هوا اوزگریشلری و سوو منبعلری کمهیشی طفیلی کینگ کولملی قیینچیلیکلر بولگنی بیلن، غور ده دهقانلردن قطاری محصوللرینینگ سووغاریش اسلوبلرینی اوزگرتیریشگه مجبور بولگنلر. مذکور دهقانلرنینگ ایتیشلریچه، سولری پمپلر و قطرهای سووغاریش اسلوبلریدن فایدهلنیش بیلن کوپینچه سوو صرفلنیشی آلدی آلینیشی، ینگی شرایطگه ماسلشیش و ییرلریدن یخشیراق محصول قولگه کیلتیریش توغریسیده سعیوحرکت قیلهدیلر.
غور دهگی دهقانلردن بیری محمد ابراهیمنینگ ایتیشیچه: «بو سیستم بوغدای، کچالو و باشقه ایکینچیلیک محصوللر برگلرینینگ نملنیشیگه یاردم بیرهدی و اولرنینگ اوسیشیگه ایجابی تاثیر قویهدی. بو تور سووغاریش سبب اوسیملیک ریشهدن سوونی تارتیب و سوونینگ کوپراق صرفلنیشی آلدینی آلهدی.»
شونینگدیک غور دهگی دهقانلردن باشقه بیری نورآقانینگ ایتیشیچه: «قطرهای سووغاریش سیستمی دهقانلر اوچون جودهیم فایدهلی دیر؛ چونکه سوو آز صرفلهنیب، تنظیم بولگن سوو مقداری دقیق شکلده ایکینزارلرگه ییتیشهدی و محصوللرنینگ یخشیراق اوسیشیگه سبب بولهدی.»
غور ده دهقانلر، قوروقچیلیک دوامی و یاغینگرچیلیکلر کمهیشیدن خواطر بیلدیریب و ایتیشلریچه، دولت و مسئول نهادلر ینگی سووغاریش سیستملریدن کینگ کولملی فایدهلنیش زمینهسینی یرهتمهگنلری صورتده، کیلهجکده ایکینچیلیک محصوللرنی ییتیشتیریش و حاصل آلیش بوییچه امیدی بولمهیدی.
باشقه بیرتاماندن، غور ده ایکینچیلیک ایشلری بوییچه ایش بیلرمانلر، ینگی سووغاریش اسلوبلریدن فایدهلنیشنی سوو تنقیصلیگی بیلن قرشی کورهش و محصوللر ییتیشتیریلیشی توغریسیده فایدهلی یوللردن دیب و تاکید قیلیشلریچه، بو ولایتده ایکینچیلیکنینگ برقرارلیگی اوچون دهقانلرنی بو سیستملر بوییچه اوقیتیش و فایدهلنیش امکانیتینینگ کینگهیتیریش کیرهک.
غور ده ایکینچیلیک ایشلری بوییچه ایش بیلرمان عبدالظاهر توانا، دهقانلرنینگ قطرهای سووغاریش سیستمیدن فایدهلنیش گه علاوه، سوو تنقیصلیگی و هوا اوزگریشلری بیلن قرشی کورهش اوچون تیزلیکده حاصل بیرهدیگن و قوروقچیلیک برابریده چیدملی بولگن محصوللرنی ایکیشگه یوز کیلتیریشلرینی توصیه قیلهدی.
اونینگ ایتیشیچه: «دهقانلرنینگ کوپراق تیز حاصل بیرهدیگن و قوروقچیلیک برابریده چیدملی بولگن محصوللرنینگ ایکیشگه توجه قیلیشلرینی توصیه قیلهمن. بو ایش سبب آز سوو صرفلهنیشی بیلن کوپراق حاصل قولگه کیلهدی. دهقانلر ایکینزارلریگه سوو تنظیملنیشی پیتیده، سوو منبعلرینینگ عدالتلی شکلده فایدهلنیشینی رعایت قیلسینلر.»
مذکور ایکینچیلیک ایشلری بوییچه ایش بیلرمانینینگ اورغولشیچه، دولت و مسئول نهادلر ینگی سووغاریش اسلوبلری رواجلنیشی، دهقانلردن فایدهلی شکلده حمایت بولینیشی و سوو مدیریتی اوچون اوزون مدتلی برنامهلرنی قولگه آلمهگنی صورتده، بو ولایتده ایکینچیلیک کیلهجگی جدی خوف بیلن روپهره بولهدی.
شوندهی بیرحالده، غور ایکینچیلیکی، سووغاریش و چاروهچیلیک ریاستیده مسئوللر، قوروقچیلیک و ییر آستی سوولر کمهیشینی مذکور ولایت زراعتی اوچون جدی قیینچیلیک بیلیب و ایتیشیچه، همکار نهادلردن قطاری بیلن همکارلیکده، سوونینگ حددن تشقری صرفلنیشی آلدی آلینیشی اوچون فایدهلی برنامهلرنی عملگه آشیریب، دهقانلرنی ینگی سووغاریش سیستملری و سوو منبعلرینینگ درست مدیریت قیلینیشی بیلن تانیشتیریشگه سعی و حرکت قیلماقدهلر.
غور ایکینچیلیک، سووغاریش و چاروهچیلیک ریاستی مطبوعات مسئولی ضیاءالحق جویانینگ ایتیشیچه: «مرکز و تومنلرده، دهقانلر اینیقسه ایکینچیلیک ریاستی آرقهلی نمایشی قطعهلر و ایسیقخانهلرده قسما ینگی سووغاریش اسلوبلریدن فایدهلنهدی. شونینگدیک باغلرده سوونینگ حددن تشقری فایدهلنمسلیگی اوچون زمانهوی سیستملر نصب بولیب و دهقانلرگه بو توغریده آگاهیلیک بیریلگن.»
غور ده ایکینچیلیک ایشلری بوییچه ایش بیلرمانلر، مسئوللر و دهقانلر، قوروقچیلیک بیلن قرشی کورهش و ایکینچیلیک برقرارلیگی توغریسیده حاضرگی برنامهلرنی ییترلی بیلمهی و دایمی سیمینارلر، سوو مدیریتی بوییچه ینگی اسلوبلرنینگ کینگ کولملی شکلده فایدهلنیشی، فایدهلی سووغاریش و دهقانلردن مالی قوللب-قوتلشگه نیاز بارلیگیگه تاکید قیلهدیلر که بو رقم، هو اوزگریشلری برابریده اولرنینگ چیدملیگی کوپهیسین.
