جمهوریت توزومیده هم حقوق وسیاسی بیلیم فاکولتهلریدن فارغ بولگنلر اوچون ایش امکانیتلری اونچهلیک یخشی بولمهگن بولسهده؛ بیراق حاضرگی سرپرست حکومت دوریده ایش امکانیتلری سېزیلرلی درجهده کمهیگن.
بو گزارشده، حقوق و سیاسی بیلیم فاکولتهلریدن فارغ بولگنلر اوچون ایش امکانیتلری آزلیگینی انیقلش مقصدیده، سلاموطندار اوشبو فاکولتهلرنی بیتّیریب و حاضر بیکار بولگن ۱۰ قیز و ۱۱ ییگیت شامل ۲۱ طلبه بیلن صحبت قیلگن. اوشبو ۲۱ فارغ بولگندن، ۱۴ نفری واسطهبازلیک، شخصی و قومی مناسبت، پارهخورلیکنی بیکارلیک دلیلی اتهب و باشقه ییتّی نفری هم ایش امکانیتلری یوقلیگی و حکومت تامانیدن قۉللب-قوتلنمسلیکنی بیکارلیک عاملی عنوان قیلگنلر.
کابل بیلیم یورتی حقوق و سیاسی بیلیم فاکولتهسی قضا و سارنواللیک بولیمینی بیتّیرگن کابللیک ۲۶ یاشر عارفه حمیدی، شخصی مناسبتنی بیکار بولیش اصلی عاملی بیلهدی. اونینگ ایتیشیچه، افغانستان حقوق-قضایی توزیلمهسیده یول تاپیش اوچون، طلبهلیک پیتیدهگی برچه قیینچیلیکلرنی قبول قیلگن بولسهده؛ بیراق واسطهسی بولگنلر اوچون بو توزیلمهده ایش امکانیتی بار. اونینگ کوپهیتیریشیچه: «بو بولیمده بای بهدولت یا-ده قومی مناسبتی بولگنلرنی آلهدیلر؛ یعنی بیز گه هېچ بیریسی یوق، بیتّیرگن فاکولتهده ایش تاپیشنی اونیتیش کېرهک.»
حقوق بولیمینی بیتّیریب و ایشسیزلیکدن عذاب چېکهیاتگن بلخلیک ۲۴ یاشر امین، یاشلر اوچون ایش امکانیتلری یوقلیگینی، واسطه و پاره تولش گه قوربی یېتمسلیک بیلهدی. اونینگ ایتیشیچه: «فارغ بولگچ، پارهسیز اصلا ایش امکانیتی یوقلیگینی سیزدیم. پولینگیز و واسطهنگیز بولمسه حتا ساده بیر دوسیهنی سیزگه بیرمهیدی.»
بیزلرنینگ فیسبوک صحیفهمیزگه باش اورینگ!
اوشبو گزارشده صحبت قیلگن ییتّی کیشی، ظرفیتنی آشیریش اوچون امکانیت یوقلیگی و حکومت تامانیدن یاشلر قۉللب-قوتلنمسلیک و یرهتیلگن چېکلاولرنی، ایشسیزلیک اصلی عاملی بیلهدیلر.
خلقارا مناسبتلر بولیمیدن دیپلومی بولگن میدانوردک یشاوچیسی ۲۵ یاشر فرید نوایی، حکومتنینگ یاشلر گه نسبتن بیفرقلیگی و پارهخورلیکنی حقوق و دیپلماسی بولیملریدن فارغ بولگنلرنینگ ایشسیزلیک اصلی عاملی عنوان قیلهدی. اونگه کوره: «پارهخورلیک کوپ و یاشلر گه اهمیت بیریلمهیدی؛ حاضرگی قلتیس شرایطده دیپلماسی و حقوق بولیمیده ایشلش قولی اېمس.»
کابل بیلیم یورتی حقوق و سیاسی بیلیم فاکولتهسینی بیتّیرگن ۲۳ یاشر ثریا احمدی، فراغتدن کېین تعلیمی و عملی سیمنارلر اوتکزیلمسلیکنی اوشبو بولیمدن فارغ بولگنلرنینگ ایش تاپیش اونگیدهگی باشقه قیینچیلیکلردن بیلهدی. اونینگ ایشانچی گه کوره، بیلیم یورت دوریده کوپراق تیوری شکلده درس بیریلهدی و فارغ بولگنلر حقوق ساحهسیده ایش گه کېریش اوچون ظرفیتسازلیکّه نیازمندلر. «ظرفیتسازلیک اوچون هېچ سیمنار اوتکزیلمهیدی که قندهی حقوق بولیمیده ایشلهسک؛ فقط تیوری شکلده درس اوقیگنمیز؛ بو بولیمده یاشلر فعال بولیشنی اېستسهلر سیمنار و ظرفیتنی آشیریش برنامهلر اوتکزیلیشی درکار.»
خلقارا مناسبتلر فاکولتهسینی بیتّیرگن کابل یشاوچیسی ۲۵ یاشر نازنین شریفی، عیاللر اوچون اجتماعی و تحصیلی چېکلاولرنی اولرنینگ فعالیتی اونگیدهگی معما بیلهدی. اونینگ ایشانچی گه کوره، قیزلردن نهفقط تحصیل امکانیتی آلینگن بلکه بیتیرووچیلر ایشلش حقیدن محروم دیر. اونینگ ایتیشیچه: «بیز قیزلر گه باشقه اصلا یول یوق؛ بیر تاماندن اوقیش گه ایزین بیریشمهیدی و باشقه تاماندن اوقیگن کیشینی ایشلش گه قویمهیدیلر؛ حتا اداری بیر ایشنی عیاللر گه بیرمهیدیلر، مملکتدن تشقری نمایندهلیک اۉز اورنیگه.»
بیزلرنینگ «ایکس» ترماغی ده هم تعقیب قیلینگ!
شو بیلن بیرگه، خلقارا مناسبتلر ایش بیلرمانلری، تعلیمی نصاب صفتی پسلیگینی فارغ بولگنلرنینگ ایشسیزلیک اصلی عاملی عنوان قیلهدیلر. اولرنینگ ایشانچی گه کوره، دولت ادارهلری گه یول تاپیش اوچون تخصص و استعداد اساسیده فارغ بولگنلرنینگ استخدام قیلیش سیستمی یوقلیگی، یاشلر اورتهسیده ایشسیزلر سانی کوپهیشی گه سبب بولگن.
خلقارا مناسبتلر بیلرمانی حبیبالله جعفری، حقوق و سیاسی بیلیم فاکولتهلریدن فارغ بولگن یاشلرنینگ ایشسیزلیک اصلی سببینی، ایش امکانیتلری عادلانه تقسیم بولمسلیگی گه بیلهدی. اونینگ کوپهیتیریشیچه: «بو ییرده ایش امکانیتلری در حقیقت علاقه اساسیده تقسیم بولهدی تخصص اساسیده اېمس؛ بو کوپینچه یاشلرنینگ بیکار قالیش اصلی عاملی دیر و افسوس بیلن سرگردان بیر نسل اولهراق باشقه مملکتلر گه مهاجر بولهدیلر.»
خلقارا مناسبتلر ایش بیلرمانلریدن باشقه بیری سیدشفیقالله ساداتنینگ ایشانچی گه کوره، حکومت عادلانه ایش امکانیتلرینی یرهتیش بیلن، یاشلر اورتهسیده ایشسیزلیکنی کمهیتیریش اوچون اقدام قیلیشی کېرهک. «حاضرگی کونده خلقارا مناسبتلر بولیمی گه قۉشیمچه، باشقه بولیملرده ایش امکانیتی آز دیر؛ بیراق خلقارا مناسبتلر بولیمیده کوپراق؛ حکومت دولت ادارهلری پُستلرینی تخصص اساسیده تقسیم قیلیب و شایستهسالارلیکنی نظر گه آلیشی کېرهک؛ بیکارلر سانی کوپهیش سببلریدن بیری دولت ادارهلریده هېچ کیم تخصص و شایستهسالارلیک اساسیده ایش گه آلینمهیدی.»
حقوق مسئلهلری بوییچه بیلرمان محمد رحیمی، حقوق و خلقارا مناسبتلر بولیملریدن فارغ بولگنلر اوچون ایش امکانیتلری یرهتیلیشی گه تأکیدلب و محکمهلرده ملَکهلی کیشیلر ایش گه آلینیشینی اېستهیدی. اونینگ کوپهیتیریشیچه: «حقوق، قضا و سارنوالیک یا-ده خلقارا مناسبتلر بولیمینی بیتّیرگنلر اوچون ایش امکانیتلری در حقیقت یوق بولگن، عینحالده برچه نرسه حقوق، قضا و سارنوالیکده اوقیتیلهدی؛ میراث، مدنی حقوق، خلقارا جزا، دنیا و اسلام دینی قاعدهلری اساسیده اېدی؛ فقط سوادسیز بولگنلرنی ایش گه آلهدیلر.»
برچهسی بیلن، سرپرست حکومت سۉزلاوچیسی ذبیحالله مجاهد، حکومت توزیلمهسیده حقوق بولیمیدن فارغ بولگن یاشلر ایش گه آلینیشی مهم دیب ایتیشیچه، سرپرست حکومت ملَکهلی یاشلر اوچون ایش امکانیتلرینی یرهتیش گه سعی-حرکت قیلماقده. اونگه کوره: «حقوق و باشقه فاکولتهلرنی بیتّیرگنلر، نظام و جامعه اوچون کېرهک دیر و تورلی ادارهلرده نیاز بولگن حالده ایش گه آلینهدیلر؛ اسلام امیرلیگی توانالیگی و استعدادی بولگنلر گه ایش امکانیتینی یرهتیب بیرهدی.»
افغانستانده هر ییلی، دولت و خصوصی بیلیم یورتلردن مینگلب کیشی حقوق و سیاسی بیلیم فاکولتهلریدن فارغ بولهدیلر، بیراق ایش امکانیتلری یوقلیگی طفیلی، بو یاشلرنینگ کوپینچهسی ایشسیزلیک و نامعلوم کېلهجک بیلن روپهره بولهدیلر.
