طالبان گروهی ۸ کون آلدین هلمند ولایتی نینگ مرکزی لشکرگاه شهری اوستیگه هجوم قیلیب، قطار پوسته و منطقه‌لرنی تصروف قیلگنلر.
هلمند محلی مسوول‌لرنینگ ایتیش‌لریچه، بوگون ( شنبه ۲۶ – میزان ) اوتگن کونلرگه قره‌گنده آتیشمه کمه‌یگن و امنیتی کوچلر ناوه و نادعلی تومنلری و هلمند – کندهار قتناو یولی نینگ ایریم منطقه‌لرینی طالبان وجودیدن تازه‌لگن.
مذکور مسووللرگه کوره، امنیتی کوچلر ینگی‌لیکده بیش پوسته‌نی طالبان قولیدن آزاد قیلگن.
هلمند حاکمی محمد یاسین نینگ ایتیشیچه، طالبان نظارتیگه اوتگن منطقه‌لرنی آزاد قیلیش اوچون ییر و هوایی عملیات‌لرنی دوامی بار و حاضرگه‌قدر طالبان گروهی نینگ ۳۰۰ جنگره‌سی هلاک و بیر قطاری یره‌لنگن.
جناب یاسین نینگ کوپه‌یتیریشیچه، طالبان گروهی چکه‌سیده باشقه چیت‌ایللیک‌لر جنگریلر هم امنیتی کوچلر بیلن اوروشه‌دیلر.
هلمند حاکمی، هلمند – کندهار قتناو یولی‌نی طالبان گروهی نینگ نظارتیدن آزاد قیلیش اوچون حربی عملیات یولگه قویلیشی‌گه تیارگرلیکلر آلینگن و کیله‌جک کونلرده قتناو یول هم خلق یوزیگه آچیله‌دی.
محلی مقام‌لر، امنیتی کوچلرنینگ تلفاتی خصوصیده معلومات بیرمه‌گن، لیکن اوتگن کیچه امنیتی کوچلردن ۲ ته‌سی اولیب ۷ ته‌سی یره‌لنگنینی بیلدیرگنلر.
هلمند ولایتیده اوروشلر باشلنگنیدن حاضرگه‌قدر ۷ مینگ عایله اوی و جایلرینی تشلب و باشقه جایلرگه آواره بولگن و یمان وضعیتده حیات کیچیره‌دیلر.
هلمند ولایتی بوییچه مهاجرلر ریاستی باشلیغی محمد رامین نینگ ایتیشیچه، حاضرگه‌قدر ۲۵۶ عایله گه یاردم ایتیلگن.
شونینگدیک، طبیعی حادثه‌لرگه قرشی کوره‌ش اوچون دولت وزیری غلام بهاوالدین جیلانی هلمند ولایتیگه سفر قیلگن. اونینگ ایتیشیچه، اوروشلر سبب اوی – جایلرینی ترک قیلگن عایله‌لرگه ۲۰ میلیون افغانی یاردم قیلینیشی ممکن.