پکتیا ولایتی نینگ زرمت تومنی یشاوچی‌لری نینگ ایتیش‌لریچه، امنیتی وضعیت یمان بولگنی و طالبان گروهی نینگ تهدیدی سبب، ۲ مینگ‌دن آرتیق عایله اوشبو تومن‌دن آواره بولگن‌لر.
پکتیا ولایتی نینگ زرمت تومنی یشاوچی‌لریدن بیرقطاری اوشبو ولایت مرکزی گردیز شهریده بیر ییغین اوتکزیب مذکور تومنده ناتینچلیکلر کوپه‌یگنی و طالبان تهدیدی دن خواطر بیلدیرگن‌لر.
زرمت تومنی یشاوچی‌لریدن بولمیش صابری زرمتی و سیف‌الله نینگ ایتیشیچه، طالبان گروهی اصلی و فرعی قتناو یول‌لرده ماین جایلشتیرگن و یشاوچی‌لر گردیز شهری و باشقه منطقه‌لرگه آواره بولیش‌گه مجبور بولگن‌لر.
اولر، امنیتی نهادلردن قتناو یول‌لرنی آچیش و خوفسیزلیک‌نی تامین‌لشینی سوره‌گنلر.
پکتیا محلی مسوول‌لری نینگ ایتیش‌لریچه، امنیتی کوچلر قوشمه عملیات‌نی باشله‌گن و مذکور منطقه‌لرنی تیزلیککه طالبان وجودیدن تازه‌لنیشی ممکن.
پکتیا حاکمی محمدحلیم فدایی نینگ ایتیشیچه، زرمت و باشقه تومن‌لرده طالبان‌گه قرشی حربی عملیات یولگه قوییلگن و نتیجه‌ده چیت‌ایللیک جنگریلر شامل کوپ قطار هلاک ایتیلگن.
فدایی نینگ کوپه‌یتیریشیچه، امنیتی کوچلر اهالی‌نی طالبان قولیدن قوتقریش اوچون سعی و حرکت قیله‌دی.
پکتیا ولایتی بوییچه مهاجرلر ریاستی مسوول‌لری نینگ ایتیش‌لریچه، زرمت تومنی یشاوچی‌لریدن مینگ‌لرچه‌سی آواره بولگن و بو توغریده مسول نهادلردن یاردم ایسته‌گنلر.
