصوللرینی ترغیب ایتیش و کسللیکلرنی نظارت قیلیش همده ایکین ییرلرینی کېنگهیتیریشلری سببلی، اوشبو ولایتده شالی حاصلی کوپهیگن.
بغلان ولایتیده شالی بوغدایدن سۉنگ ایکینچی زراعتی مهم محصول حسابلنهدی و کوپراق ولایت مرکزی، دند غوری، بغلان مرکزی، دوشی و خوست تومنلریده ایکیلهدی.
اوشبو ولایتده، «سرخه»، «باسمتی»، «مونده»، «شالونگی»، «ایرانی»، «سرده باره» و «گرمه باره» کبی تورلی خیل شالی ییتیشتیریلهدی و اولردن «سرده باره» توری اوزیگه خاص طعمی و مشهورلیگی سببلی علیحده اورینگه ایگه.
