اوروش شدت‌لنگنی و تومنلر کیین‌مه‌کیین طالبان قولیگه سقوط قیلگنیدن کیین، طالبان نظارت‌لریده‌گی منطقه‌لرده بو گروه تامانیدن عیاللر و قیزلر اوچون قانون یره‌تیلگنیدن قطار گزارشلر نشر ایتیلگن.
مذکور خبرلر نشر ایتیلگنیدن کیین، نماینده‌لر کینگشی بوگون بو موضوع حقیده عکس‌العمل کورستگن. نماینده‌لر کینگش اعضاسی عبدالستار حسینی نینگ ایتیشیچه، طالبان نظارت‌لریده‌گی منطقه‌لرده یاش قیزلرنینگ زوردن نکاح قیله‌دی.
جناب حسینی گه کوره، طالبان بیر اعلامیه آرقه‌لی ایتیشیچه، ۱۵ دن یوقاری بولگن قیزلر و ۴۵ یاش دن قویی بولگن عیاللرنینگ، طالبان جنگریلری بیلن تورموش قوریش اوچون بو گروه نینگ فرهنگی کمیسیونی گه معرفی قیلیشی نی ایتگن.
بیزلرنینگ فیسبوک صحیفه‌میزگه باش اورینگ!
نماینده‌لر کینگشی نینگ اوشبو اعضاسی اهالی و برچه سوداگرلردن، امنیتی کوچلردن حمایت قیلیب و طالبان گروهی گه قرشی قیام قیلیش‌لرینی سوره‌گن.
نماینده‌لر کینگشی نینگ باشقه بیر اعضاسی حلیمه صدف کریمی نینگ ایتیشیچه، مملکت شمالیده اهالی نینگ حیات وضعیتی کوپ خواطرلی دیر و طالبان بو منطقه‌لرده قیین قانونلر وضع قیلگن.
خانم کریمی نینگ ایتیشیچه، طالبان بو منطقه‌لرده عیاللرنینگ قیین شرایط گه قرار بیرگن و نماینده‌لر کینگشی بو توغریده جیم تورمه‌یشی کیره‌ک. نمانیده‌لر کینگشی نینگ اوشبو اعضاسیگه کوره، طالبان بیر اعلامیه آرقه‌لی شمال منطقه‌لریده هر بیر عایله ۱۲ یاشدن یوقاری بولگن بیر قیزی نینگ بو گروه جنگریلری نینگ نکاح‌سیگه کیلتیریشی نی سوره‌گن.
خانم کریمی گه کوره، عیاللر برابریده بونده‌ی قانونلر وضع قیلینیشی توغری تجاوز دیب حساب‌لنه‌دی.
«ملت اویی نینگ جیم توریشی، اهالی نینگ جیم‌لیگی نی کورسته‌دی. بیر قوه افغانستان اهالیسی و عیاللر برابریده صورت تاپه‌دیگن ظلم گه قرشی جیم تورگن. سیزلر طالبان نظارتیدگی منطقه‌لرده عیاللر و قیزلر اوچون یرهتیلگن قانون‌لردن بلکه خبرلریز بار.»
باشقه بیر تاماندن عامه علاقه‌لر و استراتیژیک ایشلری بوییچه جمهوررئیس مصلحتچیسی وحید عمر کابل ده خبری بیر ییغینده ایتیشیچه، طالبان مینگ‌لرچه ییل آلدین نینگ ذهنیتی بیلن اوروش گه کیرگن. جناب عمر گه کوره، طالبان مکتبلر و آستقورمه‌لرنینگ تخریب قیلیش و اهالی گه چیکلاو یره‌تیش بیلن اوروش و انسان حقلری قانون‌لری نینگ نقض قیلیشه‌دی.
عین حالده، طالبان گروهی سوزولاوچیسی ذبیح‌الله مجاهد توییتر صحیفه‌سیده یازیشیچه، اجتماعی ترماقلرده نشر ایتیلگن طالبان گه منسوب اعلامیه‌لرنینگ واقعیتی یوق. او بو اعلامیه‌لرنی شایعه دیگن.
جناب مجاهد نینگ ایتیشیچه، اولر کیره‌کلی موردلرنی ۲۰ ییل جریانیده نشر قیلگن رسمی یوللردن نشر قیلیش‌لری ممکن.