سمنگان ولایتی خُلم تومنیدهگی یشاوچیلر و دهقانلردن قطاری، قوروقچیلیک و سوو تنقیصلیگیدن خواطر بیلدیریب و ایتیشلریچه، قوروقچیلیک نهفقط انار باغلری و میوهلر، بلکیم بو منطقه اهالیسینینگ اقتصادیگه هم تاثیر قویگن.
سمنگان ولایتی خُلم تومنیدهگی باغدار و انار ساتووچیلردن ابراهیم، انار باغلری حاصلاتینینگ یریم گه ییتیشگنینی بیان قیلیب و ایتیشیچه: «ییلده ایکی مینگ سیر انار حاصل آلهر ایدیک، بیراق بو ییل ایسه حاصلاتیمیز قریب بیر مینگ سیر گه ییتیشگن. قوروقچیلیک باغلرنینگ قوریشیگه سبب بولگن. اوتمیشده تنگی تاشقرغان اناری سوولی و جوده یخشی ایدی، حاضر ایسه قوریق و میوهسیز دیر.»
بیزلرنینگ فیسبوک صحیفهمیزگه باش اورینگ!
خُلم تومنی «ایشانداکی» قیشلاغیدهگی باغدارلردن باشقه بیری محمدانور، سوو منبعلری وضعیتی و قوروقچیلیک تاثیریدن خواطر بیلدیریب و ایتیشیچه: «یاغینگرچیلیک یوق و برچه باغلر قوریگن. زلزلهدن کیین سوو اریقلری بوزیلدی و اولرنینگ قیته قوریلیشی اوچون باغدارلرده امکانیت یوق. یالغیز دولت یا-ده موسسهلر بو توغریده همکارلیک قیله آلهدی.»
شوندهی بیرحالده، سمنگان ولایتی خُلم تومنی یشاوچیلری، اقلیم اوزگریشلری و قوروقچیلیک تاثیرلریدن بو منطقه اهالیسینینگ قریب ۱۵ ییلدن بویان زیان کوریشینی بیان قیلیب، بیر زمانلر منطقه بویلب تنگی تاشقرغان میوهلرینینگ شهرت گه ایگه بولگنینی ایتگنلر.
مذکور تومن یشاوچیلریدن حسیباللهنینگ ایتیشیچه، اوتگن ییللرده محصوللرنینگ موزلهنیشی و کیتمهکیت قوروقچیلیک باغدارلیک محصوللرینی جدی شکلده کمهیتیرگن. «سونگی ۱۵ ییلده اهالی قوروقچیلیکدن تاثیرلنگن. سونگی اوچ ییلده بو تومنده اونچهلیک انار تاپیلمهیدی. بو ییل نسبتا یخشیراق حاصل بولگن ایدی که زلزله جدی قیین{یلیکلرگه سبب بولدی. زلزلهدن کیین جهاننما اریغی کانالی کیسیلدی و مذکور تومننینگ اصلی دریاسیده حتا ۱۰ فایز سوو هم یوق.»
خُلم تومنی اورینباسری زینالله بخاری، اهالی حیاتیده باغدارلیک و ایکینچیلیک اهمیتیگه اشاره قیلیب و ایتیشیچه، قوروقچیلیک اهالینینگ یگانه درآمد منبعسیگه سلبی تاثیر قویگن. «خُلم تومنی اهالیسی کوپراق باغدارلیک و ایکینچیلیک آرقهلی حیات خرهجتلرینی تامین قیلهدیلر. کیتمهکیت قوروقچیلیکلر و سونگی زلزله، سوو منبعلری و اولرنینگ حاصللریگه زیان ییتیشتیرگن. موسسهلردن قطاری همکارلیک توغریسیده تیارگرلیک بیلدیردیلر؛ بیراق دولتنینگ جدی شکلده حمایت قیلیب و برنامهلی بولیشیگه نیاز بار.»
بیزلرنینگ «ایکس» ترماغی ده هم تعقیب قیلینگ!
باشقه بیرتاماندن، سمنگان حاکمی اورینباسری دادخدا خادم، بو ولایتده قوروقچیلیک انقراضی و دهقانلرگه اونینگ عاقبتلرینی تصدیقلب و ایتیشیچه: «نهفقط سمنگان بلکیم مملکتنینگ بیر قطار ولایتی حتا کابل، قوروقچیلیک تهدید آستیده دیر. بو قیینچیلیک حلی اوچون مناسب ییچیم یوللر تاپیلیشی مقصد سعیوحرکت قیلماقدهمیز.»
ایکینچیلیک ایش بیلرمانلرنینگ ایشانچیگه کوره، قوروقچیلیک و زلزله زیانلری خُلم تومنینینگ سووغاریش تیزیمینی قیینچیلیک بیلن روپهره قیلیب و حاصللر کمهیشی خوفینی کوپهیتیرگن. اولرنینگ اورغولشیچه، کوپینچه زیانلر آلدینی آلیش اوچون اریقلر قیته قوریلیشی و باغدارلرگه تیزلیککه یاردم بیریلیشی ضرور دیر.
