قویاش ۱۴۰۴-ییل، ۱۲-عقرب ده زلزله عاقبتیده اوی-جایلری بوزیلگن بلخلیکلردن بیرقطاری، خیمهلر آستیده قیین احوالده تیریکچیلیک قیلیب بالهلری و عیاللری کسل بولگنینی ایتهدیلر.
بو عایلهلر، طبی خذمتلردن فایدهلنه آلمسلیکدن نالیب، قیشلاقلرده ساغلیق مرکزلرده کسللرینی یخشی دوالش اوچون بستر یوقلیگی، طبی اوسکونهلر یېتیشمسلیگی و شفاکار یوقلیگینی، اساسی احتیاجلریدن اتهیدیلر.
بلخ ولایتی شولگره و کشنده تومنلریده زلزلهده جبرلنگنلرنینگ ایتیشیچه، کسللرینی دوالش اوچون توانلری بولمسهده؛ بیراق کسللرینی بو ولایت مرکزی مزارشریف شهری گه آلیب باریش گه مجبورلر.
زلزلهدن جبرلنگن رمضان و نذیر، حکومتدن اوشبو تومنلرده ساغلیق خذمت امکانیتلرینی یرهتیشنی سورهدیلر.
رمضان شوندهی دیېدی: «ایکی بالم کسل اېدی؛ دوالش اوچون مزارشریف گه آلیب باردیم، ۳-۴ مینگ افغانی مصرف قیلدیم، هنوزگچه ساغلمهگن. اولرنی دوالش اوچون شخصی کسلخانهلر گه آلیب باریش توانیمیز یوق. منطقهمیزده یخشی شفاکار و کسلخانه بولیشنی اېستهیمیز.»
نذیر هم سۉزلرینی شوندهی بیان قیلهدی: «بو ییرده کلینیک بار؛ بیراق همهنی دوالهی آلمهیدی. ایرتهلب ساعت ۸ ده کیلهدیلر و عصر پیتی ساعت ۴ گه قدر کیتیشهدی؛ کېین اېسه هېچ کیم یوق. شخصی شفاکار آلدیگه باریش اوچون پولیمیز یوق.»
اوشبو زلزلهلرده جبرلنگنلردن باشقه بیری رسول، یشش اویی بوزیلگن و اېندی ساووق هواده خیمه آستیده حیات کیچیرماقده، منطقهلریدهگی مرکزلرده یېترلیچه امکانیت یوقلیگینی معلوم قیلهدی.
اونینگ کوپهیتیریشیچه: «بو ییرده بستر یوق؛ فقط تابلیت بیریشهدی. بیز اوچون شو خذمتلر بیر آز یخشی؛ بیراق کوپراق ساغلیق خذمت کورسهتیلیشنی اېستهیمیز؛ چونکه یشاوچیلر بوتون نرسهلرینی قولدن بیرگن. کسلنی شفاکار آلدیگه آلیب باریش گه قوربیمیز یېتمهیدی.»
بلخ ساغلیقنی سقلش ریاستی مسئوللرینینگ ایتیشیچه، زلزله طفیلی بوزیلگن حدودلرده جبرلنگن عایلهلر گه ترتیبلی طرزده طبی خذمت کورسهتیلماقده.
بلخ ساغلیقنی سقلش ریاستی سۉزلاوچیسی کمالخان زدران گه کوره، زلزلهدن سۉنگ، بوزیلگن حدودلرده سیاسی گروهلر طبی مرکزلر گه یوباریلگن و اهالی گه خذمت کورستماقدهلر.
او شوندهی دیېدی: «بیز امکان قدر طبی خذمت کورستماقدهمیز؛ هنوزگچه تومنلرده سیار تیملر و ۶۰ بسترلیک کسلخانهلر فعالیت آلیب بارماقده. یشاوچیلر گه طبی خذمت کورسهتیلیشیگه سعی-حرکت قیلهیپمیز.»
قویاش ۱۴۰۴-ییل، ۱۲-عقربده یوز بیرگن زلزلهده بلخ و سمنگان ولایتلریده ۲۷ کیشی هلاک بولدی و بیر مینگدن آرتیق کیشی یرهلندی و قریب ایکی مینگ یشش اوی بوزیلدی.
