پروان ولایتی سونگی ییللر جریانیده ایکینچیلیک بولیمیده بیر قطار قیینچیلیکلر بیلن روپهره بولگن. سیر حاصللی ییرلر کمهیگنی، اقلیم اوزگریشلری، سوو تنقیصلیگی و صفتلی اوروغلردن فایدهلنه آلمسلیک، بو ولایت دهقانلرینی جدی قیینچیلیکلر بیلن روپهره قیلگن.
شوندهی بیرحالده، لابراتوارلر و تدقیقات مرکزیلریده ایشلب چیقریلهدیگن اصلاح بولگن اوروغلرنینگ کیلتیریلیشی، ایکینزارلرده محصوللر کوپهیشی توغریسیده ینگی امیدنی یرهتگن. مذکور اوروغلر قوروقچیلیک و اوسیملیک آفتلری برابریده چیدملی بولگنی سبب، زراعتی تولیدلر آشیشی و آزیق-آوقت امنیتی تامینلنیشیده مهم اورینگه ایگه بوله آلهدی.
شو بیلن بیرگه، اولردن فایدهلنیش قیمتلیگی و دهقانلرنینگ ایشلب چیقرووچی شرکتلر گه قرهملیگی، بومی ایکینلرنینگ خیلمه-خیللیگی کمهیشی و یشش محیط تأثیری عاقبتلری بارهسیده خواطر بیلدیریلگن.
بیزلرنینگ «ایکس» ترماغی ده هم تعقیب قیلینگ!
افغانستان ده اصلاح بولگن اوروغلر ایشلب چیقریلیش کمپنیهلر ملی اویوشمهسی باشقروو کینگهشی اعضاسی و مذکور کمپنیهلردن بیرینینگ باشلیغی عبدالقاهر رباطیگه کوره، ییلده ایکینچیلیک وزیرلیگینینگ ستندردلری اساسیده کوپینچه اصلاح بولگن اوروغ ایشلب چیقرهدیلر. «ییلده ایکینچیلیک وزیرلیگی ستندردلری اساسیده کوپینچه اصلاح بولگن اوروغ ایشلب چیقرهمیز. پروان ولایتی و ییترلی سوو منبعلریگه ایگه بولگن تومنلرده ۱۰۰ هکتاردن آرتیق ایکین آستیده بولگن ییریمیز بار. ایکهدیگنیمیز اوروغلر بوغدای، سویابین، ماش و پیاز دیر. اوروش تولید بولیش باسقیچلریدن برچهسی زراعت وزیرلیگینینگ تصدیقلنگن معیارلری اساسیده عملگه آشیریلهدی، بیراق بو توغریده اینگ بویوک قیینچیلیگیمیز بیللی بازار یوقلیگی دیر. ملی و خلقارا نهادلر، بیزلردن تعیینلنگن قیمتگه اوروغنی ساتیب آلهدیلر و اونی تیکین دهقانلر اختیاریگه قویهدیلر.»
شوندهی بیرحالده، دهقانلردن قطارینینگ ایتیشلریچه، محلی اوروغلرگه نسبت مذکور اوروغلر قیمتی یوقاری بولیب و ایشلب چیقریلهدیگن کمپنیهلرگه تیگیشلی بولیش، اوزون مدتده دهقانلرنینگ جبرلنتیریشی ممکن.
ییللردن بیری محلی اوروغدن فایدهلنهدیگن دهقانلردن نذیراحمدنینگ ایتیشیچه، قولگه کیلتیرهدیگن محصول یالغیز سکیز کیشیلیک عایله خرهجتینی تامین قیله آلهدی. «کمپنیهلر آرقهلی بیریلهدیگن اصلاح بولگن اوروغلر جودهیم قیمت دیر. دهقانلر بو اوروغلرنی آلیشدن کیین ایکینچیلیک خرهجتینی تولدیره آلمهیدیلر. یاوای اوتلرنی کنترول قیلیش اوچون کود و دارو قیمتی کوپ دیر. محصول تولید قیلگنیمیزده، ساتیلیش اوچون بازار یوق.»
لیکن اصلاح بولگن اوروغلردن فایدهلنیب و یخشی حاصل قولگه کیلتیرگن دهقانلردن غلامسخینینگ ایتیشیچه: «اوشبو بوغدای، آفتلر برابریده یخشی چیدملیدیر؛ بیراق ساتیلیش بازار یوقلیگی و اوروغلرنینگ یوقاری قیمتی قیینچیلیکی یرهتهدی. دولت و اسلام امیرلیگیدن هر بیر ولایت و تومنده ساووقخانه قوریشنی ایستهیمیز که محصوللریمیز ضایع بولمهسین.»
ایکینچیلیک بوییچه بیلرمانلرینینگ اورغولشیچه، اصلاح بولگن اوروغلردن فایدهلنیشنینگ تخصصی تعلیملر، مالی آسایشتهلیکدن دهقانلرنینگ فایدهلنیشی و فنی مصلحتلر بیریلیشی بیلن بیرگه بولیشی کیرهک که بو رقم، اولر عایله اقتصادی و یشش محیط گه زیان ییتیشتیرمسدن اوشبو اوروغلردن فایدهلنسه. شونینگدیک محلی اوروغلر سقلهنیشی و اولرنینگ اصلاح بولگن اوروغلر بیلن قوشیلیشی اوچون تدقیقاتی برنامهلر دیزاینلنیب و عملگه آشیریلیشی توصیه بولهدی.
ایکینچیلیک بیلرمانی ذبیحالله فریدنینگ ایتیشیچه، زراعتی تعلیملر و دولتنینگ قوللب-قوتلشی بو جریان یخشیلنیشیده اساسی اورینگه ایگه بولیب و ایکینچیلیک رواجلنیشی سیاستلریده اصلی بولیم صفتیده نظرگه آلینیشی کیرهک.
بیزلرنینگ فیسبوک صحیفهمیزگه باش اورینگ!
اونینگ کوپهیتیریشیچه: «اوشبو اوروغلر کوپ حاصل بیرهدی، آفتلر برابریده چیدملی دیر و قیین محیط وضعیتیده هم یخشیراق دوام قیلهدی. دارو و کود فایدهلنیشی کمهیهدی و عایلهلرنینگ آزیق-آوقت امنیتی کوچلنهدی. ایچکی مارکیت کوچلنیشی اوچون دهقانلرگه تعلیمی سیمینارلر بیریلیشی و ایچکی اصلاح بولگن اوروغلر تولیدی کوپهیشی کیرهک.»
بولرگه علاوه، پروان ایکینچیلیک ریاستی زراعتی ایشلری بوییچه آمری نیازمحمد تائب، اصلاح بولگن اوروغلر ترقهتیلیشی و تولید بولیشینینگ دایمی شکلده نظارت بولیشینی بیان قیلیب و بو اوروغلردن دهقانلرنینگ فایدهلنیشگه تشویق قیلگن. «پروان ایکینچیلیک ریاستی، اصلاح بولگن اوروغلر صفتی کنترول بولیشیده مهم رولگه ایگه دیر. شنتل فایلف اسمی آستیده بیر موسسه هم کیرهکلی سروینی عملگه آشیرگن. ایکینچیلیک ریاستینینگ فنی و مسلکی ایشلاوچیلری تومنلر و مرکزده دهقانلرگه کیرهکلی تعلیمنی بیرهدیلر.»
موجود قیینچیلیکلر بولگنی بیلن، اصلاح بولگن اوروغلر پروان ده ایکینچیلیکنی اوزگرتیریش اوچون فایدهلی فرصت حسابلنهدی. انیق برنامهلی بولیش، دهقانلرگه تعلیم بیریش و فنی همده مالی حمایتلر یرهتیلگنی صورتده، بو اوروغلر محصول و دهقانلر درآمدینینگ سیزیلرلی درجهده کوپهیتیریب و عایلهلرنینگ آزیق-آوقت خوفسیزلیگینی کوچلنتیره آلهدی.
