بوگون ایرتهلب سمنگان و بلخ ده یوز بیرگن زلزلهدن کیین، مملکتلر و خلقارا نهادلردن قطاری مذکور واقعه نتیجهسیده جبرلنگنلر بیلن همدردلیک بیلدیرگن.
ایران، جاپان و تورکیه، افغانستان شمالیده یوز بیرگن اولیملی زلزله قربانلری عایلهلری بیلن همدردلیک بیلدیرگنلرینی معلوم قیلگن. کابل ده جاپان و تورکیه ایلچیخانهلری اکس صحیفهسیده یازیشیچه، مذکور مملکتلر افغانستان شمالیدهگی زلزله یوز بیرگن منطقهلر وضعیتینی کوزهتیب بارماقده.
شونینگدیک کابل ده ایران ایلچیخانهسینینگ یازیشیچه: «ایران هر دایم قیین شرایطده افغانستان اهالیسی یانیده بولهدی و افغانستان رسمیلری بیلن مصلحتلش همده واقعه تفصیلاتلری و محل یشاوچیلرینینگ نیازلری حقیده معلومات آلیشدن کیین، کیرهکلی یاردملرنی عملگه آشیریشی ممکن.»
بو بیلن بیرگه، اروپا بیرلشمهسینینگ افغانستان بولیمی و خلقارا ساغلیقنی سقلش تشکیلاتی هم، افغانستان ده یوز بیرگن سونگی زلزله قربانلری عایلهلری بیلن همدردلیک بیرگنلر.
اروپا بیرلشمهسی اکس صحیفهسیده، افغانستان یشاوچیلریدن قوللب-قوتلشگه دوام بیریشینی یازگن. «افغانستان ده اروپا بیرلشمهسی هیئتی افغانستان شمالی اینیقسه بلخ و سمنگان ده یوز بیرگن زلزلهدن تاثیرلهنیب و قیغولنگن دیر.»
شونینگدیک خلقارا ساغلیقنی سقلش تشکیلاتینینگ یازیشیچه: «خلقارا ساغلیقنی سقلش تشکیلاتی تیملرنی یوباریش، قوتقریش مادهلری و تروما مراقبتلرینی یرهتیش بیلن، نیچه ساعت ایچیده، جواب بیرگن.»
بیرلشگن ملتلر تشکیلاتینینگ انسانسیورلیک یاردملرنی هماهنگلش دفتری افغانستان بولیمی (اوچا)، نینگ اعلام قیلیشیچه، یاردم بیرووچی گروهلرنی محل گه یوباریب و افغانستان شمالیده یوز بیرگن زلزله طفیلی جبرلنگنلرگه یاردم بیریش اوچون سعیوحرکتلرنی باشلهگن.
اسلام امیرلیگی ساغلیقنی سقلش وزیرلیگینینگ معلوماتی اساسیده، سمنگان و بلخ ده بوگون یوز بیرگن زلزلهده، ۲۰ دن آرتیق کیشی اولیب و ۵۳۴ کیشی یرهلنگن.
