قطر باشکنتی دوحه‌ده افغانستان حکومتی و طالبان گروهی نینگ مذاکره قیلووچی هیات‌لری آره‌سیده سوزلشوولرنینگ ایکینچی دوری باشلنگنیدن ایکی هفته اوتیشی بیلن اوشبو گروه بیر هیاتی ایران‌گه سفر قیلگن.
قطر ده طالبان سیاسی دفتری سوزلاوچیسی محمدنعیم نینگ ایتیشیچه، طالبان بیر هیاتی اوشبو گروه سیاسی اورین باسری ملا عبدالغنی برادر رهبرلیگی‌گه رسمی بیر سفر آرقه‌لی ایران‌گه بارگن.
طالبان سوزلاوچیسی نینگ توییتر صحیفه‌سیده یازیشیچه: «اوشبو سفر ده ایکی مملکت رابطه‌سی، افغانستان‌لیک مهاجرلر قیین‌چیلیگی، افغانستان و منطقه نینگ سیاسی و امنیتی وضعیتی خصوصیده ایران رسمی‌لری بیلن بحث قیلینیشی ممکن.»
عین‌حالده، افغانستان تشقی ایشلر وزیرلیگی نینگ بیر اعلامیه آرقه‌لی ایتیشیچه، افغانستان دولتی طالبان هیاتی نینگ سفریدن آگاه دیر و بو سفر دن آلدین ایران رسمی‌لری افغانستان دولتی نی جریان‌گه قویگن ایدی.
تشقی ایشلر وزیرلیگی تامانیدن نشر قیلینگن اعلامیه‌ده ایتیلیشیچه، طالبان نینگ اوشبو سفرینی تنظیم قیلیشدن مقصد، آتیش‌کیسین، جمهوریت چارچوبه‌سیده جامع بیر کیلیشووگه قول تاپیش و افغانستان اساسی قانونی نینگ ارزش‌لری سقله‌نیشی خصوصیده ایران دولتی نینگ طالبان گروهی‌نی آگاه قیلیش دیر.
ایران تشقی ایشلر وزیرلیگی سوزلاوچیسی سعید خطیب‌زاده نینگ طالبان هیاتی سفرینی تصدیق‌لب ایتیشیچه، اوشبو سفر ده طالبان هیاتی نینگ ایران تشقی ایشلر وزیری و باشقه رسمی‌لر بیلن اوچره‌شیب افغانستان تینچلیک جریانی و باشقه موضوع‌لری خصوصیده بحث قیلیش‌لری ممکن.
عین‌حالده، سیاسی ایش بیلرمانلردن بیرقطاری، طالبان هیاتیدن ایران نینگ رسمی دعوتی نی دیپلماتیک و خلق ارا اصول‌لریگه قرشی عنوان قیله‌دیلر.
سیاسی ایش بیلرمانلردن بیری یونس فکور نینگ ایتیشیچه، ایران دولتی افغانستان دولتی‌نی رسمیت گه تانیدی و انه‌شو سبب، باشقه جنگری بیر گروه بیلن رابطه قوریش خلق ارا قانون‌لر و ایکی تامانلمه رابطه‌گه قرشی دیر.
سیاسی ایش بیلرمانلردن باشقه بیری محب‌الله شریف هم طالبان دن ایران نینگ دعوتی نی افغانستان ایچکی ایشلریگه دخالت عنوان قیلیب ایتیشیچه، ایران طالبان گروهی نی تروریستی بیر گروه عنوان قیله‌دی، بیراق اوشبو گروه دن دعوت قیلیشی اوشبو مملکت راهبردی مقصدینی باشقه موضوع‌لرگه قره‌گنده افضل کوریشی نی اثبات قیله‌دی.
شونینگدیک، افغانستان حکومتی نینگ مذاکره قیلووچی هیات عضوی و سوزلاوچیسی نادر نادری نینگ توییتر صحیفه‌سیده یازیشیچه، ۹ کوندن بویان طالبان گروهی رسمی ییغین و اوروش‌نی یکونلنتیریش گه تیارگرلیک کورستمه‌گن.