نوار غزه شمالی و جنوبی منطقهلریگه اسرائیل کوچلرینینگ اویوشتیرگن اینگ ینگی هجوملریده، کمیده ییتی فلسطینلیک قربان بولگن.
الجزیره خبری ترماغینینگ بوگون (۱۳-قوس، پنجشنبه)، گزارش بیریشیچه، غزه شمالیده جایلشگن زیتون حدودیده اسرائیل کوچلرینینگ اوق آتیشی نتیجهسیده، ایکی کیشی قربان بولیب و غزه جنوبیده جایلشگن المواسی کمپیگه اویوشتیریلگن راکته هجومیده ایسه، ۸ و ۱۰ یاشر ایکی باله شامل باشقه بیش کیشی قربان بولگن. شونینگدیک بو هجوم نیچه خیمهده کینگ کولملی یانغین گه هم سبب بولگن.
گزارش اساسیده، اسرائیل هجوملری و آوارهلر کمپیده یوز بیرگن یانغین عاقبتیده، کمیده ۳۲ فلسطینلیک یرهلنیب و اولردن قطاری جدی شکلده کویگن.
حماس بو هجوملرنی «اوروش جنایتی» دیب و واسطهچیلردن آتیشکیسیننی رعایت ایتیش اوچون اسرائیلنینگ مجبور قیلینیشینی سورهگن.
غزه رسمیلرینینگ اعلام قیلیشیچه، اسرائیل کوچلری ۱۰-اکتبرده آتیش کیسیننینگ باشلنگنیدن حاضرگچه، ۹۵۰ دن آرتیق اونی بوزگن که نتیجهده ۳۶۰ فلسطینلیک قربان بولیب و ۹۲۰ دن آرتیق کیشی یرهلنگن.
فلسطین ساغلیقنی سقلش وزیرلیگی معلوماتی اساسیده، ۲۰۲۳-ییل اکتبرده غزه گه قرشی اسرائیل هجوملری باشلنگنیدن حاضرگچه، فلسطینلیک کمیده ۷۰ مینگ ۱۱۷ کیشی قربان بولیب و ۱۷۰ مینگ ۹۹۹ کیشی یرهلنگن.
