ایران بیلن امریکا و اسرائیل اورتهسیده دوام ایتهیاتگن اوروش ۱۶ کونگه کیرگچ، اسرائیل اردوسی ایران راکتهلرینی هواده یوق قیلیش اوچون «هوا مدافعه تیزیمی» ییتیشمسلیگی بیلن دوچ بولگن. خلقارا ییتکرمهلرنینگ معلوماتیگه کوره، ایران بیلن امریکا و اسرائیل اورتهسیده اوروش دوام ایتماقده ایکن، اسرائیل عملدارلری امریکا رسمیلریگه بالستیک راکتهلرنی یوق قیلیش اوچون هوا مدافعه تیزیمی ییتیشمسلیگی بیلن دوچ ایکنلرینی ایتگن.
ملی مدافعه وزیرلیگینینگ اعلام قیلیشیچه، اسلام امیرلیگی مدافعه کوچلری دیورند چیزیغی حدودلریده پاکستان اردوسینینگ بیر پوستهسینی تصرف قیلگن که نتیجهده، اوشبو مملکتنینگ ۱۴ عسکری هلاک بولگن.
لبنان ساغلیقنی سقلش وزیرلیگینینگ اعلام قیلیشیچه، اسرائیل آرقهلی اوشبو مملکتنینگ بیر قطار بولیملریگه اویوشتیریلگن هجوملر نتیجهسیده قربان بولگنلر سانی، ۷۷۳ کیشی گه ییتیشگن.
عراق پایتختی بغداد شهریده امریکا ایلچیخانهسی ینه بیر مرته ایران تامانیدن نشانگه آلیندی. ایران فارس آژانسی، بوگون (۲۳ حوت/۱۴ مارچ، شنبه) ایکس صحیفهسیده بیر بیانیه ترقهتیب، ایران بغداد شهریده امریکا ایلچیخانهسی گه هجوم قیلگنینی بیلدیردی. بیانیه گه کوره، اوشبو هجومده امریکا ایلچیخانهسی مدافعه تیزیمی یوق قیلینگن.
تورکیه جنوبیده ناتونینگ «اینجرلیک» هوا پایگاهسیده خوف قونغیراقلری چلیندی.
اسلام امیرلیگی ملی مدافعه وزیرلیگی، مملکت هوا کوچلری پاکستاننینگ حربی استراتیژیک و مهم مرکز همده آست قوریلمهلرینی نشانگه آلگنیدن خبر بیردی. اوشبو وزیرلیک، بوگون (۲۲ حوت/۱۳ مارچ، جمعه) ایکس صحیفهسیده بیر بیانیه ترقهتیب بو هجوملر پاکستاننینگ افغانستان ایریم حدودلریگه اویوشتیرگن هجوملریگه جواب، توشدن آلدین عملگه آشیریلگنینی بیلدیرگن.
اسرائیل اردوسی، ایران غربی حدودلری و اوشبو مملکت پایتختی تهران شهریده ۲۰۰ دن آرتیق هدفنی نشانگه آلگنلرینی بیلدیردی.
پاکستان جنگری اوچاقلری، قندهار ولایتی هوا قونالغهسی یقینیده کامایر هوایی خصوصی شرکتی گه تیگیشلی «تیل انباری»نی نشانگه آلگن.
اسلام امیرلیگی سوزلاوچیسی ذبیحالله مجاهد، پاکستاننینگ اوتگن کیچهدهگی «تجاوز و جنایتلری» جوابسیز قالمسلیگی حقیده آگاهلنتیردی. مجاهد، بوگون (۲۲ حوت/۱۳ مارچ، جمعه) ایکس صحیفهسیده بیر بیانیه ترقهتیب پاکستان جنگری اوچاقلری کابل، قندهار، پکتیا، پکتیکا و باشقه بعضی حدودلرده تینچ اهالی اویلرینی نشانگه آلگن و اونینگ نتیجهسیده، عیاللر و بالهلر «شهید» بولگنینی بیلدیردی.
کابل امنیه قوماندانلیگی سوزلاوچیسی خالد زدران، سلاموطندار بیلن صحبتده، ۲۱ حوت/۱۲ مارچ، پنجشنبهدن جمعه گه اوتر کیچه، پاکستان جنگری اوچاقلرینینگ کابل شهری ۲۱ امنیتی حوزه حدودلریگه قرهشلی، پلچرخی «۲۴ گذر» منطقهسیده، یشش بیر اوینی نشانگه آلگنینی بیلدیردی.
اسلام امیرلیگی عملدارلری، پاکستان حربی کوچلرینینگ توپخانه و هاوان آتیشلری عاقبتیده خوست ولایتیده ۴ تینچ اهالی اولیب و اوچ باله یرهلنگنیدن خبر بیردیلر.
الجزیره، بوگون (۲۱حوت/ ۱۱ مارچ، چهارشنبه) حزبالله لبنان ایران اویغونلیگی بیلن، اسرائیلنینگ شمالی حدودلریگه ۱۰۰ راکته آتگنیدن خبر بیردی.
ناروی مهاجرلر کینگشی، پاکستان و اسلام امیرلیگی اورتهسیدهگی توقنشوولر، مینگلب عایلهنی اوز اوی-جایلرینی ترک ایتیش گه مجبور قیلگنینی بیلدیردی. اوشبو اداره، ۲۰ حوت/۱۱ مارچ، چهارشنبه کونی ایکس صحیفهسیده بیر بیانیه ترقهتیب، توقنشوولر طفیلی آواره بولگنلر گه نقدی یاردم کورسهتماقدهلیگینی یازگن.
بیرلشگن ملتلر تشکیلاتینینگ افغانستان بولیمی بالهلرنی قوللب-قوتلاوچی صندیغی (Save the Children)، اسلام امیرلیگی و پاکستان اورتهسیدهگی توقنشوولرده مینگلب باله آواره بولیب و بو صندیقنینگ ایشلری گه سلبی تأثیر قویگنینی بیلدیرگن.
فراه امنیه قوماندانلیگی سوزلاوچیسینینگ ایتیشیچه، اوشبو ولایت گلستان تومنیده خوفسیزلیک کوچلری آرقهلی بیر ایرکک تورموش اورتاغینی اولدیریش عیبی بیلن قولگه آلینگن.
«عراق اسلامی مقاومتی» گروهی، اوتگن ۲۴ ساعت ایچیده عراق و اطراف حدودلرده امریکا کوچلریگه قرشی ۳۱ ته هجوم اویوشتیرگنینی بیلدیردی. الجزیره، بوگون (۲۰ حوت/۱۱ مارچ، چهارشنبه) ترقهتگن گزارشیده، بو گروه ایران بیلن یقین علاقهده ایکنلیگینی معلوم قیلگن. عراق اسلامی مقاومتی، سونگی ۱۲ کون دوامیده امریکا حربی کوچلریگه قرشی جمعی ۲۹۱ هجوم اویوشتیرگنینی قوشیمچه قیلگن.
