افغانستان ده سیاسی بحران حلی، قیز اوقووچیلر نینگ تعلیمی و عیاللر گه ایش حقی بیریلیشی گه دایر منطقه و خلق‌ارا سعی‌وحرکت‌لر دوام ایتر ایکن، قطر تشقی ایشلر وزیرلیگی نینگ تروریزم گه قرشی کوره‌ش و ماجرالرنی حل قیلیش اوچون واسطه‌چیلیک قیلیش ایشلری بوییچه مخصوص نماینده‌سی ماجد القحطانی، کابل گه قیلگن سفری دایره‌سیده، اسلام امیرلیگی رسمی‌لری بیلن اوچره‌شگن.
قطر تشقی ایشلر وزیرلیگی بیر بیانیه ترقه‌تیب، قحطانی اسلام امیرلیگی تشقی ایشلر وزیرلیگی نینگ سرپرستی امیرخان متقی، ایچکی ایشلر وزیرلیگی نینگ سرپرستی سراج‌الدین حقانی، معارف وزیرلیگی نینگ سرپرستی حبیب‌الله آغا و استخبارات عمومی باشلیغی عبدالحق وثیق بیلن اوچره‌شگنیدن خبر بیرگن.
بیزلرنینگ فیسبوک صحیفه‌میزگه باش اورینگ!
اوشبو اوچره‌شوولرده، قطر نینگ مخصوص نماینده‌سی قیز اوقووچیلر نینگ تعلیمی و عیاللر گه ایش حقی بیریلیشی اوستیگه تأکید ایتگن.
اسلام امیرلیگی تشقی ایشلر وزیرلیگی بیر بیانیه ترقه‌تیب ایتیشیچه، قطر نینگ مخصوص نماینده‌سی امیرخان متقی بیلن ملاقاتیده، سیاسی هماهنگ‌لیک و ایکی تامانلمه مناسبت‌لر مستحکم‌له‌نیشی اوستیگه تأکید ایتگن.
عین‌حالده، بیلیم یورت اوقیتووچیسی محمداکرم عارفی گه کوره، قطر نماینده‌سی نینگ سفری اسلام امیرلیگی سونگی قرارلرینی قیته کوریب چیقیشی اوچون استه_سیکین تأثیر قیلیشی ممکن.
اونینگ سلام‌وطندار گه ایتیشیچه: «اوزگریشی باره‌سیده اونچه‌لیک امید یوق؛ بیراق استه_سیکین تأثیر قیلیشی ممکن. قطر صلح مذاکره‌لری میزبانی ایدی و اسلام امیرلیگی بیلن مناسبتی یخشی، لیکن اسلام امیرلیگی نینگ قراری دین گه باغلیق سیاسی بیر سفر بیلن اوزگرمه‌یدی. بیراق استه‌سیکین تأثیری بولیشی ممکن.»
شونینگدیک، خلق‌ارا مسئله‌لر بوییچه تدقیقاتچی محبوب محق نینگ ایتیشیچه، قطر نینگ اسلام امیرلیگی بیلن مناسبتی سابقه‌لی بولیشی گه بناً، افغانستان گه قطر نماینده‌سی نینگ سفری اسلام امیرلیگی سونگی قرارلرینی قیته کوریب چیقیشی اوستیگه تأثیر قیلیشی ممکن.
بیزلرنینگ توییترده هم تعقیب قیلینگ!
اونگه کوره: «افغانستان گه قطر نماینده‌سی نینگ سفری فکریمچه مهم سفرلردن دیر. چونکه قطر نینگ اسلام امیرلیگی بیلن مناسبتی سابقه‌لی دیر.»
باشقه تاماندن، خلق‌ارا سیاست ایشلری بوییچه ایش بیلرمان محمود اضطرابی نینگ ایتیشیچه، افغانستان گه قطر نماینده‌سی نینگ سفری، اسلام امیرلیگی نینگ اوستیگه باسیم کیلتیریش بیلگی‌لریدن دیر.
محمود اضطرابی نینگ کوپه‌یتیریشیچه: «هر کون اوتیشی بیلن اسلام امیرلیگی اوستیگه دیپلوماتیک باسیم‌لر کوچه‌یتیریلماقده، سعودی عربستان و بیرلشگن عرب امیرلیگی نینگ ایلچیخانه‌سی یاپیلیشی باسیم‌لر مثالی دیر. قطر دن کابل گه هیئت کیلیشی، جهانی باسیم‌لر کوچه‌یتیریلیشیدن درک بیره‌دی.»
ایتیش کیره‌ک که، قطر و اسلام امیرلیگی نینگ مناسبتی سابقه‌لی دیر، قطر پایتختی دوحه شهری ده امریکا و اسلام امیرلیگی ارا صلح کیلیشووی امضالندی، باشقه تاماندن اوشبو مملکت قریب ایکی ییل افغانستان صلح مذاکره‌لری میزبانی ایدی.
