سونگی ییللرده، غزنی استه-سیکین اقلیم اوزگریشلری تاثیری آستیده قالیب و سوو تاشقینلری یوز بیریشی کوپهیشی، اوشبو ولایت مرکزی و تومنلریده کوپینچه عایلهگه زیان ییتیشتیرگن. مرکز حدودلریده «غیب قلندر، شهرک حکیم سنایی، خیرآباد، دهخدیداد، پیرزاده، قلعهی امیر محمدخان و توحیدآباد» منطقهلری همده تومنلرنینگ اَیریم بولیملری، نیچه مرته هلاکتلی سوو تاشقینلرگه گواه بولگن دیر.
سوو تاشقینلردن جبرلنگن اوشبو منطقه یشاوچیلریدن قطاری، اقلیم اوزگریشلری نتیجهسیده بو وضعیت دوامیگه نسبت خواطر بیلدیریب، جبرلنیش کمهیشی و مذکور بحران یخشیراق مدیریت بولیشی اوچون حکومتنینگ جدی شکلده توجه قرهتیشینی سورهگنلر.
غزنیده سوو تاشقینی خوفی یوقاری حدودلر یشاوچیلریدن بیری فرزادنینگ سلاموطندار گه ایتیشیچه: «زراعتی ییرلریمیز کوپ زیان کورگن. ییریمیز دریا یقینیده و سیل کیلگنیده، حاصللریمیزنی آلیب کیتهدی. بیر مرته قریب اوییمیزنی سیل آلیب کیتگن ایدی. ییرلریمیزنی سقلش اوچون هیچ نرسه قیله آلمهدیک. دولت بیزلرگه هیچ قندهی یاردم بیرمهگن.»
شونینگدیک غزنی شهریده سوو تاشقینی خوفی یوقاری حدودلر یشاوچیلریدن باشقه بیری الفت هاشمینینگ ایتیشیچه: «سونگی پیتلرده نیچه مرته یوز بیرگن جوده خوفلی سوو تاشقینلر سبب، اهالینینگ اویلری و ایکینچیلیک ییرلری اورتهدن کیتدی و حتا اوتگن ییلی بیر ییگیت بیلن بیر باله سوو تاشقینیده اولدی. بو سوو تاشقینی خوفی یوقاری حدود دیر و اهالی کوپ زیان کورگن. حاضرگچه اونچهلیک توجه قرهتیلمهگن. هوا حالتیگه قرهگنده کیلهجکده هم خوفلی سوو تاشقینلر یوز بیریشی ممکن.»
باشقه بیرتاماندن، یشش محیط ایش بیلرمانلرینینگ اورغولشیچه، اقلیم اوزگریشلری عاقبتلری اوزاق مدتگچه دوام قیلیشی ممکن و اونینگ بیلن فایدهلی قرشی کورهش جبرلنهدیگن منطقهلرده عملی ریجهلر و آستقورمه لایحهلری عملگه آشیریلشیگه نیازی بار. اولرنینگ ایشانچیگه کوره، ستندرد کاناللر، نظارت انشاآتلری قوریلیشی و جبرلنگن عایلهلرنینگ قوللب قوتلنیشی، زیانلر کمهیشیده مهم اورینگه ایگه بوله آلهدی.
یشش محیط ایش بیلرمانلریدن حکمتالله حیدرینینگ ایتیشیچه: «سونگی ییللرده اقلیم اوزگریشلری سبب یوز بیرگن سوو تاشقینلر، اهالینینگ جدی قیینچیلیکلریدن بیری صفتیده حسابلنهدی. هر ییلی اهالی جانی و مالی نقطهی نظریدن ضرر کورهدی. قیینچیلیکلر بار؛ سوو تاشقینی یوز بیرگنیده، سرکلر نقلیه واسطهلر یوزیگه یاپیلهدی. دکانلر و اویلر زیان کورهدی. ستندرد کاناللر قوریلیشی و زیان کورگن عایلهلر بیلن همکارلیک بولینیشی کیرهک.»
شوندهی بیرحالده، غزنی ده محلی مسئوللری، سوو تاشقینلر بیلن قرشی کورهش اوچون بیر قطار برنامهلر عملگه آشیریلیشیدن خبر بیرگنلر. بو توغریده غزنی حاکمی سوزلاوچیسی عزتالله سعیدینینگ ایتیشیچه: «سوو تاشقینلر طفیلی زیانلر کمهیشی و یامان واقعهلر آلدی آلینیشی اوچون، تومنلردن قطاریده دیوارلر، کاناللر و سوو توغانلری قوریلگن. سوو تاشقینلری یوز بیرگنی صورتده، غزنی ده اسلام امیرلیگی، حادثهلرگه قرشی کورهش ریاستی، بار امکانیتیدن فایدهلنیب و تیزلیککه زیان کورگن جایلر و قیینچیلیکلر حلی اوچون سعیوحرکت قیلهدی.»
غزنی، مملکتنینگ زراعتی ولایتلریدن بیری صفتیده، مهم سوو منبعلری جملهدن شمالده «سلطان محمود توغانی و شرقده «زنهخان» توغانیگه ایگه دیر. شوندهی بیرحالده، بو توغانلر حوزهلریده سوو تاشقینلر یوز بیریشی، نیچه مرته ایکینچیلر و محل یشاوچیلریگه زیانلرنی ییتیشتیرگن. سونگی ییللرده، اقلیم اوزگریشلری نتیجهسیده اوشبو سوو تاشقینلر میزانی کوپهیب و اونینگ مدیریت بولیشی مذکور ولایتنینگ اساسی قیینچیلیکلریدن بیریگه اوزگرگن.
