ننگرهار ده دهقانلردن قطارینینگ ایتیشلریچه، سولری پمپلر سووغاریش قیینچیلیکلرینی کمهیتیرگن بیرحالده، بیراق منطقهلردن قطاریده سوو سطحی قویی کیتیب و بو مسئله کیلهجک اوچون خواطلرنی یرهتگن.
بو ولایتدهگی دهقانلردن عارفاللهنینگ ایتیشیچه، اوچ ییلدن بویان سولری پمپ سیستمیدن فایدهلنیش سبب، محصوللری کوپهیگن. اونگه کوره، سولری سیستمدن فایدهلنیشنینگ یخشی بولگنی بیلن ینه هم، ییر آستی سوولر کمهیشی توغریسیده خواطرلنگن دیر. «سولری پمپ سیستم محصوللریمیزنی کوپهیتیرگن، لیکن ییر آستی سوولر کمهیگن. منطقهلردن قطاریده بیشدن آلتی متر قویی کیتگن. ییر آستی سوولرگه باسیم کمهیشی اوچون اینگ یخشی ایش اریقلر آرقهلی دریالر سوویدن فایدهلنیش دیر.»
ییتی ییلدن بیری ایکینچیلیک بولیمیده فعالیت قیلهدیگن ثوابجاننینگ ایتیشیچه، سولری پمپلر ییلر سووغاریلیشینی قولیلشتیریب و سووغاریش خرهجتلرینی کمهیتیرگن. «سولری پمپلر بیزلرگه یخشی امکانیتلرنی یرهتگن، چونکه ایکینچیلیک صرف-خرهجتلرینی کمهیتیرگن، بیراق ینه هم سوو سطحی قویی کیتگنی بیزلرنی خواطرلنتیرگن. سوونی شو رقم آلیشگه دوام بیریلگنی صورتده، کیلهجکده سوو کملیگی بیلن روپهره بولیب و دهقانلر ضرر کوریشی ممکن.»
شونینگدیک دهقانلردن باشقه بیری عبدالوکیلنینگ ایتیشیچه، سوو کملیگی سبب اوتگن ایکی ییلده قودوغینینگ چقورلیگینی ۵۵ متردن ۷۵ مترگه آشیرگن. «سولری پمپلر سبب، محصوللریمیز کوپهیگن، بیراق حاضر سوو کمهیگنی سبب قودوغیمیزنینگ چقورراق قازیشگه مجبورمین.»
شوندهی بیرحالده، سوو بولیمی بیلرمانلرینینگ ایتیشلریچه، قیینچیلیک سولری پمپلردن فایدهلنیشده ایمس، بلکیم نامنظم و حددن تشقری سوونی آلیشده دیر. ننگرهار بیلیم یورتی زراعت فاکولتهسی استادی رحمت سعادتنینگ ایتیشیچه، جلالآباد، رودات، سرخرود، چپرهار و کوت، جدی شکلده ییر آستی سوولر کمهیش قیینچیلیگی بیلن روپهره بولگن حدودلر دیر.
سعادتنینگ کوپهیتیریشیچه، سوونی درست مدیریت قیلیش، ذخیره قیلیش و آز خرهجتلی سووغاریش سیستملرینی رواجلنتیریش ضرور دیر. «اصلی ییچیم یولدن بیری سوودن فایدهلنیشنینگ مدیریت بولیشی دیر. صرفلهنیشی و اسراف بولیشیگه توجه بولیب و سوونینگ درست شکلده صرفلهنیشی کیرهک. نیاز بولمهگنی صورتده، اضافی سوو قازیب چیقریلمسه. بونگه علاوه، درهلرده یامغیز سووی ییغیلیشی و سوو تاشقینی سووی ذخیره بولیشی سیستملری فعال بولسین.»
ننگرهار دینگیز حوزهسی مسئولی محمدنعیم شینوارینینگ ایتیشیچه، یاغینگرچیلیک کمهیشی سبب، اوتگن بیش ییلده سوولری پمپلردن فایدهلنیش قریب ۲۰ فایز آشگن. «چپرهار، رودات و غنیخیل باشقه تومنلرگه قرهگنده کوپراق سوو تنقیصلیگی بیلن روپهره دیر. یاغینگرچیلیک کمهیشی ییر آستی سوولر سطحیگه چقوی تاثیر قویگن. حددن تشقری صرفلنیشینینگ آلدی آلینیشی اوچون بیر قطار ایش عملگه آشیریلیشی کیرهک. مجوز بولمسدن قودوق و ترماقلرگه رخصت بیریلمهیدی. حاضر ایسه سوو سطحینی تعیینلش اوچون ۷۹ حلقه نظارتی قودوق نظارت آستیده قرار تاپگن. سوو منبعلری سقلنمهگنی صورتده، ننگرهار کیلهسی ۵ دن ۱۰ ییلگچه جدی شکلده سوو بحرانی بیلن روپهره بولهدی.»
گرچند سولری پمپلر ایکینچیلیک بولیمیده ننگرهار دهقانلری اوچون امکانیتلرنی یرهتگن، بیراق جلالآباد، رودات، سرخرود، چپرهار، کوت و غنیخیل تومنلریده ییر آستی سوولر سطحی کمهیشی اوچون خواطرلنتیرووچی دییلهدی. ایش بیلرمانلرنینگ اورغولشیچه، سوو مدیریت بولیشی آرقهلی دریالر سووی و آز مصرفلی سووغاریشدن فایدهلنیش، سوو منبعلرینی سقلهش کیرهک.
