بوگون حکومت نینگ اطلاعات و میدیالر مرکزی ده یولگه قوییلگن مطبوعاتی ییغینیده اشتراک ایتگن افغانستان تیمیر یولی مسئوللری، سونگی بیر ییل ایچیده ایش و فعالیت‌لرینی خبرچی‌لر بیلن شریک قیلدی.
افغانستان تیمیر یولی اداره‌سی سرپرستی بخت‌الرحمن شرافت نینگ ایتیشیچه، اوتگن بیر ییل ده اوشبو اداره افغانستان دن تشقری سوداگرلیک توارلرنی انتقال بیریش بیلن ۲.۵ میلیارد افغانی در آمد قیلگن.
مذکور اداره سرپرستی نینگ کوپه‌یتیریشیچه، سوداگرلر نینگ ایشلری گه قولی‌لیک کیلتیریش مقصدیده، سوداگرلیک توارلرنی انتقال بیریش همده ایش فرصت‌لرینی یره‌تیش و مملکت اقتصادینی کوچه‌یتیریش اوچون کوپ سعی و حرکت قیلگنلر.
بیزلرنینگ فیسبوک صحیفه‌میزگه باش اورینگ!
اونینگ ایتیشیچه: «سونگی بیر ییل ده افغانستان تیمیر یولی قطار مملکت‌لرده ۳ میلیون ۴۵۶ مینگ ۸۴۲ متریک تُن سوداگرلیک توارلرنی انتقال بیریش بیلن، ۲ میلیارد ۵۸۱ میلیون ۵۸۹ مینگ ۴۴۲ افغانی درآمد قیلیب و دولت خزینه‌سیگه توللـنگن.»
برچه‌سی بیلن، افغانستان تیمیر یولی اداره‌سی نینگ سوزلاوچیسی عبدالرحمن درانی گه کوره، اوتگن بیر ییل ده تیمیر یولی نینگ پروژه‌لری امنیتی تأمینلنیشی اوچون یخشی نتیجه گه ایریشگنلر.
افغانستان تیمیر یولی اداره‌سی مسئوللری نینگ ایتیشلریچه، افغانستان نینگ ۲۳۰ کیلومتر تیمیر یولی بار و حاضرگی کونده تخمیناً ۴ مینگ کیشی مستقیم روشده بوشه‌تیش، یوکلش و باشقه بولیم‌لرده حیرتان و آقینه تیمیر یوللریده ایشله ماقده‌لر.
عبدالرحمن درانی گه کوره: «دستلب پروژه‌لر نینگ امنیتی تأمینلنیشی اوچون تلاش قیله‌میز، الحمدالله بوتوغریده کوپ یوتوق‌لر گه قول تاپدیک.»
باشقه تاماندن افغانستان تیمیر یولی اداره‌سی نینگ تخنیکی اورین باسری عبدالباری صدیقی، افغانستان_پاکستان یولیده افغان سوداگرلری نینگ قیینچیلیکلری خصوصیده ایتیشیچه، کویته دن افغانستان گه توارلرینی انتقال بیریش ده ایریم قیینچلیکلر بیلن روپه‌ره لر.
اونینگ کوپه‌یتیریشیچه، حاضر افغانستان و پاکستان آره‌سیده تیمیر یولی قوریلیش زمینه‌سی یره‌تیلگن، بو ایش عملی بولگن تقدیرده، سوداگرلر نینگ قیینچیلیکلری حل ایتیله‌دی.
افغانستان تیمیر یولی اداره مسئوللری نینگ ایتیشلریچه، اوتگن بیر ییل ایچیده ایران نینگ یول و شهرلرنی قیته تیکلش وزیرلیگی نینگ مسئوللری بیلن افغان طلبه‌لرینی جذب قیلیش، یریم ایشلری قالگن پروژه‌لرنی باشلش باره‌سیده بحث ایتیلگن و اولر خواف_هرات تیمیر یولی اوچینچی فازی ایشی بیتیشی مقصدیده سعی و حرکت قیلماقده‌لر.
بیزلرنینگ توییترده هم تعقیب قیلینگ!
اوشبو اداره رهبریت هیأتی نینگ اوزبیکستان و ایران گه قیلگن سفرلری، تشکیلاتی ساختارنی قیته تیکشیریش و اصلاح قیلیش، تجارتی و غیر تجارتی توارلرنی انتقال بیریش و یریم ایشلری قالگن پروژه‌لر ایشکه باشله‌شی، اوتگن بیر ییل ده مذکور اداره نینگ یوتوق‌لریدن عنوان قیلینگن.
ایتیش کیره‌ک که، افغانستان تیمیر یولی اداره مسئوللری سونگی بیر ییل ده، اوزبیکستان و پاکستان بیلن هماهنگ بولیش مقصدیده سعی و حرکت قیلگنلر. اولر نینگ ایتیشلریچه، مذکور ایکی مملکت افغانستان آرقه‌لی مرکزی آسیانی جنوبی آسیا بیلن باغله‌یدیگن «افغان ترانس» پروژه‌لری تطبیق ایتیلیشی خصوصیده، تخنیکی بحث‌لرنی باشله‌گنلر.