فاریاب ده بیرینچی مرته حاملهدارلیکنی تجربه قیلهدیگن عیاللردن قطاری، عایلهوی قوللب-قوتلنیش یوقلیگی، ساغلیقنی سقلش خذمتلردن فایدهلنه آلمسلیک و مناسب آوقتلنمسلیکدن شکایت قیلهدیلر. اولرنینگ ایتیشلریچه، ییترلی آزیق-آوقت، دوالنیش خذمتلر و آگاهیلیک یوقلیگی سبب، حیاتلرینینگ اوشبو حساس باسقیچینی کوپ قیینچیلیک بیلن اوتکزگنلر.
مذکور عیاللردن بیری نظیفهنینگ ایتیشیچه، اقتصادی قیینچیلیک، ساغلیقنی سقلش خذمتلر یوقلیگی و ییترلی شکلده آوقتلنمسلیک، اینیقسه بیرینچی حاملهدارلیکده حاملهدار عیاللرنینگ روپهره بولهدیگن اینگ مهم قیینچیلیکلردن حسابلنهدی.
نظیفهنینگ کوپهیتیریشیچه: «افغانستان ده قشاقلیک کوپ دیر؛ عیاللر ساغلیق خذمتلر، ییترلی آوقت و بو مسئلهلردن فایدهلنه آلمهیدی. انه شوو سبب بیرینچی مرته حاملهدارلیکنی اوتکزگن بیر عیال صفتیده ایته آلهمن که حقیقتا بو دوره قیینچیلیکسیز ایمس ایدی؛ بیرینچی حاملهدارلیکده آنهلر ساغلیگی قیینچیلیک بیلن روپهره بولهدی و بیرینچی حاملهدارلیکده آنهلرنینگ اونچه آگاهیلیگی هم بولمهیدی.»
اقتصادی و دوالنیش قیینچیلیگی یانیده، شرم و کمتجربهلیک هم حاملهدارلر عیاللر قیینچیلیگینی کوپهیتیرهدی. فاریاب دهگی اوشبو عیاللردن بیری شگوفهنینگ ایتیشیچه، بیرینچی مرته آنه بولیش حسی جودهیم خاص دیر؛ بیراق ییترلی آگاهیلیکلری یوقلیگی اوچون، اوزلریدن قندهی مراقبت قیلیشنی بیلمهیدیلر.
او، بیرینچی مرته حاملهدارلیگی تجربهسی توغریسیده ایتیشیچه: «بیرینچی مرته حاملهدار بولگنیمده کوپینچه قیینچیلیگیم بار ایدی و اولردن بیری ایسه آگاهیلیک یوقلیگی ایدی که قندهی آوقتلنیشنی بیلمس ایدیم. بیرینچی مرته حاملهدارلیکده عیاللر شرم قیلهدی و بیران کیشیدن هم درست شکلده سوره آلمهیدی.»
بیرینچی حاملهدارلیکدهگی یامان تجربهسی حقیده عیاللردن بیری رقیهنینگ ایتیشیچه، باش آیلرده جدی جسمی قیینچیلیکلر بیلن روپهره بولگن ایکن. «حاملهدار بولگنیمنی بیلدیم، باشده حاملهدارلیک مینی اوچون کوپ قیین ایدی؛ یورهگیم بوزیلهر ایدی و هیچ نرسه ییه آلمس ایدیم و برچه نرسه مینگه یامان تیگگن ایدی. حاملهدارلیکنینگ تورتینچی و بیشینچی آیلریده وضعیتیم جودهیم یامان ایدی.»
فاریاب دهگی نسایی-ولایتی متخصص شفاکاری مارینا سلیمانینینگ ایتیشیچه: «عیاللر بیرینچی حاملهدارلیکده ایرتنگ چاغی ایسیتمه قیلهدیلر؛ هورمونی اوزگریشلری بولهدی؛ اولردن بیری ایسه سینهلری کته بولیشی دیر. چرچهش، تیز-تیز سیماق، یاندهشوولرده تغییر کیلیشی، سیمیزلیک، جنیننینگ رشد قیلیشی بیلن بیرگه قریننینگ کته بولیشی.»
فاریاب دهگی نسایی-ولادی متخصص شفاکارلریدن باشقه بیری شکریه کوشانینگ اورغولشیچه، عیاللر حاملهدارلیک چاغیده، کمیده تورت مرته شفاکار گه باریشلری کیرهک. «حاملهدار بیر عیال حاملهدارلیک چاغیده کمیده تورت مرته شفاکار گه باریشی کیرهک. اوچ آیلیککه قدر شفاکار گه باریشلری لازم که بالهلرینینگ ساغ بولیب و بولمهگنی؛ چقهلاقنینگ بچهدان ایچیده بولیب و بولمهگنی یا-ده باشقه بیران قیینچیلیگی یوقلیگینی بیلسینلر.»
باشقه بیر تاماندن، روانشناسلر، حاملهدارلیک دورهسیده عیاللرنینگ ذهنی و روحی تیارگرلیگی اهمیتی توغریسیده تاکیدلهیدیلر.
روانشناسلردن زکریا بارکزینینگ ایتیشیچه: «بو دورهنینگ مدیریت قیلیش اوچون نیچه یول بار. بیرینچیده بو ییرده مصلحت بیرووچیلر اورنی اهمیتلی؛ چونکه عیاللر اوچون حاملهدارلیک دورهسیدهگی مصلحت فایدهلی بولهدی؛ بیر تاماندن روحی و جسمانی ساغلیق توغریسیده صحبت بولهدی و باشقه تاماندن، بالهلرینینگ جسمانی ساغلیگی توغریسیده گپلهشیلهدی.»
مناسب ساغلیق آستقورمهلر یوقلیگی، مصلحت بیرووچی خذمتلر کملیگی و افغانستاننینگ تورلی منطقهلری اینیقسه فاریاب ده کینگ کولملی قشاقلیک، حامله عیاللر اینیقسه بیرینچی مرته حاملهدارلیکنی تجربه قیلهدیگن عیاللرنی جدی قیینچیلیک بیلن روپهره قیلگن. آوقتلنیش، تعلیمی و ساغلیقنی سقلش خذمتلرنی تامینلش، بو قیینچیلیکلرنینگ کمهیشی و آنه بیلن چقهلاق ساغلیگینی تضمینلشده فایدهلی آدیم بوله آلهدی.
