واشنگتن و کییف بیر نیچه آیگه چوزیلگن دیپلماتیک تارتیشوولردن کېین اوکرایننینگ فایدهلی قزیلمهلرینی تصرف اېتیشگه دایر شرطنامهنی امضالهدی.
۳۰-اپریل کونی امضالنگن کېلیشوو دایرهسیده، اوکرایننی تېکلش بوییچه سرمایه یاتقیزیش بیر صندیق تشکیل اېتیلهدی.
امریکا مالیه وزیرلیگی حجت امضالنیشنی جمهور باشلیغ دونالد ترامپنینگ «اېرکین و مستقل اوکرایننی قۉللب-قوتلش گه متعهدلیگی دیه تلقین قیلگن.
«دویچه وله» یېتکرمهسی بیلن صحبتلشگن اوکراین تحلیلچیلری، بیتیم بارهسیده ایکّی گروه گه ایلنگن. بیر گروه تحلیلچیلر ترامپ ماموریتی بیلن تیل تاپیشوو دیپلماتیک یوتوق دیب بهالهگن. باشقه بیر گروه تحلیلچیلر اېسه، امریکا اوکرایننی توزاققه توشیردی، دیگن فکرده.
قید اېتیش جایز که، حجت اول-باشده ریجهلشتیریلگنیدیک، جمهور باشلیغلر، وزیرلر تامانیدن معقوللنگن. بیتیمگه امریکا مالیه وزیری اسکات بسنت همده اوکراین باش وزیری اورین باسری و اقتصادیات وزیری یولیا سویریدنکو امضا چېکّن.
بیزلرنینگ فیسبوک صحیفهمیزگه باش اورینگ!
حجت گه موافق، واشنگتن و کییف اوکرایننی تېکلش و سرمایهلر جلب اېتیش بوییچه قۉشمه جغرمه توزهدی. اوکراین حدودیدهگی برچه فایدهلی قزیلمهلر کییف اختیاریده قالهدی جمغرمه اېسه ۵۰/۵۰ تمایلی اساسیده ایشلهیدی، یعنی باشقرووده هم، فایدهده هم تامانلر تېنگ آواز گه ایگه بولهدی.
تحلیلچی ایلیا نسخدوفسکی فکریچه، امریکا بیلن بیتیم اوکراین اوچون مهم اهمیت کسب اېتهدی. «بیز بایلیکلریمیزدن آلگن درآمدنینگ بیر قسمینی امریکا گه بیرهمیز، بونینگ عوضی گه حربی، مالیهوی کمک و امریکا سرمایهلرینی آلهمیز. سرمایه صرفینی نظارت قیلهیاتگنیگه امین بولگن امریکالیکلر اوکراین اقتصادیاتیگه ېنهده کوپراق سرمایه کېریتهدی.»
اوکرایننینگ سابق اقتصادیات وزیری، حاضرده کییف اقتصادیات مکتبی رهبری تیموفی میلوانوف هم بیتیمنی ایجابی بهالهگن. اونینگ ایشانچی گه کوره: «بو-اوکراین اوچون اولکن سیاسی دیپلماتیک غلبه. بو ترامپ گه ایچکی سیاسی غلبه روحینی بیرهدی و بونینگ آرتیدن اوکراین گه مناسبت ېنهده ایجابیلشهدی. اوکراین بیتیم دایرهسیده اۉز منفعتلرینی حمایه قیله آلهدی. همکار تاماننینگ اوکراین گه قویگن یوحاللرچه طلبهلری، کوچلی باسیملر گه قره مهی بیکار بولهدی.»
اما، باشقه گروه تحلیلچیلر بیتیمده اوکراین اوچون خوفسیزلیک کفالتی حقیده بیرار بند یوقلیگینی تنقید قیلماقدهلر. حال بو که، جمهور باشلیغ ولودیمیر زلنسکی فایدهلی قزیلمهلرنی تصرف اېتیش عوضی گه امریکا اوکراین گه خوفسیزلیک بارهسیده کفالت بیریشی لازملیگینی طلب قیلیب کېلهیاتگندی.
بیزلرنینگ «ایکس» ترماغی ده هم تعقیب قیلینگ!
«بیتیم سیاسی حرکتده اېکنینی توشینیش کېرهک. بو-امریکا بیلن مناسبتلرنی ینگیلش گه اورینیش یولیدهگی قدم. اما اونده خوفسیزلیک کفالتی کوزده توتیلمهگن و بو اوکراین اوچون جدی معما،» دیب حسابلهیدی جهان سیاستی انستیتوتی مدیری، یوگنی ماگدا.
اونگه کوره، اوکراین اولراق خلقارا همکارلر بیلن امضالهگن خوفسیزلیکّه عاید بیتیملر امریکا بیلن توزیلگن شرطنامهدن منفعتلیراق دیر.
تأکیدلش جایز که، آق اوی ماموریتی اوکراین گه فایدهلی قزیلمهلر گه عاید بیتیم امضالش بارهسیده کوچلی باسیم اوتکزیب کېلدی. جملهدن جمهور باشلیغ ترامپ امریکا اوکراین گه اوروش باشلنگنیدن بویان ۳۵۰ میلیارد دالر کمک بیرگنینی اېتیب، کییف حکومتیدن فایدهلی قزیلمهلر آرقهلی ۵۰۰ میلیارد دالر خساره جبرانی قیتریشنی طلب قیلدی.
جمهور باشلیغ زلنسکی اېسه امریکا اوکراین گه ۳۵۰ میلیارد دالر اېمس، بلکه ۱۰۰ میلیارد دالر بیرگنی، اونی هم قرض اېمس، خرهجت صفتیده اجرهتگنینی بیلدیردی. «مین اون اولاد اوکراینلیکلر ییلکهسیده یوک بولهدیگن بیتیمنی امضالمهی من،» دیه واشنگتن تکلیف اېتگن اېلک حجت گه امضا چېکیشدن باش تارتدی زلنسکی.
اول خبر بیرگنیمیزدیک، واشنگتن و کییف اورتهسیده فایدهلی قزیلمهلر گه دایر بیتیم امضالش ریجهلشتیریلگن آق اوی ده اوچرهشوو، ترامپ و زلنسکینینگ مثلی کوریلمهگن دیپلماتیک ضدیت بیلن یکونلنگندی.
