کابل حاکمی محمدیعقوب حیدری نینگ ایتیشیچه، تینچلیک سوزلشوولریده لویه جرگه ده تصویب بولگن اساسی قانون ارزش‌لری معامله قیلینمه‌سی کیره‌ک.
بوگون (جمعه ۲۰- حمل) کابل حاکمی «تینچلیک توغریسیده اهالی نینگ سیسی» نامیده یولگه قوییلگن ییغیلیش گه بونده‌ی بیانات بیرگن. مذکور ییغیلیش گه کابل یشاوچی‌لریدن مینگ‌لرچه‌سی غازی سپورت میدانی ده توپله‌نیش بیلن تینچلیک توغریسیده اوز موقف‌لرینی اعلام قیلیشگن. مذکور ییغیلیش کابل ولایت مقامی تامانیدن یولگه قوییلگن ایکن. شونینگدیک جناب حیدری نینگ ایتیشیچه، تینچلیک افغانستان یشاوچی‌لری نینگ اساسی ایسته‌گی دیر؛ بیراق بو تینچلیک مملکت نینگ فایده‌سیگه تمام بولیشی کیره‌ک.
کابل حاکمی گه کوره، افغانستان یشاوچی‌لری نینگ ایسته‌کلری بو دیر کیم اوروش تامان‌لری شخصی و گروهی ایسته‌کلردن واز کیچیب و جمعی ایسته‌ککه حرمت بیریش بیلن بیرینچی ده آتیش کیسین اوستیگه کیلیشیش‌لری کیره‌ک.
کابل حاکمی بیاناتی نینگ بیر بولیمیده استانبول ییغینی گه اشاره قیلیب ایتیشیچه، مذکور ییغین گه کابل اهالیسی نینگ ایسته‌کلریگه توجه بولیش خصوصیده امید بیلدیره‌دی. اونگه کوره، کابل هردایم تینچلیک و اوروش مرکزی بولیب کیلگن و بو مملکت یشاوچی‌لری نینگ تقدیری حقیده یخشی نقشی بار.
بونده‌ی بیاناتلر ارایه ایتیلگن بیرحالده، یقیین کیله‌جکده افغانستان تینچلیگی توغریسیده استانبول ییغینی یولگه قوییلیشی گه قرار قیلینگن. گرچند مذکور ییغین یولگه قوییلیشی نینگ تاریخی بیللی بولمه‌گن؛ بیراق بوندن آلدین مذکور ییغین ۱۶- جاری میلادی آیده یولگه قوییلیشی بیلدیریلگن ایدی. ایتیلیشیچه، بو ییغین ده دولت رهبرلیگی، سیاسی سیمالر و طالبان گه علاوه، باشقه مملکتلر نماینده‌لری هم شرکت قیلیشی ممکن.
ایتیلیشیچه، افغانستان دولتی تولیق قول بیلن استانبول ییغینی گه شرکت قیلیشی ممکن. ملی مصالحه عالی کینگش باشلیغی عبدالله عبدالله، بو ییغین نی افغانستان اوچون کوپ اونملی دیگن.
باشقه بیر تاماندن ینگی‌لیکده ترکیه نینگ ناتوده‌گی ایلچیسی استانبول ییغینی دوحه سوزلشوولری نینگ بیتیروچیسی دیگن.