۲۰۲۶ آسیا فوتسال کپی ۸ جماعه اویینلری ایرتهدن باشلنهدی و اوشبو باسقیچ گه افغانستان، اوزبیکستان، ایران، جاپان، عراق، تایلند، اندونیزیا و ویتنام فوتسال جماعهلری یول تاپدی.
افغانستان فوتسال ملی تیرمه جماعهسی، ۲۰۲۶ آسیا فوتسال کپی گروهی باسقیچیده سونگی مسابقهسیده ایران برابریده ۵-۲ حسابی بیلن مغلوب بولسه-ده، ایکینچی جماعه صفتیده ۸ جماعه آرهسیده یول تاپدی.
مملکت فوتسال ملی اویینچیلری اوشبو تورنمنتنینگ بیرینچی و ایکینچی اویینلریده سعودی عربستان گه ۳-۰ و مالیزیا گه ۷-۰ حسابی بیلن غلبه قازانگن ایدی لیکن ایران برابریده مغلوبیت گه تن بیردی.
افغانستان، ۲۰۲۶ آسیا فوتسال کپی ۸ جماعه اویینلریده ایرته (۱۴ دلو / ۳ فبروری، سهشنبه) کابل وقتی بیلن توشدن سونگ ساعت ۲:۳۰ ده، آسیا بوییچه فوتسال کوچلی جماعهلریدن بولمیش جاپان بیلن قرشیلشهدی.
افغانستان فوتسال ملی اویینچیلری اوشبو باسقیچده جاپان گه غلبه قازانگن حالده، یریم فینالده اندونیزیا و ویتنام غالبی بیلن بیللشهدی.
شو بیلن بیرگه، بو تورنمنتنینگ باشقه اویینلریده اوزبیکستان – ایران ایرته توشدن آلدین ساعت ۱۰:۳۰ ده، تایلند-عراق توش چاغی ساعت ۱۲:۳۰ ده و اندونیزیا-ویتنام ایسه عصر پیتی ساعت ۴:۳۰ بیللشهدی.
آسیا فوتسال کپی، ۱۶ جماعه جملهدن افغانستان، اوزبیکستان، ایران، مالیزیا، سعودی عربستان، تاجیکستان، جاپان، آسترالیا، تایلند، ویتنام، لبنان، کویت، اندونیزیا، عراق، قرغیزستان، جنوبی کوریا اشتراکی بیلن، قویاش ۱۴۰۴ ییل، ۷ دلودن اندونیزیا میزبانلیگی بیلن باشلندی و اوشبو آی ۱۸ گچه دوام تاپیشی کوتیلهدی.
