خلقارا علمی جماعه طبیات ساحهسی اوچون انقلابی اهمیت گه ایگه بولگن ینگی تکنالوژینی تقدیم اېتدی.
عالملر انسان سلامتلیگیده پیدا بولیشی ممکن بولگن تورلی کسللیکلر خوفینی اوزاق مدت آلدیندن بشارت قیله آلهدیگن صنعی هوش مادیلینی ایشلب چیقیشدی.
Delphi-2M دیب ناملنگن مذکور تیزیم مینگدن کوپ کسللیک تورلرینی تحلیل قیلیب، بعضاً معمالرنی ۱۰ ییل آلدیندن کورسهتیب بیریشی ممکنلیگی قید ایتیلگن.
مادیلنینگ ایشلش پرینسیپی شفاکار یازولری، شفاخانهده ییغیلگن معلوماتلر و انسان تورموش طرزی عامللری (مثلاً، چیکیش عادتی، آوقتلنیش ترتیبی، جسمانی حرکت درجهسی)نی بیرلشتیریش آرقهلی عملگه آشهدی.
متخصصلرنینگ تأکیدلشیچه، Delphi-2M هواشناسلیک پیشبینلیکلری کبی احتمالی خلاصهلر اساسیده سلامتلیکدهگی خوفلرنی کورسهتیب بیرهدی.
اوشبو صنعی هوش دستلب بویوک بریتانیادهگی UK Biobank معلوماتلری (۴۰۰ مینگدن آرتیق اشتراکچی) ده اوقیتیلدی. کېینچهلیک اېسه دنمارکنینگ ملی ساغلیقنی سقلش تیزیمیدهگی ۱.۹ میلیوندن آرتیق اهالی معلوماتلری بیلن تېکشیرودن اوتکزیلدی. تدقیقات نتیجهلری Delphi-2M یورهک خروجی، دیابت و سپسیس کبی خوفلی کسللیکلرنی یوقاری ثمرهدارلیک بیلن انیقلشینی کورستهدی. بیراق، تصادفی اینفیکسه (عفونت)لرنی بشارت قیلیشده اونینگ امکانیتلری حلی چېکلنگنی قید اېتیلدی.
عالملرنینگ فکریچه، بو تکنالوژی کیلگوسیده طبیات عملیاتینی توبدن اوزگرتیریشی ممکن. شفاکارلر صنعی هوش یاردمیده بیمارلر گه یالغیزلیکده مصلحت بیریشی، خوفنی پسهیتیریش اوچون تورموش طرزده اوزگریشلرنی توصیه قیلیشی یا که ضرور حاللرده آلدیندن دوالش چارهلرینی کوریشی ممکن.
شونینگدیک، بوتون ساغلیقنی سقلش تیزیمی اوچون هم کتته اهمیت کسب اېتهدی، چونکه کسللیکلر ترقهلیشینی آلدیندن حسابلش و شفاخانهلر یوکلمهسینی ریجهلشتیریش امکانی یرهتیلهدی.
لایحه، جرمنینینگ سرطان گه قرشی تدقیقات مرکزی (DKFZ)، اروپا مولکولی بیالوجی (زیست شناسی) لابراتواریهسی همده کپنهاگ بیلیم یورتی عالملری همکارلیگیده عملگه آشیریلدی. تقدیقات نتیجهلری نفوذلی خلقارا علمی نشر Natureژورنالیده اعلان قیلیندی.
متخصصلر کیلگوسیده مادیلینی ېنهده تکامللشتیریش مقصدیده اونگه جینیتیک معلوماتلر، قان تحلیللری و طبی تصویرلر اساسیسینی هم قوشیشنی ریجهلشتیریشگن. شو بیلن بیرگه، تورلی یاش گروهلرینی قمرهب آلهدیگن ېنهده یېریک کلینیک معلوماتلر بیلن ایشلش یولگه قوییشی کوزده توتیلماقده.
