بغلان ده ویران قیلووچی سوو تاشقینلردن زیان کورگنلردن قطاری، برچه نرسه‌لرینی قولدن بیریب و هیچ بیر امکانیت‌لری قالمه‌گنیدن خواطر بیلدیریب ایتیشلریچه، وقتینچه‌لیک باش‌پنه، آزیق-آوقت محصولاتلری و ساغلیق امکانیت‌لر گه عاجل نیازلری بار.
بغلان ده سوو تاشقینی‌دن زیان کورگنلردن جمیله و شمس‌الدین نینگ سلام‌وطندار گه ایتیشلریچه، اهالی و خیریه نهادلری نینگ یاردم‌لری ییتیشمه‌گنی صورت‌ده، آچلیک‌دن تلف بوله‌ر ایکنلر.
جمیله نینگ ایتیشیچه: «سوو تاشقینی سبب لای‌لر ایچیده قالگن ایدیم. باله‌لریم نی سوو تاشقینی‌دن چیقریب و دیوار اوستیگه قویگن و اولر نی قوتقردیم. تاغ گه چیقدیک، برچه نرسه‌میز نی سوو تاشقینی آلیب کیتدی. هیچ نرسه‌میز یوق. کییم و آزیق-آوقت بیزلر گه قالمه‌گن.»
بیزلرنینگ «ایکس» ترماغی ده هم تعقیب قیلینگ!
شونینگدیک شمس‌الدین نینگ ایتیشیچه: «اوشبو اهالی گه یاردم بیریلیشی نی ایسته‌یمن. زیان کورگنلر گه ایدیش، توشک و آزیق-آوقت محصولاتی یاردم بیریلیشی کیره‌ک. بو اهالی‌دن برچه‌سی قشاق کیشی‌لر دیر و هیچ کیم‌لری یوق و هیچ نرسه‌لری هم یوق.»
بغلان محلی رسمی‌لر آٰقه‌لی ترقه‌تیلگن رقملر اساسیده، اوشبو ولایت نینگ اون تومنی‌ده یوز بیرگن سوو تاشقینلر نتیجه‌سیده، مینگلرچه یشش اوی ویران بولگن. شونده‌ی بیرحالده، اوتگن یک‌شنبه کونی بیرلشگن ملت‌لر تشکیلاتی نینگ باله‌لردن حمایت قیلووچی صندیغی (یونیسف) و باله‌لرنی قوتقریش صندیغی نینگ رویترز آژانسی گه ایتیشلریچه، افغانستان شمالی اینیقسه بغلان ده یوز بیرگن سوو تاشقین‌ده ۳۱۰ مینگ باله زیان کوریب و کمیده ۵۱ باله اولگن.
بغلان ده سوو تاشقینی نتیجه‌سیده، تورت عایله اعضاسی نی قولدن بیریگن ۱۲ یاشر شفیق‌الله نینگ سلام‌وطندار گه ایتیشیچه: «تشقری گه چیقدیک برچه ییر سیل ایدی. اوی گه کیردیک که دیوار و ایشیک نی چپه قیلدی. مین درخت‌نی توتدیم. سوو تاشقینی اوی گه کیردی و ایناغه‌م اوشه ییرده اولدی و آنه‌م نی هم سوو تاشقینی آلیب کیتدی.»
شونینگدیک اوشبو ولایت‌ده تورت باله‌سی و تورموش اورتاغی نی سیل آلیب کیتگن جاوید نینگ ایتیشیچه: «مین ایشچی و ایرتنگ چاغی ایش گه کیتدیم و قیته کیلگنیم‌ده کوردیم که برچه نرسه نی سوو تاشقینی آلیب کیتگن. عایله اعضام‌ده بیش کیشی تورموش اورتاغیم و تورت باله‌‌م نی سوو تاشقینی آلیب کیتگن. باله‌لریم ۸ یاشر، ۵ یاشر اوچ آی‌لیک ایدیلر.»
عین حالده، بغلان حاکمی سوزلاوچیسی علم مجیدی، سوو تاشقینلر نتیجه‌سیده قریب ۷ مینگ یشش اوی نینگ بوتونلی و قسمی شکلده ویران بولگنی‌دن خبر بیریب و ایتیشیچه: «قریب ۱۰ تومن گه زیان ییتیشگن. حاضرگچه ۱۵۴ کیشی اولگن و ۲۵۰ کیشی یره‌لنگن. یوقالگنلردن بیللی بیر رقم یوق. رقملر اوزگرماقده. ۴مینگ‌دن یوقاری یشش اوی بوتونلی و ۲مینگ ۵۰۰دن ارتیق یشش اوی قسمی شکلده ویران بولگن.»
بیزلرنینگ فیسبوک صحیفه‌میزگه باش اورینگ!
بولر گه علاوه، طبیعی آفت‌لرنی باشقریش ایشلری بوییچه دولت وزیرلیگی مسئوللری سوو تاشقینی‌دن زیان کورگنلر گه یاردم بیریش و قوتقریش عملیاتی نینگ دوامی‌دن خبر بیرگن.
شونینگدیک بغلان ده محلی مسئوللر نینگ ایتیشلریچه، حاضرگچه بغلان مرکزی و برکه تومن‌لریده سوو تاشقینی‌دن زیان کورگنلر گه چادر ترقه‌تیلیب و کونده اولر گه آزیق-آوقت محصولاتی ییتیشتیریله‌دی.
ایتیش کیره‌ک که، حاضرگچه، اروپا بیرلشمه‌سی افغانستان ده سوو تاشقین‌دن زیان کورگنلر گه ۹۷ تُن دارو و طبی جهازلر نی یاردم بیرگن و شونینگدیک امریکا سوو تاشقین‌دن زیان کورگنلر گه یاردم‌لری خصوصیده ایشانچ بیرگن.