سلام‌وطندار نینگ مملکت بویلب ۵۵ ته تلویزیون، رادیو، چاپی و خبری آژانس بیلن اوتکزگن صحبتی اساسیده، سرپرست حکومت حاکمیتیدن کیین اوشبو میدیالر نینگ ۷۸ فایزی ده عیالر نینگ حضوری ۶۶ فایز گه کمه‌یگن.
اوشبو معلومات‌لر گه بناً، مملکت ده جمهوریت توزومی قوله‌شیدن آلدین، اولکه بویلب ۵۵ ته تورلی میدیالرده ۸۳۱ عیال ایشلر ایدی؛ بیراق سرپرست حکومت حاکمیتیدن کیین بو رقم ۲۸۸ عیال گه کمه‌یگن.
میدیالریده عیاللر حضوری کمه‌یگن ییتکیرمه مسئوللری نینگ ایتیشلریچه، سرپرست حکومت تامانیدن خاتین قیزلر و میدیالر گه یره‌تیلگن چیکلاولر باعث، اداره‌لریده عیاللر حضوری سیزیلرلی درجه ده کمه‌یگن.
کابل ده چنار رادیوسی مسئولی عصمت‌الله حلیم نینگ سلام‌وطندار گه ایتیشیچه: «جمهوریت حاکمیتیده بو ییرده قریب ۱۰ عیال ایشلر ایدی، بیراق حاضر ۵ یا که ۶ عیال ایشلاوچیمیز بار و امارت حاکمیتیدن کیین عیاللر و میدیالر گه یره‌تیلگن چیکلاولر باعث ییتکیرمه‌لرده عیاللر حضوری کمه‌یگن.»
شونینگدیک، کابل ده واک رادیوسی مسئولی امان‌الله نصرت گه کوره: «حاضرگی شرایط ده میدیالر ده عیاللر حضوری کمه‌یگن، بونگه قوشیمچه کوپ سانده ولایت‌لرده میدیالر نینگ عیال ایشلاوچیسی یوق، اوتمیش ده میدیالرده ۵۰ فایز عیاللر ایشلر ایدی و حاضرگی کونده بو رقم ۲۰ فایز گه کمه‌یگن.»
سلام‌وطندار نینگ ۵۵ ته میدیا بیلن اوتکزگن صحبتی اساسیده، مملکت ده، اوشبو میدیالر نینگ ۱۲ فایزی ده عیاللر حضوری اوزگرمه‌گن.
بیزلرنینگ فیسبوک صحیفه‌میزگه باش اورینگ!
مذکور میدیالر مسئوللری نینگ ایتیشلریچه، کوپ سعی‌وحرکت بیلن میدیالریده عیاللر نینگ حضورینی سقلب قالیشگن، بیراق اولر گه ییتگن معلومات‌لر گه بناً، باشقه میدیالرده عیاللر حضوری سیزیلرلی درجه ده کمه‌یگن.
طلوع تلویزیونی باشلیغی ذبیح‌الله سادات نینگ سلام‌وطندار گه ایتیشیچه: «سرپرست حکومت حاکمیتیدن کیین یره‌تیلگن چیکلاولر باعث میدیالرده عیاللر حضوری کمه‌یدی. شو بیلن هم بیز طلوع‌نیوز ده ۲۰ دن آرتیق عیال ایشلاوچیمیز بار تورلی بولیم‌لر جمله دن خبر، سیاسی دستورلر نطاقی، آنلاین و کمره ده ایشله‌یدیلر.»
آرمان رادیوسی مسئولی عبدالحق منصور گه کوره: «میدیالرده عیاللر حضوری سابق کبی ایمس، حاضرگی شرایط گه نسبتن عیاللر نینگ حضوری کمه‌یگن، حاضر موبی گروپ ده عیاللر حضوری یخشی، آرمان رادیوسی ده جمهوریت توزومی کبی دیر سابق بیش-آلتی کیشی ایشلر ایدی حاضر هم بیش یا که آلتی کیشی ایشله‌یدی.»
شونینگدیک، سلام‌وطندار نینگ ۵۵ ته میدیا بیلن اوتکزگن صحبتی اساسیده، اوشبو میدیالر نینگ ۱۰ فایزی ده عیاللر حضوری کوپه‌یگن.
مذکور ییتکیرمه‌لر، میدیالریده عیاللر حضوری کوپه‌یش سببینی، عیاللر گه ایش زمینه‌سینی یره‌تیش اوچون میدیالر مسئوللری نینگ سعی‌وحرکتی عنوان قیله‌دیلر.
عین‌حالده، آزاد ژورنالیست‌لر اویوشمه‌سی و خبرچیلر مصوونیت کمیته‌سی تامانیدن سلام‌وطندار گه بیریلگن معلومات اساسیده، میدیالر ده عیاللر نینگ حضوری ۸۱ فایز و ۷۰ فایز گه کمه‌یگن.
افغانستان ژورنالیست‌لر اویوشمه‌سی نینگ معلوماتی گه بناً، جمهوریت توزومی ده میدیالر ده عیاللر سانی ایکی مینگ ۷۵۰ ته ایدی؛ بیراق حاضر اولکه بویلب میدیالر ده عیال ایشلاوچیلر سانی ۵۴۵ ته گه کمه‌یگن.
خبرچیلر مصوونیت کمیته‌سی نینگ معلوماتی اساسیده، جمهوریت توزومی سونگی کون‌لریده میدیالرده عیاللر حضوری بیرمینگ ۵۰۰ ته اوشبو نهاد گه ثبت ایدی، لیکن حاضر بو رقم ۴۵۰ ته گه کمه‌یگن.
برچه‌سی بیلن، سرپرست حکومت حاکمیتیدن کیین میدیالرده ایشلرینی قولدن بیرگن قطار عیاللر نینگ ایتیشلریچه، میدیالر نینگ مسئوللری دلیل‌سیز اولر نی ایشلریدن بوشه‌تگن و حاضر اقتصادی و روحی قیینچیلیک بیلن روپه‌ره بولگنلر.
رادیولردن بیری نینگ ایشلاوچیسی ثریا یوسفی گه کوره: «دلیل‌سیز بیزنی ایش دن بوشه‌تدیلر. منطقی و کتابی بیر دلیل ایتمه‌دیلر، یالغیز بوندن کیین سیزلر ایشله‌ی آلمه‌ی‌سیز امارت سیزلرنی ایستمه‌یدی دییشدی. ایش‌سیز بولیش دن کیین روحی قیینچیلیک بیلن دوچ بولیب و اقتصادی قیین احوال ده قالگن‌من.»
بیزلرنینگ توییترده هم تعقیب قیلینگ!
یک تلویزیونی ایشلاوچیسی شمایل موسوی نینگ ایتیشیچه: «سابق میدیالرده ایشلر ایدیک لیکن حاضر اوی ده بیکار میز، رسمی هیچ وظیفه‌میز یوق، مملکت ده‌گی اوزگریش‌لر میدیالر اوستیده سلبی تاثیر قیلدی، مین ایشله‌یدیگن میدیا اقتصادی قیینچیلیک باعث ایشلاوچیلری نینگ آی‌لیکلرینی توللـه‌ی آلمه‌دی.»
بیراق سرپرست حکومت معلومات و مدنیت وزیرلیگی مسئوللری، میدیالرده عیاللر حضوری کمه‌یشینی رد قیلیب ایتیشلریچه، میدیالرده عیاللر نینگ حضوری سابق کبی دیر.
باشقه تاماندن، مذکور وزیرلیک سلام‌وطندار نینگ مملکت ده فعال میدیالر و ایشلاوچیلری سانی حقیده معلومات بیریش اوچون سوالی گه جواب ایتیشیچه، اولر نینگ بو حقده معلومات‌لری یوق؛ عین‌حالده اوشبو وزیرلیک نینگ رخصت‌سیزلیگی بیلن هیچ بیر میدیا اولکه ده فعالیت قیله آلمه‌یدی.
معلومات و مدنیت وزیرلیگی نینگ نشراتی باشلیغی عبدالواحد ریان گه کوره: «میدیالر ده عیاللر نینگ حضوری سابق کبی دیر، اولکه ده فعالیت آلیب باره‌یاتگن میدیالر عیال ایشلاوچیلری سانینی کمه‌یتیرگن یوق.»
ایتیش کیره‌ک که، سرپرست حکومت حاکمیتیدن کیین قطار خصوصی سکتوردن باشقه ییرلرده، کوپ سانده عیاللر ایش دن بوشه‌تیلیب، آلتینچی صنف دن یوقاری قیزلر مکتب و بیلیم یورت گه باریش دن محروم بولگنلر.
