افغانستان، ایران و تاجیکستان دهلیز ترانسپورت جاده‌ای می‌سازند

وزارت ترانسپورت و هوانوردی امارت اسلامی، گفته که دهلیز سه‌جانبه‌ی ترانسپورت جاده‌ای میان افغانستان، ایران و تاجیکستان ایجاد می‌شود.

این وزارت، امروز (پنج‌شنبه، ۲۵ سرطان) در خبرنامه‌ای در اکس نوشته که تصمیم ایجاد دهلیز ترانسپورت جاده‌ای در نشست سه‌جانبه‌ میان افغانستان، ایران و تاجیکستان در شهر مشهد گرفته شده است.

به گفته‌ی وزارت ترانسپورت و هوانوردی، با ایجاد این دهلیز محموله‌های تجاری ایران و تاجیکستان از طریق افغانستان انتقال و ترانزیت می‌شود.

نشست سه‌جانبه‌ میان افغانستان، ایران و تاجیکستان، به هدف توسعه‌ی هم‌کاری‌های ترانزیتی و تقویت روابط ترانسپورتی میان سه کشور برگزار شده است.