فاریاب ده گیلم و قالین ایشلب چیقرووچی و ساتووچلردن بیرقطاری نینگ ایتیشلریچه، ایکی ییل دن بویان سودا یوق‌لیگی، ایچکی تولیدلردن حمایت بولمسلیگی، صادرات اوچون زمینه یره‌تیلمسلیگی و کوپ سانده خارجی قالین‌لر وارد ایتیلیشی، ایشلری تنزل گه یوز توتیشی گه سبب بولگن.
فاریاب ده گیلم توقووچی بی‌بی‌زینب، ۱۳ ییل دن بویان گیلم توقیش بیلن عایله اعضالری نینگ خرجتینی تأمینله‌یدی ایتیشیچه: «سابق گیلم نرخی قیمت ایدی، ایکی یریم یا که اوچ مینگ افغانی ساتر ایدیک. حاضر قیمتی پس توشگن. نیچه‌ته توقیب تیارلب قویگن‌میز لیکن حاضرگچه ساتگن یوق‌میز؛ چونکه پاکستان و باشقه اولکه‌لردن تورلی خیل قالین وارد بولگن. ایچکی تولیدلر بازاری رواجلنیشی اوچون خارج دن قالین وارد ایتیلیشی توخته‌تیلیشینی ایسته‌یمیز.»
بیزلرنینگ فیسبوک صحیفه‌میزگه باش اورینگ!
گیلم‌لرینی ساتیش اوچون بازار گه آلیب کیلگن فاریاب ولایتی کوهستان تومنی یشاوچیسی محمدآصف نینگ ایتیشیچه: «۳/۵ مترلیک گیلم نی بیش عیال ۱۰ کون ایچیده توقیدی؛ بیراق چیککن زحمت‌لری گه قره‌گنده ارزان ساتیب آله‌دیلر، خاتینیم توقیگن گیلم نی ساتیش اوچون آلیب کیلگن من، ساتیب ایران کیتیشنی ایسته‌یمن.»
فاریاب مرکزی میمنه شهری ده گیلم ساتووچیلر اتفاقی اعضاسی خیرمحمد خیری گه کوره، ۴۰ ییل دن بویان گیلم و قالین تجارتی بیلن مصروف دیر؛ بیراق قریب ایکی ییل دن بویان گیلم و قالین سوداسی کمه‌یگن. او نینگ کوپه‌یتیریشیچه: «ایکی ییل دن بویان بازار تنزل گه یوز توتگن. سوداگر هم، ساتووچی هم و خریدار هم یوق دیر. ۴۰ ییل دن بویان دکاندارلیک قیلیب کیلماقده‌من. ایکی ییل دن بیری دکان ده ساتیب آلگن گیلم‌لریم بار؛ لیکن هیچ خریداری یوق دیر.»
میمنه شهری ده گیلم ساتووچیلردن معاذالله نینگ ایتیشیچه، افغانستان ده قالین و گیلم بازاری یوق دیر. او نینگ کوپه‌یتیریشیچه، بوندن آلدین گیلم ساتیب آلیش اوچون کوپ سانده کیشی‌لر مراجعت قیلر ایدیلر؛ بیراق حاضر او و باشقه دکاندارلر اوز مال‌لرینی پاکستان و باشقه اولکه‌لر گه صادر قیله آلمه‌یدیلر. سوداگرلر سرمایه یاتقیزیب و شو ییرده سودا-ساتیق بولسه، بازار یخشی بوله‌دی.»
بیزلرنینگ توییترده هم تعقیب قیلینگ!
فاریاب صناعت و سوداگرلیک ریاستی صادرات آمریتی نینگ ترقیاتی مدیری محمدعالم گه کوره، مملکت ده سیاسی اوزگریش‌لردن کیین، قول صناعتی سوداگرلری مملکت نی ترک ایتیش‌لری باعث اوتمیش گه نسبتن گیلم و قالین بازاری تنزل گه یوز توتگن. او نینگ ایتیشیچه: «اسلام امیرلیگی و فاریاب صناعت و سوداگرلیک آمریتی، قالین و گیلم بازاری قیته رواجلنیشی مقصدیده سوداگرلرنی مملکت گه کیلیب سرمایه یاتقیزیش اوچون ترغیب قیلماقده‌لر.»
افغانستان بازارلریده خارجی قالین و فرش‌لر وارد ایتیلیشی، سونگی ییل‌لرده مملکت نینگ قطار ولایت‌لریده گیلم بازاری تنزل گه یوز توتیشی گه سبب بولگن.
