اهالی: یلغان ایته‌دیگن سیاستچی، مفت هم ارزیمه‌یدی
جمهورلیک ریاستی بیرینچی اورین باسری امرالله صالح، اوتگن کیچه خصوصی میدیالردن بیری بیلن خاص صحبت اوتکزگن. اوشبو صحبت‌لر اجتماعی ترماقلر فعاللری و حکومت تنقیدچی‌لری نینگ جدی واکنش‌لری بیلن روپه‌ره بولگن. امرالله صالح، حامد کرزی نینگ دوریده مملکت ملی خوفسیزلیک ریاستی باشلیغی صفتیده وظیفه انجام بیرگن. او، ۲۰۱۴- ییل سیلاویده عبدالله عبدالله نینگ حمایتچی‌لریدن ایدی، بیراق جناب عبدالله و غنی آره‌سیده کیلشوو صورت تاپگنیدن سونگ، حکومت‌گه قوشیلمه‌گن.
جناب صالح، ملی بیرلیک حکومتی باشلنگنیده حکومت نینگ جدی تنقیدچی‌لریدن ایدی. او، هردایم اشرف غنی و تیمی نی متعصب و ناکاره خطاب قیلگن.
مملکت یازووچی‌لریدن بولمیش ملک ستیز، جناب صالح نینگ بیانات‌لری خصوصیده یازیشیچه، صحبت‌لری بیر سوزلاوچی نینگ صحبت‌لریگه آخشه‌ریدی.
جناب ستیز گه کوره، جناب صالح یخشی دیپلومات ایمس، چونکه دیپلوماسی خاص ادبیات ایسته‌یدی و صالح نینگ دیپلوماسی ادبیات بولیمیده تخصصی یوق.
شونینگدیک، اجتماعی ترماقلر فعاللریدن بیرقطاری نینگ ایتیش‌لریچه، جناب صالح قدرت‌گه شریک بولگنیدن سونگ، بوتون وعده‌لرینی ایسدن چیقارگن و حکومت ضعف نقطه‌لرینی توجیه قیله‌دی.
مملکت یازووچی‌لریدن باشقه بیری یعقوب یسنا نینگ ایتیشیچه، امرالله صالح ایچکی ایشلر وزیرلیگی ده سرپرست‌لیگی دوریده حکومت بیرقطار اونملی کیشی‌لرنینگ اوغیرلاوچی‌لر و زوروانلردن حمایت قیلیشی‌نی بیان قیلگن ایدی، بیراق جناب صالح اوشبو کیشی‌لرنی فاش قیلمه‌دی. حاضر ده جناب صالح ارگ و قدرت مرکزیده بارگن، لیکن مملکتده اوغیرلاوچیلیک، زوروانلیک و قتل باشقه زمان‌لرگه قره‌گنده کوپه‌یگن.
اجتماعی ترماقلر فعاللریدن بیری آثار حکیمی نینگ یازیشیچه، امرالله صالح، اشرف غنی نینگ تیمی‌گه قوشیلمسدن آلدین جناب غنی نی متعصب و قوم‌گرا خطاب قیله‌ریدی، بیراق جناب صالح، غنی تامانیدن ایچکی ایشلر وزیرلیگی نینگ سرپرستی صفتیده تعین لنگنیدن سونگ، صالح نینگ فکری اوزگردی و نیچه مدتدن کیین اشرف غنی جمهور ریس و صالح اونینگ اورین باسری بولدی.
اجتماغی ترماقلر فعاللریدن باشقه بیری نبی سلطانی نینگ ایتیشیچه، امرالله صالح قدرت مرکزیده قرار تاپگن و رحمت‌الله نبیل اویگه اولتیرگن، لیکن ایکی سی هم یالغیز گپره‌دی.
جناب سلطانی گه کوره، صالح یالغیز جمهور رییس یانیده کورینیش‌نی ایسته‌یدی، حکومت ایچیده یوز بیره دیگن اونملی موضوعلردن خبری یوق و قرار قیلیش اوچون صلاحیت بیریلمه گن.
اجتماعی ترماقلر ایشلاوچیلریدن باشقه بیرقطاری، جناب صالح نینگ طالبان و تروریستی گروهلرگه قرشی بولگن بیللی صحبت لریدن حمایت بیلدیرگنلر. اولرنینگ ایتیش‌لریچه، صالح نینگ استخباراتی بولیمیده تخصصی بار و امنیتی موضوعلرنی یخشی شکلده تحلیل قیله آله دی.
بونده‌ی تحلیللرگه قره‌گنده اهالی حکومت یوقاری مرتبه‌لی رسمی‌لری نینگ مصاحبه‌لری خصوصیده بی فرق قالمه‌یدی و یخشی و یمان سیاستچی‌لرنی بیربیراویدن تفکیک قیله‌دی.
اجتماعی ترماقلر ایشلاوچیلریدن کوپ‌قطاری نینگ جناب صالح دن بولگن تنقیدی بو دیر کیم، او قدرت مرکزیده قرار تاپمسدن آلدین هردایم حکومت و حکومتچی‌لرنینگ ایشلریدن تنقید قیله‌ریدی. اهالی گه کوره، جناب صالح حاضرده حکومت گه قوشیلگن، حکومت نینگ بوتون یمان ایشلرینی یاشیره‌دی و ملتگه یلغان ایته‌دی.
