بادغیس ولایتیده عیاللردن قطاری، آنه و جنین قانینینگ ماس کیلمسلیگی توغریسیده آگاهیسیزلیک سبب، یامان عاقبتلر بیلن روپهره بولگنلرینی بیان قیلیشلری بیرحالده، بو ولایتدهگی شفاکارلرنینگ آگاهلنتیریب و ایتیشلریچه، آنه و جنین قانی ماس کیلمسلیگی توغرسیده عایلهلردن قطارینینگ ییترلی معلومات گه ایگه بولمسلیگی، آنه و چقهلاق حیاتینینگ خوف آستیگه قویه آلهدی.
بو توغریده ایچکی بولیم متخصصی عبدالناصر بهبودینینگ ایتیشیچه: «قان گروهلرنینگ ماس کیلمسلیگی، بعضا آنتیبادیلر و آنتیژنلر فرقلیگی سبب اورته گه کیلهدی. اونینگ اصلی سببلریدن بیری Rh فکتورینینگ مثبت یا-ده منفی بولیشیدهگی فرق دیر. آنه Rh منفی و آته Rh مثبت بولگنیده، آنهنینگ تنهسی جنین قانیگه قرشی عکسالعمل کورسهتیشی و جنین اوچون جدی قیینچیلیکلرنینگ یرهتیشی ممکن.»
نسایی ولادی شفاکاری نجیبه رایاننینگ ایتیشیچه، آنه بیلن جنین قانی ماس کیلمسلیگی، جنین اولیمی، چقهلاقنینگ جدی ساریغلمه گه چلینیشی، قانی کملیگی و حتا ناگران بولیشیگه سبب بوله آلهدی. «بو وضعیت بچهدان ده جنین اولیمی، چقهلاقده جدی سریغلمه، قان کملیگی و حتا ناگرانلیگیگه سبب بوله آلهدی. کیینگی حاملهدارلیک دورهلریده خوف کوپهیهدی، لیکن حاملهدارلیک دورهسیده و توغیشدن ۷۲ ساعت کیین Rh پیچکاریسینی آلیش، بو قیینچیلیک آلدینی آلالهدی.»
شونینگدیک نسایی ولادی شفاکارلریدن باشقه بیری معصومه احساننینگ ایتیشیچه، جنین بیلن آنه قانینینگ ماس کیلمسلیگی سلبی عاقبتلری آلدی آلینیشی اوچون، حاملهدار عیاللرنینگ ۱۲-هفتهده قان گروهی معاینه بولیشیگه نیاز بار. «حاملهدارلیک انیقلنیشی و حاملهدارلیکنینگ ۱۲-هفتهسیدن آنهنینگ قان گروهی معاینه بولیشی یوقاری اهمیتگه ایگه دیر. آنهنینگ قان گروهی منفی بولگنی و آتهنینگ قان گروهی مثبت بولگنیده روگام پیچکاریسی اوتکزیلیشی کیرهک. بو مراقبتلر حتا توغیشدن کیین هم دوام قیلهدی که آنه و چقهلاق ساغلیگی سقلنسه.»
شوندهی بیرحالده، بادغیس دهگی عیاللردن قطارینینگ ایتیشلریچه، جنین بیلن آنه قانینینگ ماس کیلمسلیگی توغریسیده آگاهسیزلیک و حاملهدارلیک دورهسی همده اوندن کیین ییترلی مراقبتلرگه توجهسیزلیک، اوزلری و چقهلاقلری اوچون جنیننینگ توشیشی، قان کملیک و جسمی قیینچیلیکلر کبی عاقبتلری بولگن.
بو توغریده بادغیس ولایتیدهگی عیاللردن بیری ثانیهنینگ ایتیشیچه: «بیرینچی بالهم ساغلام ایدی، لیکن نیچه مدتدن کیین اولدی، چونکه قانیم اونینگ قانی بیلن ماس ایمس ایکن. کیینگی حاملهدارلیکده سوتیمنی کیسیب و باشقه سوت بیلن آوقتلنتیردیم که وضعیتلری یخشیراق بولسه.»
نیچه مرته حاملهدار بولیب و چقهلاغی تیریک قالمهگن بو ولایت یشاوچیسی بولمیش تازه گه کوره: «نیچه مرته حاملهدار بولدیم و چقهلاقلریمدن هیچ بیری تیریک قالمهدی. شفاکارلر قانیمنینگ ماس کیلمسلیگینی ایتدیلر.»
شونینگدیک بادغیس یشاوچیسی بولمیش رخشانهنینگ ایتیشیچه: «توی قیلگنیمدن آلتی ییل بولهدی و حاضرگچه بالهم یوق. بیرینچی حاملهدارلیگیمده چقهلاغیم توشدی و شفاکارلر قانیمنینگ جنین قانی بیلن ماس کیلمهگنینی ایتدیلر.»
لیکن ۳۰ یاشر صنمنینگ ایتیشیچه، بیرینچی چقهلاغینی توغیش و آنه بیلن جنین قانی ماس کیلمسلیگی توغریسیده معلومات تاپیشدن کیین، باشقه چقهلاقلری ساغلام شکلده دنیا گه کیلگن. «بیرینچی چقهلاغیم جدی شکلده قان کملیگی بیلن روپهره ایدی. لیکن ایکینچی و اوچینچی بالهلریم ساغلام دنیا گه کیلدی چونکه، قان ماس کیلمسلیگی توغریسیده معلومات تاپیب، مراقبت بولیب و مخصوص دارولرنی آلدیم و بو رقم کیینگی حاملهدارلیگیم ساغلام ایدی.»
شوندهی بیرحالده، بادغیس ولایتی کسلخانه سوزلاوچیسی مصطفا صدیقینینگ ایتیشیچه، حاضرگچه اوشبو کسلخانهده حاملهدارلیک دورهسیده جنین و آنهنینگ قانینی انیقلش خذمتلر یرهتیلمهگن. «حاضر بادغیس ولایتی کسلخانهسیده EPHS خذمتلری پکیجی و حاملهدارلیک دورهسیده جنین بیلن آنه قانینینگ انیقلش خذمتلری یوق.»
ساغلیقنی سقلش بیلرمانلرینینگ اورغولب و ایتیشلریچه، عایلهلرگه جنین بیلن آنهنینگ قانی ماس کیلمسلیکی توغریسیده آگاهیلیک بیریش، توی قیلیش و حاملهدار بولیشدن آلدین قان گروهینی انیقلش، دوالنیش مرکزلر و Rh پیچکاریسی اوتکزیلیش امکانیتیدن فایدهلنه آلیش، جنین بیلن آنه قانی ماس کیلمسلیگی خوفی عاقبتلرینینگ آلدینی آلیش اوچون مهم یوللردن حسابلنهدی.
