غزنی ده نسایی-ولادی بولیمی شفاکارلریدن قطاری، حامله عیاللر آرقهلی تلویزیونی معاینهلر/سونوگرافی اوتکزیلیشینینگ بیر نیاز بولگنیگه تاکیدلب و سلاموطندار گه ایتیشلریچه، حاملهدار عیاللر بیلن بالهلری ساغلیگی اوچون، مذکور طبی معاینهلرنینگ کمیده بیش مرته اوتکزیلیشی ضرور و جدی احتیاج حسابلنهدی. غزنی ده نسایی-ولادی بولیمی شفاکاری محمدعاطف نورینینگ ایتیشیچه، حاملهدارلیک دورهسینینگ باشیدن آخریگچه، بیر عیال اوچون اوچدن بیش مرتگچه سونوگرافی اوتکزیلیشی بیر نیاز بولیب و مذکور معاینهلرنینگ اَیری آیلرده اوتکزیلیشی کیرهک.
مذکور شفاکارنینگ کوپهیتیریشیچه: «حاملهدارلیکنینگ باشیدن آخریگچه، تلویزیونی معاینهلر/ سونوگرافینینگ اوچدن بیش مرتگچه اوتکزیلیشی نیاز دیر. بیرینچی ترایمستر (حاملهدارلیکنینگ باش اوچ آیی)، جنیننینگ تثبیت بولیشی اوچون که حمل بچهدان ایچیده می، حمل نرمال آلینگن می یا-ده بچهداندن تشقیده آلینگن می؛ نورمال می ایمس می، بیزلر بو توغریده معاینهلرنی اوتکزهمیز. ایکینچی ترایمسترده هم معاینهلر اوتکزیلهدی و اوچینچی ترایمسترده هم بعضا جنیننینگ رشد قیلیشی و نرمال بولیشی اوچون قیته تلویزیونی معاینهلر اوتکزیلهدی که توغیشنینگ وقتینی تعیین قیلهمیز.»
بیزلرنینگ «ایکس» ترماغی ده هم تعقیب قیلینگ!
شونینگدیک غزنی ده نسایی-ولادی بولیمی شفاکارلریدن باشقه بیری محمداشرف صاحبزادهنینگ ایتیشیچه، مذکور معاینهلر اوتکزیلیشی آنهلر اوچون هیچ قندهی قیینچییگی بولمهی و حاملهدار عیاللر ساغلیگی اوچون نیاز دیر. صاحبزادهنینگ کوپهیتیریشیچه: «تلویزیونی معاینهلرنی التراسوند دیهدیلر. بو ماشینلرده ۲۰ مگاهرتزدن یوقاری موجلر تولید بولهدی. انه شوو سبب، بیزلر و سیزلرگه هیچ قندهی قیینچیلیگی یوق. طبابتده هیچ نرسه یوز فایز ایمس، بیراز قیینچیلیگی بولیشی ممکن. حاملهدارلیک جریانیده بیرینچی ترایمستر، ایکینچی ترایمستر و اوچینچی ترایمسترنینگ باشیده حد اقل اوچ مرته سونوگرافی بولیشی کیرهک. بیللی بیر موضوع که هر نرسهده افراط بولسه، تاثیری بولیشی ممکن.»
سونوگرافی اوتکزیلیشی اوچون غزنی شهرینینگ خصوصی کلینیکلریدن بیریگه بارگن بو شهر یشاوچیسی بولمیش کریمهنینگ ایتیشیچه، سونوگرافی اوتکزیلیشی او باشقه حاملهدار عیاللر اوچون مهم بولیب و مذکور معاینهلر توغریسیده اوتگنگه قرهگنده اهالی آگاهیلیگی کوپهیگن. اونینگ کوپهیتیریشیچه: «تلویزیونی معاینهلر جودهیم یخشی دیر. اوتگنلرده اهالی اونچه بیلمهیدی، حاضر بیلهدیلر و کیلیب تلویزیونی معاینه قیلدیرهدیلر؛ لیکن اوزاق حدودلرده امکانیتلر آز دیر. چقهلاق جنسیتی هم بیللی بولهدی و قیینچیلیگی بولسه او هم بیللی بولهدی و آدم بیلهدی. تلویزیونی معاینه قیلیشلری کیرهک و شونینگدیک شفاکاردن مصلحت آلیشلری هم کیرهک.»
بیزلرنینگ فیسبوک صحیفهمیزگه باش اورینگ!
مذکور ولایتدهگی عیاللردن باشقه بیری لطیفهنینگ ایتیشیچه، سونوگرافی اوتکزگنی سبب، بالهسینینگ کسللیگی بیللی بولگن که بو کسللیک سونوگرافی اوتکزیش و دارو آلیش بیلن یخشی بولگن. اونینگ ایتیشیچه: «ایکینچی بالهمده تلویزیونی معاینه اوتکزگنیمده، شفاکار چقهلاق رشدی ضعیفراق دیدی، نیچه قلم دارو بیردی. بیر آیدن کیین بارگنیمده قیینچیلیک بیراز یخشی بولگن ایدی. تلویزیونی معاینهلر بولمهگنیده، چقهلاغیمنینگ توشیشی یا-ده توییب آوقتلنمسلیگی ممکن ایدی؛ لیکن دایم تلویزیونی معاینهلرنی اوتکزهمن و هر بیر آنه اوچون بو ضرور دیر.»
ایتیش کیرهک که، تومنلر بویلب ستندرد دوالنیش امکانیتلر یوقلیگی و عایلهلر آرهسیده قشاقلیک، حاملهدار عیاللرنینگ آزراق سونوگرافی اوتکزیشلریگه سبب بولگن.
