فاریاب ده محلی مسئوللری نینگ ایتیشلریچه، سونگی بیر هفته جریانیده اوشبو ولایت‌ده یوز بیرگن هلاکتلی سوو تاشقینلر نتیجه‌سیده، قریب ۸۰ کیشی اولیب و ۲۰ کیشی یره‌لنگن. مسئوللر گه کوره، مذکور سوو تاشقینلرده یوزلب یشش اوی، مینگلرچه جریب ایکینچیلیک ییر، کوپریک و قتناو یوللر هم ویران بولگن.
فاریاب معلومات و مدنیت باشلیغی شمس‌الدین محمدی نینگ سلام‌وطندار گه ایتیشیچه، بلچراغ، قیصار، خیبر، المار، پشتونکوت، چهلگزی، قرغان و کوهستان تومنلریده یوز بیرگن سونگی سوو تاشقینلر نتیجه‌سیده، ۸۰ کیشی اولیب، ۲۰ کیشی یره‌لنگن و شونینگدیک باشقه تورت کیشی یوقالگن دیر.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «فاریاب سونگی کونلر کوچلی سوو تاشقینلر گه شاهد بولگن ولایت‌لردن دیر. فاریاب ولایتی نینگ بیر قطار تومنلری جمله‌دن بلچراغ، قیصار، پشتونکوت، چهلگزی، خیبر و کوهستانات تومنلریده اهالی گه کوپینچه جانی و مالی زیان ییتیشگن. بو سوو تاشقینلرده قریب ۸۰ کیشس اولیب و قریب ۲۰ کیشی یره‌لنگن و تورت_بیش کیشی حاضرگچه یوقالگن دیر.»
شونده‌ی بیرحالده، فاریاب ده سوو تاشقینلردن زیان کورگنلر نینگ ایتیشلریچه، سونگی سوو تاشقینلر اهالی گه کوپینچه مالی و جانی زیان ییتیشتیرگن. پشتونکوت تومنی نینگ «قصبه قلعه» قیشلاغی یشاوچیسی محمدابراهیم نینگ سلام‌وطندار گه ایتیشیچه، ویران قیلووچی سوو تاشقینلر نتیجه‌سیده، اهالی گه کوپینچه زیان ییتیشگن.
او اسلام امیرلیگی‌دن اونگه یاردم بیریلیشی نی ایسته‌گن. «اوتگن کیچه بو ییرده کوچلی یامغیر بولدی؛ کیین سیل کیلدی و کوره‌سیزلر کا تهکوی‌ده اون، یاغ بار ایدی و باشقه برچه نرسه نی سیل آلیب کیتگن. برچه نرسه تهکوی‌ده ایدی.»
شونینگدیک فاریاب ده یوز بیرگن سوو تاشقینلردن زیان کورگنلردن بیری محمدنسیم نینگ ایتیشیچه، سوو تاشقینلرده برچه نرسه‌سی نی قولدن بیریب و حاضر ایسه یامان بیر وضعیت‌ده قرار تاپگن.
فاریاب یشاوچیسی و کرایی اوی‌ده حیات کیچیره‌دیگن پیرمحمد نینگ ایتیشیچه، اویی بوتونلی سوو آستیده قالگن. او سرپرست حکومت‌دن قیین‌چیلیگی حل بولینیشی نی ایسته‌گن.
باشقه بیر تاماندن، فاریاب مرکزی میمنه شهری نینگ «وزیرآباد» قیشلاغی یشاوچیسی و سوو تاشقینلردن زیان کورگنلردن باشقه بیری عبدالله نینگ ایتیشیچه، بو منطقه‌ده ایکی تاماندن سیل کیلگن و قریب ۲۰۰ یشش اوی ویران بولگن.
بیزلرنینگ «ایکس» ترماغی ده هم تعقیب قیلینگ!
بو توغریده فاریاب حاکمی سوزلاوچیسی عصمت‌الله مرادی نینگ ایتیشیچه: «محلی اداره سوو تاشقینی‌دن زیان کورگنلر قیین‌چیلیگی نی حل قیلیش اوچون سعی‌وحرکت قیلگن که ینگی‌لیکده فاریاب حاکمی داملا شعیب رسالت چهلگزی، قیصار، المار و خیبر تومنلریده یوز بیرگن سوو تاشقینلرده شهید بولگنلر نینگ عایله‌لری بیلن قیغوداشلیک قیلیب و اولرگه نقدی یاردم بیرگن. شونینگدیک سوو تاشقینی‌ده زیان کورگنلر گه یاردم بیریش پروسه‌سی نینگ دوامی بار.»
بو ییل هلاکتلی سوو تاشقینلر نه فقط فاریاب یشاوچیلری؛ بلکیم مملکت نینگ باشقه ولایت‌لریده هم یشاوچیلرگه کوپینچه جانی و مالی زیان ییتیشتیرگن.
