انسان حقلری تشکیلاتی «ههنگاو»، ایران اوتگن ۹ آی دوامیده ۶۵ افغانستانلیکنی دار گه آسگنینی بیلدیرگن.
اوشبو تشکیلاتنینگ گزارشی گه کوره، ایران اسلامی جمهوریتی میلادی ۲۰۲۵-ییل باشیدن حاضرگه قدر بیرمینگ ایکی کیشینی تورلی عیبلاولر بیلن دار گه آسگن.
گزارشده، اوشبو کیشیلر آرهسیدن ۴۰۴ نفری ایران و اسرائیل اورتهسیده اوروش باشلنگنیدن سۉنگ دار گه آسیلگن. ههنگاو معلوماتلری شونی کورستهدی که، بو ایکی مملکت اورتهسیده اوروش باشلنگنیدن بیری ایرانده دار گه آسیش رقمی ۴۰ فایز آشگن. مذکور تشکیلات گه کوره، سۉنگی ایکی دههده بو رقم مثلسیز بولیب و اوشبو مدت دوامیده هېچ قچان دار گه آسیش رقمی بیر مینگ کیشی گه یېتمهگن اېدی.
ترقهلگن معلوماتلر اساسیده، اوشبو میلادی ییلده دار گه آسیلگن بیر مینگ ایکی کیشیدن کمیده ۳۳ نفری سیاسی و اعتقادی محبوس، ۱۴۸ نفری کُرد، ۱۳۰ نفری لُر، ۱۱۴ نفری بلوچ، ۱۰۶ نفری تورک و ۶۵ نفری افغانستانلیک حسابلنهدی.
ههنگاونینگ کوپهیتیریشیچه، بو کیشیلر سیاسی، مذهبی و اعتقادی عیبلاو، بنگیوار ماده بیلن باغلیق جنایتلر، قصداً اولدیریش، زورلش و قوراللی اوغریلیک عیبلر بیلن دار گه آسیلگنلر. شو بیلن بیرگه، گزارشده افغانستان یشاوچیلرینینگ عیبلاولری گه عاید معلومات کیلتیریلمهگن.
ایران انسان حقلری تشکیلاتینینگ گزارشی گه کوره، میلادی ۲۰۲۴-ییلده، ایرانده ۸۰ افغانستانلیک محبوس دار گه آسیلگن اېدی.
