اسلام امیرلیگی طبیعی آفتلرنی باشقریش ملی ادارهسینینگ اعلام قیلیشیچه، افغانستان ولایتلریدن قطاریده یوز بیرگن کوچلی یاغینگرچیلیکلر، سوو تاشقینلر، بوران و چقماق نتیجهسیده، ۲۸ کیشی اولیب و باشقه ۴۹ کیشی یرهلنگن.
مذکور اداره سوزلاوچیسی محمدیوسف حمادنینگ ایتیشیچه، مذکور واقعهلرده ۵۶۸ یشش اوی بوتونلی و قسمی شکلده بوزیلگن. شونینگدیک بیر مینگ ۱۳۰ عایله، ۹۳ کیلومتر سرک و ایکی مینگ ۹۰۱ جریب ایکینچیلیک ییر زیان کورگن.
شوندهی بیرحالده، سوو تاشقینلر نتیجهسیده اویلری بوزیلیب و ایکینچیلیک ییرلری اورتهدن کیتگن ولایتلردن قطاریدهگی یشاوچیلر، حاضرگچه هیچ قندهی یاردم قولگه کیلتیرمهگنلرینی بیان قیلیب، حکومت آرقهلی آزیق-آوقت و نقدی یاردم بیریلیشینی سورهگنلر.
یوز بیرگن سوو تاشقینلر نتیجهسیده عایله اعضالریدن اوچ تهسینی قولدن بیرگن بادغیس ولایتی قادس تومنی یشاوچیسی محمدنینگ ایتیشیچه: «اوشبو سوو تاشقینلر نتیجهسیده عایله اعضالریمیزدن اوچ تهسی اولدی و حاضرگچه هیچ قندهی یاردم هم قولگه کیلتیرگنیمیز یوق. دولتدن یاردم بیریلیشینی سورهیمیز.»
هرات ولایتی پشتونزرغون تومنی یشاوچیلریدن علیرضانینگ ایتیشیچه، سوو تاشقینلر یوز بیرگنی نتیجهسیده، ییتی جریب ایکینچیلیک ییری بوزیلگن. «ییتی جریبدن آرتیق ایکینچیلیک ییریمیز بوزیلدی و منطقهمیزده اهالینینگ ۴۰ دن ۵۰ جریب ییرینی سوو باسگن و بوزیلگن. بو ییل ایکینچیلیک آرقهلی عایله نیازلرینی تامینلشگه امیدوار ایدیک. حاضرگچه هیچ کیم بیزلرگه یاردم بیرمهگن و بیزلرگه آزیق-آوقت و نقدی یاردملر بیریلیشینی سورهیمیز.»
سونگی کونلر، افغانستاننینگ ولایتلردن قطاریده کوچلی یاغینگرچیلیکلر و سوو تاشقینلر یوز بیرگن.
اسلام امیرلیگی ترانسپورت و هوا یوللری وزیرلیگینینگ هواشناسلیک ریاستی، شونینگدیک بوگون ۲۴ ولایتده یاغینگرچیلیک و سوو تاشقینی یوز بیریشی احتمالیدن آگاهلنتیرگن ایدی.
