قویاش چیقیب و هر بیر ساعت اوتیشی بیلن هوا ایسیقراق بولماقده؛ لیکن او بو ایسیقلیکنی چیدهش گه مجبور دیر. پروان مرکزی چاریکار شهریده جایلشگن بیرلمچی محکمه دیواری یانیده، یاغاچدن یسل بیر چوکیگه اولتیریب و قرشیسیگه مشترلری اوچون ینه بیر چوکینی قویگن. یانیگه قوییلگن بیر خلته ایچیده نیچهته قیچی، تراق و سینگن بیر آیینه بار.
بو کیشینینگ اسمی شاهمحمد دیر، او یاشینینگ تورت دههدن کوپراغینی سرکلرده سلمانلیک قیلیش بیلن اوتکزیب و بو یول آرقهلی دسترخوانی اوستیگه نان آلیب بارگن. ایشی وضعیتی توغریسیده سوال قیلگنیمده، باغزی تولیب، کوزلریگه یاش اَیلنسهده، کوز یاشلرینی سیریب و سوالیمگه جواب بیرهدی: «اویگه ۸ کیشی بار. ساچیم آقرگن و ۴۰-۴۵ ییلدن بیری یاز ایسیغی و قیش ساووغیده اولتیریب شو ایش بیلن مصروفمین. یاشلر ایسه ساچ-ساقالینی توزهتیش اوچون کیلمهیدی. بعضا بیر کونده ۱۰۰-۱۵۰ افغانی ایشلهیمن و بعضا ایسه هیچ کیم کیلمهیدی.»
بیزلرنینگ فیسبوک صحیفهمیزگه باش اورینگ!
قیچیسینی زنگ اوریب کیتگن، لیکن قوللری حاضرگچه مهارتگه ایگه بولیب، پرماقلریده ییللردن بیری توپلهگن تجربهلر بار. اونینگ ایتیشیچه، بعضا ساچلرینینگ اصلاح بولگنی عوضیگه ۱۰ افغانی بیرگن کیشیلر بار و او هیچ قچان اولر برابریده سیس چیقرمهی و قولیگه کیلگن هر بیر درآمد گه شکر قیلگن.
شاهمحمد سلمانلیکنی آتهسیدن ارث آلگن، لیکن قشاقلیک و دکان کرایهسینی تامینلشده امکانیتسیزلیک سبب، ایشینی شهر پیاده یوللرده دوام بیرگن. «خدا شاهد که ۱۰ روپیه گه هم ایشلهگنمین. اهالی ۵۰ افغانیگه توزتهدی و مین ۲۰-۳۰ افغانی آلهمن، لیکن بعضا اهالی اوشه پولنی هم بیرمهی و بیزده یوق دیهدیلر. اوی ایگهسی کرایه بیر دیهدی. مین اوی کرایهسینی هم تولدیره آلمهمین.»
شاهمحمد سرکلر و کوچهلرده ایشلهیدگن یوزلب ایشچیدن بیری دیر که ایشسیزلیکنینگ شفقتسیز فضاسی و اجتماعی قوللب-قوتلنیش یوقلیگیده، تیریکچیلیک اوچون کورهشهدی. آچیق فضاده ایشلش، بعضا شاهمحمدنی جدی ساغلیق خوفلر بیلن روپهره قیلهدی، لیکن او باشقه بیر یولنی تاپه آلمهی، یازنینگ ایسیق کونلری و قیشنینگ ساووق کونلرینی پیاده یوللرده اوتکزیشگه مجبور دیر. «برچه فایدهلنهدیگنیمیز اوسکونهلرنی تبدیل قیلهمیز و تازهلهیمیز که هم اوزیمیز و همده باشقه کیشیلر کسللیککه چلینمهسین دیب. باشیده بیران دانه یا-ده یرهسی بولگن کیشیلر ساچینی اصلاح قیلمهیمیز که اوزیمیز و باشقه کیشیلر حیاتی خطر گه قالمهسین، چونکه بعضی کیشیلرنی قاره سریغلمه و باشقه کسللیکلر توتگن.»
بیزلرنینگ «ایکس» ترماغی ده هم تعقیب قیلینگ!
بلدیه مامورلرینینگ اوتیب قیتیشی، ایشیدن یقینداشلرینینگ رضایتسیزلیگی، مشتریلرینینگ توجهسیزلیگی و جزیرمه ایسیقلیک، شاهمحمد حیاتینینگ کوندهلیک بولیمی دیر؛ لیکن او هر کونی اوسکونهلری تشلنگن خلتهنی آلیب و دایم اولتیرگن جاییگه باریب مشتریلرینی کوتیب توریشگه مجبور دیر. «اقتصاد یخشی بولگنیده ایشیمنی اوزگرتیرهمن و بو ایشنی قیلمهیمن. اهالیدن کوپ قطاری تعنه بیرهدی، حتا ایناغهم، ابهلریم تعنه بیرهدی. ساچینگ آقرگن و ایشلش گه کوچینگ ییتیشمهیدی دیهدیلر.»
قویاش باتماقده و دیوار سایهسی بیراز یوقاریراق بولگن. شاهمحمد هم آرام آرام اوسکونهلرینی ییغیب، اوستی-باشینی توپراقلردن قاقهدی و اویی تامان حرکت قیلهدی.