هر بهار دایکندی ولایتی‌نینگ کوپلب حدودلریده یاغینگرچیلیک و قار ایریشی نتیجه‌سیده سوو آقیملری تاپیله‌دی؛ اما ییترلی سوو امبارلری یوقلیگی سببلی، بو سوونینگ بیر قسمی حدوددن آقیب چیقیب کیته‌دی. یاز کیلیشی بیلن ایسه عینی حدودلرده سوو منبعلری کمه‌یب، دهقانچیلیک، باغدارچیلیک و چارواچیلیک اوچون سوو تاپیش قیینلشه‌دی.
دایکندی ولایتی شهرستان تومنیگه قره‌شلی تگاب‌لوره قیشلاغیده، محل یشاوچیلری اوشبو معما گه قرشی کوره‌شیش مقصدیده، «بند مادر» دیب ناملنگن سوو توغانینی قوریش‌نی باشله‌گنلر. محلی اهالی‌نینگ ایتیشیچه، اوشبو توغان‌نینگ بلندلیگی تخمیناً ۴۰ مترنی تشکیل ایته‌دی. لایحه‌نینگ اساسی مقصدی بهارده کیله‌دیگن سوولرنی توپلش و حدود ده‌گی موجود سوو منبعلری‌نینگ بیهوده آقیب کیتیشی‌نینگ آلدینی آلیشدن عبارت.
لایحه کیچیک دهن اوشتران قیشلاغیده جایلشگن بولیب، اونینگ قوریلیشی محلی اهالی، مهاجرلرنینگ یاردمی و قیشلاق اهالیسی‌نینگ همکارلیگی اساسیده عملگه آشیریلماقده. محلی اهالی‌نینگ معلومات‌لریگه کوره، لایحه خره‌جتی تخمیناً ۲۰-۲۵ مینگ افغانی تخمین ایتیلگن.
تگاب‌لوره قیشلاغی اهالیسیدن خداداد پیمان‌نینگ ایتیشیچه، اوشبو توغان قوریلیشی باشلنیشیدن آلدین قورغاقچیلیک و سوو تنقیص‌لیگی حدود ده‌گی زراعت حاصلی، باغ‌لر و سوو منبع‌لریگه سلبی تأثیر کورستگن. اونینگ تأکیدلشیچه، قیش و بهار فصل‌لریده سوو کوپ بولیشیگه قره‌می، اونی سقلش اوچون مخصوص انشاآت بولمه‌گنی سببلی، سوونینگ کتته قسمی حدود دن فایده‌لنیلمسدن آقیب کیتگن.
او شونده‌ی دییدی: «قورغاقچیلیک منطقه‌میزده شونده‌ی درجه‌ده ایدی که قیش و بهار فصل‌لریده عینن توغان قوریله‌یاتگن جای‌ده سوو جوده کوپ بولردی. اما بو سوو، هیچ قنده‌ی فایده‌لنمسدن پست گه آقیب کیتردی. چونکه اوشه پیتده سوو کوپ بولیب، آدملر اوز احتیاجلری اوچون کیره‌کلی مقداردن آرتیق سوودن فایده‌لنه آلمسدی.»
اوشبو توغان‌نی قوریش بوییچه خلق تشبثی فقط مبلغ ییغیش بیلن چیکلنمه‌یدی. محلی اهالی، یاشلر، عیاللر و مهاجرلر لایحه‌نینگ تورلی باسقیچ‌لریده فعال اشتراک ایتماقده.
قیشلاق‌نینگ ینه بیر یشاوچیسی غلام‌حسین دانشورنینگ ایتیشیچه، توغان قوریلیشیدن آلدین قورغاقچیلیک و سوو تنقیص‌لیگی اهالی اوچون کوپلب اقتصادی و تورموش بیلن باغلیق معمالرنی کیلتیریب چیقرگن. اونینگ تأکیدلشیچه، درخت‌لرنینگ قوریب قالیشی و ایکین میدانلری‌نینگ قیسقریشی حدودنینگ یشیل قیافه‌سیگه هم، عایله‌لر اقتصادیاتیگه هم جدی ضرر ییتکزگن.
او شونده‌ی دییدی: «توغان قوریلیشیدن آلدین، قورغاقچیلیک آدملر گه کتته ضرر ییتکزر ایدی و اهالی اوندن اذیت بولردی. اقتصادی معمالر، سوو تنقیص‌لیگی و ایش‌سیزلیک بار ایدی. معمالر جوده کوپ ایدی.»
موجودو قیینچیلیک‌لر گه قره‌می، محلی اهالی توغان قوریلیشی یکونلنگچ، حدود ده‌گی ایریم ییرلرنی ینه ایکین ایکیش اوچون فایده‌لنیشگه قیتریش و سوو تنقیص‌لیگی دوریده سوودن فایده‌لنیش امکانیتینی یخشی‌لشگه امید قیلماقده.
شهرستان تومنی تگاب‌لوره قیشلاغیدن بولگن محمدحسین دادگر، قورغاقچیلیک و سوو منبعلری‌نینگ کمه‌یشی سونگی ییللرده حدود اهالیسی‌نینگ دهقانچیلیک، چارواچیلیک و باغدارچیلیک فعالیتینی جدی قیینچیلیک‌لر گه دچار قیلگنینی ایته‌دی. اونینگ فکریچه، اوشبو توغان‌نینگ قوریب بیتکزیلیشی مینگلب جریب ییرلرنی سووغاریش امکانینی یره‌تیب، اهالی تورموش شرایطینی یخشی‌لشگه خذمت قیلیشی ممکن. او شونده‌ی دییدی: «انشاءالله توغان قوریلیشی یکونلنیب، سوو بیلن تولدیریلسه و فایده‌لنیشگه تاپشیریلسه، مینگلب جریب ییرلر سووغاریش تیزیمی بیلن قمره‌ب آلینه‌دی. بوندن تشقری، انشاءالله اوندن برق ایشلب چیقریش امکانی بوله‌دی.»
بیراق، بونده‌ی کیچیک توغانلر زراعت اوچون سوو تأمینلشدن تشقری، سوو منبعلرینی باشقریش و قورغاقچیلیککه ماسلشیش ده هم رول اوینه‌ی آله‌دیمی؟
سوو و اطراف-محیط بوییچه بیلرمان رضا شاهین‌نینگ ایتیشیچه، بونده‌ی توغانلرده ییر اوستی سوولرینی سقلش سوونینگ توپراققه سینگیشی اوچون کوپراق امکانیت یره‌ته‌دی و اوزاق مدت‌ده ییر آستی سوولری ذخیره‌سی‌نینگ کوپه‌یشیگه یاردم بیریشی ممکن. اونگه کوره: «بونده‌ی توغانلر سوو منبعلرینی باشقریش‌ده جوده مهم رول اوینه‌یدی. اولر یامغیر سوولری و ییر اوستی سوولرینی توپلش آرقه‌لی سوونینگ توپراققه سینگیشی اوچون کوپراق امکانیت یره‌ته‌دی.»
باشقه تاماندن، سوونی سقلش فقط ایکینچیلیک ییرلرینی سوو بیلن تأمینلش دیگنی ایمس. سوونی توغری باشقریش توپراق نملیگینی سقلش، اوسیملیک قاپلمینی مستحکملش و تورلی خیل تیریک ارگانیزملر یششی اوچون قوله‌ی‌راق شرایط یره‌تیشگه هم یاردم بیریشی ممکن.
شو بیلن بیرگه، زراعت بولیمی مسئوللری هم سوو سقلش قووتی‌نینگ آشیشی طبیعی منبعلردن ثمره‌لی‌راق فایده‌لنیش و اهالی اقتصادی فعالیتینی رواجلنتیریش اوچون امکانیت یره‌تیشینی ایته‌دیلر.
دایکندی ولایتی ایکینیچلیک ریاستی مطبوعات مسئولی محمدرسول رسانینگ ایتیشیچه، اهالی زراعت ریاستی و همکار تشکیلات‌لر بیلن بیرگه‌لیکده سوو توغانلرینی قوریش ایریم ایکینچیلیک ییرلریدن قیته فایده‌لنیش امکانینی یره‌تیشی ممکن. او شونده‌ی دییدی: «بو توغانلر سوونی توپلش و اونینگ توپراققه سینگیشینی آشیریش آرقه‌لی اطراف-محیط نملیگینی سقلشگه یاردم بیره‌دی همده یم-یشیل، اوسیملیک‌لر بیلن قاپلنگن حدودلرنینگ شکللنیشی اوچون شرایط یره‌ته‌دی.»
«بند مادر» توغانینی قوریش اوچون اهالی همکارلیک قیلماقده. بو جریان دایکندی ولایتی سونگی ییللرده قورغاقچیلیک و سوو منبعلری‌نینگ کمه‌یشی بیلن یوزمه-یوز کیله‌یاتگن بیر پیتده عملگه آشیریلماقده.
