اسلام امیرلیگی سودا و صناعت وزیرلیگینینگ ایتیشیچه، اوتگن میلادی ییلده ۱۰ دن آرتیق مملکتگه ۵۶ تُن زعفران صادر بولگن.
اوشبو وزیرلیک سوزلاوچیسی آخوندزاده عبدالسلام جوادنینگ ایتیشیچه، افغانستان بو مقدار زعفراننی صادر قیلیش آرقهلی ۵۴ میلیوندن آرتیق دالر درآمد قیلگن. اونینگ کوپهیتیریشیچه: «۲۰۲۵-ییل جریانیده افغانستان زعفرانی هندوستان، اسپانیا، سعودی عربستان، بیرلشگن عرب امیرلیگی، امریکا، کانادا، انگلستان، ایتالیا، تورکیه، عمان و باشقه بیر قطار مملکتلرگه صادر بولدی. مذکور زعفران قریب ۵۶ تُن بولیب و اونینگ ارزشی ۵۴ میلیوندن آرتیق دالر گه ییتیشهدی.»
شونینگدیک، بلجیم خلقارا طعم انستیتوتی آرقهلی افغانستان زعفرانی، «۲۰۲۶ ییلنینگ اینگ یخشی طعمی» مکافاتیگه ایگه صفتیده تانیشتیریلگن.
شوندهی بیرحالده، افغانستان بوییچه زعفران کنسرسیوم مسئولی عبدالخالق خدادادینینگ سلاموطندار گه ایتیشیچه، افغانستان زعفرانی دنیا ده صفت نقطهی نظریدن بیرینچی اورینده قرار تاپگن. «افغانستان زعفرانینینگ پروسس و پاکتلنیشی توغریسیده حاضر افغانستان بویلب یخشی و ستندرد شرکتلر فعالیت قیلهدی و شونینگدیک ایچکی تقاضا هم بار. افغانستان زعفرانینینگ قریب ۲۰ فایزی ایچکی مارکیتده صرفلنیب و ۸۰ فایزی ایسه دنیا مارکیتلریگه صادر بولهدی. پروسس و پاکتلنیش شرکتلریده حاضر کوپراق ستندرد پاکتلنیش بولیب، قوطی، تیمیر و شیشهیی پکیجلردن فایدهلنیلهدی.»
زعفران سوداگرلریدن قطاری بانک چیکلاولری و یوقاری خرهجتلر تولهنیشینی، چیتایل مملکتلرگه زعفران انتقال بیریلیشی توغریسیدهگی قیینچیلیکلردن عنوان قیلیب و اسلام امیرلیگیدن بو قیینچیلیکلرنینگ حل قیلینیشینی سورهگنلر.
زعفران سوداگرلریدن عبدالعلی نوراحمدنینگ ایتیشیچه: «تشقیدن کوپ قیینچیلیک بیلن افغانستان گه پول کیلهدی و مشتریلر بیلن باغلنگنیب و بانک اکونتینی بیرگنیمیزده قیغو بیلن افغانستان دهگی بانککه پول کیتمهیدی. باشقه قیینچیلیک ایسه یوکنینگ انتقال بیریلیشی دیر. کوپ قیین بیر شکلده یوباریلیب و کیچ ییتیشهدی و کوپ یوقاری قیمت بیلن چیتایلدهگی مشتریلرگه ییتیشهدی.»
شونینگدیک زعفران سوداگرلریدن باشقه بیری شهرام محمدیگه کوره: «زعفران صادر قیلووچیلر برابریدهگی قیینچیلیکلردن بیری یوباریش خرهجتی دیر که کوپ یوقاری خرهجتلرنی اینیقسه امریکا و اروپا مملکتلر اوچون تولهیمیز. اسلام امیرلیگیدن زعفران صادر قیلووچی و سوداگرلرنینگ قوللب-قوتلهشینی ایستهیمن. بانک تحریمی هم باشقه بیر قیینچیلیک دیر که بیز یالغیز هندوستاندن پول آلالهمیز که توغری افغانستان ده اکونتیمیزگه کیلهدی.»
سودا و صناعت وزیرلیگینینگ معلوماتی اساسیده، افغانستان ۲۰۲۴-ییلده ۴۴ میلیون دالر ارزشیگه ۶۴ تُن زعفران صادر قیلگن.
