بالهلردن حفاظت قیلووچی تشکیلاتینینگ اعلام قیلیشیچه، افغانستان شرقیده یوز بیرگن هلاکتلی زلزلهدن آلتی آی اوتیب، کنر ولایتیده قریب ۲۵ مینگ باله حاضرگچه خیمهلرده حیات کیچیرماقده.
مذکور تشکیلات، بوگون (۷-حوت/ ۲۶-فبروری، پنجشنبه)، بیر گزارش آرقهلی ایتیشیچه، جبرلنگن منطقهلردهگی اویلر و مکتبلر حاضرگچه قیته قوریلمهی و اولرنینگ قیته قوریلیش جریانی باشلنیشی اوچون انیق بیر ریجه موجود ایمس.
اوشبو گزارشده کیلیشیچه، بوزیلگن یا-ده زیان ییتیشگن تعلیمی صنفلرنینگ قیته قوریلیش ایشی هم حاضرگچه باشلنمهی و زیان ییتیشگن مکتبلردهگی اوقووچیلردن قریب ۱۷ مینگ تهسی، وقتینچهلیک تعلیمی آچیق فضالرده درس اوقیماقده.
بالهلردن حفاظت قیلووچی تشکیلاتینینگ کوپهیتیریشیچه، کنر ده کمپلرده حیات کیچیرهدیگن آلتی مینگدن آرتیق باله، اویلری و درآمدلرینی قولدن بیریشدن کیین، حاضرگچه انسانسیورلیک یاردملرگه محتاج دیر.
شونینگدیک بو تشکیلاتنینگ کوپهیتیریشیچه، زلزله یوز بیرگنیدن حاضرگچه افغانستان شرقیده زلزلهدن جبرلنگن منطقهلردهگی ۳۴ مینگ باله شامل قریب ۸۹ مینگ کیشیدن حمایت قیلگن.
۲۰۲۵-ییل آگست آییده افغانستان شرقینینگ بیر قطار بولیملریده یوز بیرگن زلزله نتیجهسیده، کوپراق کنر ولایتیگه زیان ییتیشتگن. مذکور واقعهده ایکی مینگدن آرتیق کیشی قربان بولیب و سکیز مینگدن آرتیق اوی بوزیلیب یا-ده زیان کورگن.
