پروان ولایتیدهگی دهقانلردن قطارینینگ ایتیشلریچه، قیش موسومیده هوا ساووقلیگی، ستندرد ایسیقخانه کملیگی، منظم بازار یوقلیگی و یوقاری ایشلب چیقریش خرهجتلری، قیشده سبزهوات ایکیلیشنی، بو ولایتدهگی اینگ قیین زراعتی فعالیتلردن بیریگه اَیلنتیرگن.
اولرنینگ کوپهیتیریشلریچه، قیشده سبزوات ایشلب چیقریش کوپراق چیکلنیب و سنتی طرزده عملگه آشیریلهدی و محافظتی امکانیتلر یوقلیگی، اولرگه کوپینچه زیان ییتیشتیرگن. مذکور دهقانلرگه کوره، نرسه ایکیلگن ییرلردن کوپ قطاری آچیق فضاده بولیب و هوا ساووقلیگی و ایسیتووچی سیستملر یوقلیگی، محصوللر صفتی کمهیشی گه سبب بولهدی.
پروان ولایتی بگرام تومنیدهگی ایسیقخانهسی بولگن دهقانلردن بیری میرحسننینگ ایتیشیچه: «نعنا، کرم، کاهو، گشنیز و پمیدار کبی نرسهلرنی ایکهمیز. ایسیقخانهمیزنی پلاستیک بیلن یاپهمیز که ایکیلگن نرسهلر موزلنمهسین، لیکن ینه هم اونچه محصول قولگه کیلتیرمهیمیز که بازار گه چیقره آلسک. دونرلر حمایت قیلیب و کتهراق ایسیقخانهلر توزتگنیده، بازارگه محصوللر چیقریشی ممکن.»
شونینگدیک ایسیقخانهسی بولگن دهقانلردن باشقه بیری قاهر رباطی، ایشی توغریسیده صحبت قیلیب و ایتیشیچه: «قیش موسومیده گندنه، نعنا و گشنیز کبی سبزهواتنی ایکهمیز. گاز یا-ده ایسیتغیچ یاقیش و پلاستیک آرقهلی ایسیقخانهنی ایسیق سقلهیمیز. ارگانیک و حیوانی کودلر سبزهواتلر اوچون فایدهلی بولیب و ییرنی ایسیق سقلهیدی. شکرک کبی قارچی کسللیکلر ایسیقخانهدهگی سبزهواتلر اوسیشی برابریدهگی قیینچیلیکلردن دیر. مسئوللر فنی مصلحتلر توغریسیده، کسللیکلرنی نظارت قیلیش بوییچه مامورلرنی تعلیم بیریب و اصلاح بولگن اوروغلرنی بیزلر اختیاریمیز گه تاپشیرسین و شونینگدیک هایبرید اوروغلری کیلتیریلیشی آلدینی آلسین.»
دهقانلرنینگ ایتیشلریچه، ساووق هوا و اوزون مدتلی موزلنیش، ستندرد پلاستیک و ایسیتووچی سیستملر کملیگی، قارچی کسللیکلر و آفتلر کوپهیشی، سرمایه کملیگی و زراعتی قرضهلرگه آزراق قول تاپیش، منظم بازار یوقلیگی و قیمتلرنینگ اوزگریشی، قیش موسومیده پروان ولایتیده سبزهوات ایکهدیگن دهقانلرنینگ اینگ مهم قیینچیلیکلریدن دیر.
شوندهی بیرحالده، ایکینچیلیک ایش بیلرمانلرینینگ ایشانچیگه کوره، قیشده سبزهوات ایکیش هدفلی و دایمی حمایت بولمسدن امکانسیز دیر. ایکینچیلیک و باغدارلیک بوییچه ایش بیلرمان احمدزبیر قاضیزادهنینگ ایتیشیچه: «قیشده بو سبزهواتلرنی ایکماقچین بولسهک، ایسیقگه حرارت بیریلیشی کیرهک. کرم، کاهو و گلپی اوچون تورلی طرزلردن فایدهلنسین. کود بیریش و سووغاریشنینگ نظارت بولیش کبی ایشلری بار که ساووق برابریده اولردن فایدهلنیش کیرهک. ایسیق، نملیک و یاروغلیک بولگنیده، آزراق سووغاریلیش کیرهک.»
باشقه بیرتاماندن، سبزهوات ساتیب آلووچیلر هم، اوشبو ولایتده سبزهواتنینگ بازار گه برقرارسیز شکلده چیقریلیشی و قیمتلر یوقاریلیگیدن شکایت قیلهدیلر. سبزهوات ساتیب آلووچیلردن بیری عربشاه سلیمنینگ ایتیشیچه: «ایسیقخانهلر و یشیلخانهلرنینگ آچیلیشی کیرهک. دولت حمایت قیلسین. بامیه کبی سبزهوات ایسیق موسومده کیلوسی ۴۰-۵۰ افغانی دیر، لیکن قیشده اونینگ قیمتی بیر کیلو تاووق گوشتی گه ییتیشهدی.»
شوندهی بیرحالده، پروان ایکینچیلیک، سووغاریش و چاروهچیلیک ریاستی مسئوللرینینگ ایتیشلریچه، سونگی ییللرده اصلاح بولگن اوروغلرنینگ ترقهتیلیشی، آز مدتلی تعلیمی برنامهلر اوتکزیلیشی، نمایشی فارملر آچیلیشی و تخنیکی مصلحتلر کورسهتیلیشی کبی برنامهلر عملگه آشیریلگن.
اوشبو ریاستنینگ زراعتی ایشلری بوییچه آمری نیازمحمد تایبگه کوره: «پروان ولایتینینگ سبزهوات تولیدلری توپلمی ۱۷۹ مینگدن آرتیق متریک تُن گه ییتیشهدی. دهقانلرنینگ ستندرد طرزلرنی بیلیش سطحی ۷۰ فایز تیکشیریلگن. سبزهواتلردن ۵۰ فایزی ولایتنینگ ایچکی بازارلریگه صارد بولهدی.»
ایش بیلرمانلر و دهقانلرنینگ اورغولشیچه، دولت و همکار نهادلرنینگ مالی حمایتی بیلن ستندرد ایسیقخانهلر کوچهیشی، عملی تعلیملر آشیریلیشی، مناسب قیمت بیلن زراعتی نهادلر یرهتیلیشی، ساووقخانهلر، پاکتلنیش مرکزلر و منظم بازارلر آچیلیشی، پروان ولایتیده قیش سبزهواتلری ایشلب چیقریلیشینی کوچلنتیریب، ایش فرصتلرینی یرهتیب و وارداتی محصوللرگه بازارنینگ تیگیشلی بولیشینی کمهیتیره آلهدی.
