افغانستان سرمایه یاتقیزووچیلری نینگ تجارتی شرکت‌لر بیرلشمه‌سی مسئوللری، اوتگن کون کابل ده ناراض‌لیک بیر نمایش یولگه قوییب، اسلام امیر‌لیگی بویروغی اساسیده طلب‌لریدن ۱۰ فایزی توللنیش پروسه نینگ تیزلنتیریلیشی نی ایسته‌گنلر. اوشبو بیرلشمه مسئوللری، اوتگن یک‌شنبه کونی، ۲-میزان مذکور ناراض‌لیک نمایش‌ده ایتیشلریچه، ایکی ییل‌دن بویان دولت و خصوصی بانک‌لرده قریب ۶۰۰۰ سوداگر نینگ ۶۰ میلیارد افغانی سرمایه‌سی موزلنگنی، اوشبو شرکت‌لر نینگ ۹۰ فایز تنزل گه یوز توتیشی گه سبب بولگن.
مذکور ناراض‌لیک نمایش‌ده افغانستان سرمایه یاتقیزووچیلری نینگ تجارتی شرکت‌لر بیرلشمه‌سی عمومی باشلیغی بازمحمد غیرت نینگ ایتیشیچه، مملکت باش وزیرلیگی اقتصادی اورین باسرلیگی نینگ قراری و اسلام امیر‌لیگی رهبری نینگ بویروغی اساسیده، جاری ییل‌ده دولت و بانک‌لر گه سوداگرلر نینگ طلب‌لریدن، ۱۰۰ فایزی‌دن ۱۰ فایزی نینگ خصوصی شرکت‌لر گه بیریلیشی خصوصیده قرار آلینگن ایدی؛ بیراق اوشبو پروسه نینگ سیکین‌لیگی سرمایه‌لر موزله‌تیلیشی و شرکت‌لر نینگ قوللشی گه سبب بولگن.
اونینگ کوپهیتیریشیچه: «بو ییل بیزلر گه بیریلیشی کیره‌ک بولگن پول نینگ ۱۰ فایزی، حاضرگچه توللنمه‌گن. سرمایه‌میز نینگ بیرگنلری پیتده، قوللریمیز بیلن مملکت نی توزته‌میز. باشقه بیر تامان‌دن انسان قاچاقی و سرمایه قاچاقی آلدی آلینیب و خصوصی سکتور رشد قیله‌دی. خصوصی بانک‌لر سرمایه‌لریمیز بیلن خارج‌ده سرمایه یاتقیزه‌دی، خصوصی بانک‌لر نینگ افغانستان گه جلب قیلیش‌لرینگیز کیره‌ک.»
بیزلرنینگ «ایکس» ترماغی ده هم تعقیب قیلینگ!
افغانستان سرمایه یاتقیزووچیلری نینگ تجارتی شرکت‌لر بیرلشمه‌سی عمومی باشلیغی نینگ کوپهیتیریشیچه، حاضر ایسه تخمینی شکلده شرکت‌لر نینگ ۱۰ میلیارد افغانی تضمین‌لری، خصوصی بانک‌لرده موزلنیب قالگن دیر.
شونینگدیک افغانستان سرمایه یاتقیزووچیلری نینگ تجارتی شرکت‌لر بیرلشمه‌سی باشلیغی نورالله مبارز نینگ ایتیشیچه، دولت و خصوصی بانک‌لرده شرکت‌لر و سوداگرلر نینگ اون‌لب میلیارد افغانی سرمایه‌سی موزلنگنی، مملکت اقتصادی ترقیاتی گه توسیق بوله‌دی.
اونینگ کوپهیتیریشیچه: «شرکت‌لر و ایش‌خانه‌لردن کوپینچه‌سی توخته‌ش وضعیتی قرار تاپیب و بیر قطاری ایسه یریم شکلده توخته‌گن. ۶۰ میلیارد افغانی‌میز دولت‌ده قالگن، ایشانچ فضاسی یره‌تیلیب و بیزلر هم ایشانچ بیلن سرمایه یاتقیزیشی‌میز و مملکت‌دن تشقی گه کیتگن سرمایه یاتقیزوولری‌میز گه هم ایشانچ فضاسی ایجاد بولیشی اوچون، پول‌لریمیز نینگ آزاد بولیشی کیره‌ک.»
شونده‌ی بیرحالده، سرمایه یاتقیزووچیلردن قطاری نینگ ایتیشلریچه، اوتگن ایکی ییل‌ده دولت و خصوصی بانک‌لرده سرمایه‌لری نینگ موزلنیب قالگنی، فعالیت‌لری توخته‌یشی، ایش‌خانه‌لر وسیله‌لری نینگ ایسکیریشی و سرمایه‌لری نینگ اورته‌دن کیتیشی گه سبب بولگن. اولر دولت‌دن طلب‌لریدن کمیده ۱۰ فایزی توللنیش پروسه‌سی نینگ تیزلنیشی نی ایسته‌یدیلر.
ساختمانی و سرک‌سازلیک شرکت‌لر بیرلشمه‌سی باشلیغی و سوداگری محمد‌ناصر محتسب‌زاده و سرمایه یاتقیزووچی عبدالله فیضی نینگ ایتیشلریچه، پوللری نینگ موزلنگنی سبب، اقتصاد و ملی سرمایه هم فلج بولگن.
محمد‌ناصر محتسب‌زاده نینگ ایتیشیچه: «ایشله‌گن شرکت‌لر نینگ طلبی پول مقداری، ایکی ییل و نیچه آی‌دن بیری توللنمه‌گن. مثلاً بیر پروژه‌ده ۷۰ میلیون افغانی‌میز بند دیر، اوشبو سکتور نینگ میلیارد‌لرچه افغانی‌سی خصوصی بانک‌لرده موزلنیب و قوللنمه‌گن شکلده قالگن و شرکت‌لر نینگ میلیون‌لب دالر وسیله‌لری قوللنمه‌ی و نامناسب هوا‌ده قالیب و خراب بولماقده دیر.»
بیزلرنینگ فیسبوک صحیفه‌میزگه باش اورینگ!
شونینگدیک عبدالله فیضی نینگ ایتیشیچه: «پوللر نینگ توللنمه‌گنی صورت‌ده، اقتصاد چرخشی فلج بولماقده، سوداگر نینگ فکری مالکیتی اورته‌دن کیته‌دی و قولیمیز‌ده‌گی نرسه‌لر خراب بولماقده. ایش‌سیزلیک کوپه‌یماقده دیر.»
عین حالده، مالیه وزیرلیگی سوزلاوچیسی احمد‌ولی حقمل نینگ سلام‌وطندار گه ایتیشیچه، شرکت‌لر و سرمایه یاتقیزووچلر نینگ طلب‌لری توللنیشی، تأمین‌لری و تضمین‌لری خصوصیده، ایش نینگ دوامی بار و تیزلیککه اوشبو پروسه نینگ باشله‌نیشی ممکن.
اونینگ کوپهیتیریشیچه: «شرکت‌لر نینگ طلب‌لری، تضمین‌لری و تأمین‌لری تیکشیریلیشی اوچون، کابینه قراری اساسیده، مالیه وزیرلیگی گه هدایت بیریلگن که بو موضوع برچه وزیرلیک‌لرده تثبیت و مالیه وزیرلیگی بیلن شریک قیلینسین. حاضرگچه ۱۲۱ اداره لیست‌لری نی تثبیت و مالیه وزیرلیگی بیلن شریک قیلیب و تایید بولگن و کیله‌‌سی کون‌لرده اقتصادی کمیسیون گه یوباریله‌دی و کیینگی اجراأت اوچون کابینه گه شریک بولیب و اولر نینگ قراری اساسیده، طلب‌لر، تضمین‌‌لر و تأمین‌لری توللنه‌دی.»
بو توغریده افغانستان مرکزی بانکی مسئوللری نینگ فکری نی آلیش ایسته‌دیک؛ بیراق موفق بولمه‌دیک.