بلخ ولایتی شولگره تومنی «گذر تراب» قیشلاغی یشاوچیلرینینگ ایتیشلریچه، یوز بیرگن زلزلهدن بیر آیدن کوپ اوتگنی بیلن حاضرگچه هیچ یاردم قولگه کیلتیرمهگنلر. اولرنینگ کوپهیتیریشلریچه، زلزلهده اویلرینی قولدن بیریب و باشپنهسیزلیک، اولرنی کوپینچه قیینچیلیکلر بیلن روپهره قیلگن.
گذر تراب قیشلاغیده قریب ۸۰ عایله حیات کیچیرهدی، بیراق مذکور عایلهلردن قطاریگه کوره، ایچیملیک سوو، تعلیمی خذمتلر، ساغلیق خذمتلر و حیاتنینگ باشقه آسایشتهلیکلریدن فایدهلنیش توغریسیده قیینچیلیکلر بیلن روپهرهلر. باشقه بیر تاماندن، ۱۲-عقرب ده یوز بیرگن زلزله نتیجهسیده، مذکور قیشلاقده یشش اویلردن کوپ قطاری ویران بولیب یا-ده جدی شکلده زیان کورگن.
گذر تراب قیشلاغی یشاوچیسی بولمیش بیبینینگ ایتیشیچه، هوا ساووقلیگی و باشپنهسیزلیک زلزلهدن جبرلنگنلر حیاتینی تهدید قیلهدی. اونینگ کوپهیتیریشیچه: «زلزله یوز بیرگنیدن حاضرگچه بیزلرگه هیچ یاردم بیریلمهگن؛ باشقهلرگه یاردم بیریلدی، بیراق بو قیشلاقده حاضرگچه سروی بولمهگن؛ آواره و سرگردانمیز و بالهلر ایسه جوده یامان وضعیتده قرار تاپگن.»
اوشبو قیشلاق یشاوچیلریدن بیری محمدداوودنینگ ایتیشیچه: «حاضرگچه بیزلرگه نه دولتی نهادلر و نه سرمایهدار کیشیلر تامانیدن ۱۰ افغانی هم یاردم بیریلمهگن؛ قیینچیلیکلریمیز جودهیم کوپ، آچیق فضاده و باشپنهسیز حیات کیچیرهمیز.»
گذر تراب قیشلاغیدهگی یشاوچیلریدن باشقه بیری آقامحمد، یوز بیرگن زلزلهده یرهلنگنینی بیان قیلیب و ایتیشیچه، حکومت و یاردم بیرووچی نهادلر تامانیدن حاضرگچه هیچ یاردم آلمهگن. «زلزله یوز بیرگنیده، اویلریمیزنینگ دیوارلری قولهب توشدی؛ جودهیم قورقدیک و آیاغیم هم یرهلندی؛ حاضرگچه درست یوره آلمهیمن، کمبغل و بیچاره کیشیمیز؛ نه آوقتیمیز بار و نه باشپنهمیز.»
شونینگدیک گذر تراب نمایندهسی عطاءاللهخاننینگ ایتیشیچه، نیچه مرته زلزلهدن جبرلنگنلرگه یاردم بیریلیش ایستهگینی شریک قیلگن، لیکن حاضرگچه بو قیشلاقده عملی اقدام عملگه آشیریلمهگن. اونینگ کوپهیتیریشیچه: «حاضرگچه قیشلاغیمیز گه هیچ یاردم ییتیشمهگن. اهالی قشاق و بیچاره دیر و باشپنهلرینی قوریش اوچون هیچ نرسهلری یوق. نیچه کیشی بیلن تومن گه باردیک، سیسیمیز و ایستهکلریمیزنی اولر بیلن شریک قیلدیک؛ خوش درست دیدیلر، بیراق حاضرگچه هیچ قندهی اقدام عملگه آشیریلمهگن.»
گذر تراب یشاوچیلرینینگ ایتیشلریچه، یاغینگرچیلیکلردن آلدین اولرگه یاردم بیریلمهگنی صورتده، بو قیشلاقده یوزلرچه کیشینینگ جدی خوف بیلن روپهره بولیشی ممکن. شوندهی بیرحالده، بلخ محلی مسئوللرینینگ ایتیشلریچه، یاردم بیریلیش جریانی حاضرگچه دوام قیلماقده و زلزلهدن جبرلنگنلردن برچهسینینگ نیازلری حل بولهدی.
بلخ حاکمی سوزلاوچیسی نورالهادی ابو ادریسنینگ ایتیشیچه: «هیچ بیر جای قالمهگن؛ لیکن قالگن بولسه هم اونی هم کورهمیز. اهالی سیسینی چیقرسین، هیئت تعیینلنهدی، برچه گه یاردم بیریلیشیدن ایشانچلی بولسینلر.»
افغانستان شمالیده جاری ییل ۱۲-عقربده یوز بیرگن زلزلهده، اوچ مینگدن آرتیق یشش اوی ویران بولیب و عایلهلردن کوپ قطاری جبرلنیش وضعیتده قالگن.
