اوتگن کون شام چاغی بغلان ولایتی مرکزی بغلان تومنی نینگ پولیس قومندانلیگی بناسی، بمب جایلشتریلگن موتر نینگ هجومی گه دوچ کیلدی.
مرکزی بغلان تومنی نینگ محلی و امنیتی منبعلری سلام‌وطندار بیلن صحبت اوتکزیب ایتیش‌لریچه، بو تومن پولیس قومندانلیگی ده بمب جایلشتریلگن موتر پارتله‌شی ده امنیتی کوچلردن ۴ ته‌سی و بیر تینچ‌اهالی هلاک و بو تومن پولیس قومندانی شامل ۱۴ حربی ۳۰ دن آرتیق تینچ‌اهالی بیلن تن جراحتی کوتارگن.
بغلان پولیس قومندانلیگی سوزلاوچیسی احمدجاوید بشارت نینگ ایتیشیچه، بو حادثه‌ده ۳ حربی و بیر تینچ‌اهالی هلاک و ۸ حربی ۲۰ تینچ‌اهالی بیلن تن جراحتی کوتارگن.
عین حالده، مرکزی بغلان تومن دکاندارلری نینگ نماینده‌سی خیرمحمد نینگ سلام‌وطندارگه ایتیشیچه، بو پارتلش ده کمیده ۱۰۰ دکان و اونلرچه یشش اوی تخریب و اولرگه آغیر مالی ضرر ییتیشگن.
باشقه بیر تاماندن، بغلان ده حربی کوچلرنینگ اوچینچی لوا قومندانی فرید سیدخیلی نینگ ایتیشیچه، طالبان بمب جایلشتریلگن موتر نی پارتلتگندن کیین، بو تومن مرکزی اوستیگه هجوم گه باشله‌گن که طالبان جنگریلریدن ۱۰ دن آرتیغی هلاک و یره‌لنیشی بیلن بو هجوم آرقه گه اوریلگن.
شونده‌ی بیرحالده، بغلان محلی منبعلری نینگ سلام‌وطندارگه ایتیش‌لریچه، بوگون ایرته دن حاضرگه قدر، اونلرچه هاوان طالبان تامانیدن پلخمری شهری اوستیگه آتیلگن که نتیجه‌ده، بیر تینچ‌اهالی هلاک و باشقه ۱۰ تینچ‌اهالی ایسه یره‌لنگن.
طالبان بمب جایلشتیریلگن موتر پارتلشی مسئولیتی نی بویینیگه آلیب و مذکور هجوم ده ۴۰ دن آرتیق حربی نینگ هلاک و یره‌لنگنی نی ادعا قیلیشگن؛ بیراق بو ادعا امنیتی کوچلر تامانیدن رد بولگن.