دولتی کوچلر ۴۸ ساعت آتیشمه اوتکزگندن کیین اوتگن کون شام چاغی، بغلان مرکزی پلخمری شهری نینگ ترک قیلیب و کیله‌گی منطقه‌سیده‌گی حربی کوچلرنینگ اوچینچی لواسیده جایلشگن.
نماینده‌لر کینگشی ده بغلان ملت وکیلی نوریه حمیدی نینگ ایتیشیچه، پلخمری شهری سیاسی بیر معامله نتیجه‌سیده طالبان گه تاپشیریلگن. اونگه کوره، حربی جهاز یوقلیگی و مرکزی حکومت تامانیدن یاردم بیریلمه‌گنی باعث امنیتی کوچلر آرتده چیکیلیش گه زورلنگن.
خانم حمیدی نینگ ایتیشیچه، طالبان بوگون ایرته‌لب دولتی اداره‌لرنینگ برچه ملزمه‌لرینی چور قیلیب و اویلرنینگ بیر-بیرته تیکشیریش گه باشله‌گن که بو موضوع پلخمری یشاوچی‌لری نینگ وحشت گه سالگن.
بیزلرنینگ فیسبوک صحیفه‌میزگه باش اورینگ!
نماینده‌لر کینگشی ده بغلان ملت وکیل‌لریدن باشقه بیری نسیم مدبر، مرکزی حکومت نینگ توجه‌سیزلیگی باعث پلخمری شهری سقوط قیلگن دیدی. اونگه کوره، اولر بو موضوع نی تیکشیره‌دی.
بغلان ولایتی کینگش اعضاسی سمیع‌الدین ناظر نینگ ایتیشیچه، اویغون‌سیزلیک باعث دولتی کوچلر شهردن آرتده چیکیلگن.
عین حالده، منبع‌لردن قطاری نینگ سلام‌وطندارگه ایتیشیچه، دولتی کوچلر و طالبان گروهی آره‌سیده یوزبیرگن آتیشمه‌لرده، امنیتی کوچلردن ۱۰ ته‌سی هلاک و کمیده ۲۰ تینچ‌اهالی ایسه یره‌لنگن.
دولتی کوچلر اوتگن کیچه ۱۰۰ دن آرتیق تانک بیلن اوچینچی لوا نی ترک قیلیب و اوزلری نی خنجان تومنی گه ییتیشتیردی.
طالبان دوشی تومنی نینگ نظارت گه آلیش بیلن، کیله‌گی قماقخانه‌سیده حبس بولگن ۳۰۰ دن آرتیق محبوس نی قوییب یوبارگن.
مذکور گروه بغلان محلی رسانه‌لریگه بیر مکتوب یوباریش بیلن ادعا قیلگن که شهرنینگ برچه بولیم‌لریده امنیتی چک پاینت ایجاد قیلیب و اهالی گه قورقمه‌ی ایش و کارلریگه دوام بیریش‌لریدن ایشانچ بیرگن.
عین حالده، طالبان سوزلاوچی‌لریدن بیری ذبیح‌الله مجاهد پلخمری شهریده اوی مه اوی تیکشیروولرنی رد قیلیب و آواره بولگن کیشی‌لردن اوز اوی‌لریگه قیتیش‌لرینی سوره‌گن.
پلخمری شهری نینگ سقوط قیلگنی توغریسیده بغلان محلی و امنیتی مسئوللری نینگ فکرینی آلیش ایسته‌دیک، بیراق موفق بولمه‌دیک.