غزنی یشاوچیلریدن بیرقطاری، اسلام امیرلیگی و پاکستان همده ایران بیلن امریکا و اسرائیل اورتهسیده اوروش باشلنگنیدن سونگ، اوشبو ولایتده آزیق-آوقت نرخی سیزیلرلی درجهده آشگنینی ایتهدیلر. اولر گه کوره، حاضرگی وضعیت طفیلی توارلرنی ساتیب آلیش گه قوربلری ییتمهیدی.
غزنی یشاوچیلریدن محمدنادر، آزیق-آوقت ساتیب آلیش اوچون شهر مرکزیگه کیلگن ایتیشیچه، اون، یاغ، برنج، سبزهوات، تازه و قوروق میوه نرخی آشگن شونینگ اوچون ساتیب آلیشگه قوربی ییتمهیدی.
او شوندهی دییدی: «اون، یاغ و برنج قیمت بولگن. باشقه نرسهلر هم شوندهی قیمت بولگن مثال اوچون سبزهوات، کچالو هر سیری ۳۵۰ افغانی گه آشگن. یاغ قیمتی قریب ۳۰۰ افغانی کوپهیگن. بازار کنترول بولیشنی ایستهیمیز. آدملرنینگ پولی یوق چونکی بیکارلیک هر کونی حتا ۱۰۰ افغانی هم ایشلهی آلمهیمیز.»
غزنی یشاوچیلریدن باشقه بیری محمدعلیم، ایشسیزلیکدن نالیب ایتیشیچه، سونگی هفتهلرده آزیق-آوقت نرخی آشگن و بو جریان طفیلی یشاوچیلر تورلی قیینچیلیک بیلن دوچ بولگن. اونگه کوره: «کیلیب کورینگیزلر همه نرسه قیمت بولگن. آدملر قشاق و کمبغل. آلدین بیر کیلو پمیدار ۴۰ افغانی ایدی، ایندی ۶۰ گه آشگن. آلدین بیر بوجی اون ۱۳۰۰ افغانی ایدی، حاضر ۱۴۷۰ افغانی بولگن. بیر بوشکه یاغ آلدین ۸۰۰ ایدی، حاضر ۱۲۳۰ افغانی بولگن.»
غزنی شهریگه قوشیمچه، بو ولایتنینگ تومنلریده هم آزیق-آوقت نرخی مثلسیز درجهده آشگن.
غزنی ولایتی جاغوری تومنی یشاوچیسی غلامرضا، منطقهدهگی توقنشوولردن سونگ، بیرقطار ساتووچیلر احتکار قیلیب و بو تومنده آزیق-آوقت نرخینی آشیرگنلرینی بیلدیرهدی. او شوندهی دییدی: «دکانلردن اون و یاغ سورهدیم – کوریب توریب من دکان اون و یاغدن توله، بیراق افسوس بیلن ایتدیلر بولر ساتیلمهیدی. هیچ کیم ساتیب آلالمسدی و آلهدیگنلر سانی جودهیم آز ایدی. شو اوروش سببلی بیر بوجی برنج ۴۰۰ دن ۵۰۰ افغانی گچه آشگن. دکاندارلر هم هر کیشیگه بیر بوجیدن کوپ ساتیشمهیدی.»
غزنی ولایتی گیلان تومنی یشاوچیسی رحمتگل، دولتدن بازارلرده احتکار و قیمت ساتهدیگنلرنی نظارت قیلیشینی ایستهیدی. اونینگ ایتیشیچه: «نرخ-نوالر آشگن. آلدین بونچه قیمت ایمس ایدی، بیراق حاضر کوپ قیمت بولگن. آلدین بیر سیر شکرنی ۳۵۰ افغانی آلردیک، بیراق حاضر ۴۲۰ افغانی بولگن. کچالو هم ۱۷۰ افغانی ایدی، بیراق حاضر ۲۶۰ افغانی بولگن.»
غزنی محلی مسئوللریگه کوره، سونگی کونلرده قیمت ساتیش و احتکار قیلیش عیبی بیلن قریب ۵۰۰ دکان مهرولاک بولگن.
غزنی بلدیهسی سوزلاوچیسی عبدالولی جلالزی، احتکار و قیمت ساتهدیگن دکانلر بیرینچی آدیمده اوچ کون باغلنهدی و تکرار بولگن حالده، بو مدت اوزهیتیریلهدی. نهایت دکاندارلرنینگ ایش جوازی بیکار قیلینهدی.
جلالزی شوندهی دییدی: «احتکار قیلهدیگنلرنی آلدینی آلیش اوچون کمیته تشکیل ایتیلگن. حاضرگچه قریب ۵۰۰ دکان احتکار قیلیش و قیمت ساتیش عیبی بیلن یاپیلگن. دکاندارلردن بوتوغریده دقت قیلیشنی ایستهیمیز، بیر کون ایچیده بونچه قیمت بولمهیدی.»
هر ییلی هییت بیرهمی عرفهسیده آزیق-آوقت نرخی آشهدی، بیراق بو ییل منطقهدهگی توقنشوولر افغانستان بازارلریگه سلبی تأثیر قویگن.
