تیموری‌لر دوریده‌گی بی‌نظیر شاعر، دانشمند، سیاست اربابی امیر علیشیر نوایی توغیلگنی نینگ ۵۸۲_ ییل‌لیگی و یازووچی، شاعر و سرکرده ظهیرالدین محمدبابر توغیلگنی نینگ ۵۴۰_ ییل‌لیگیدن کابل ده نشانلندی.
کابل ده اوزگریش اجتماعی و فرهنگی اویوشمه‌سی تامانیدن یولگه قوییلگن احتفال ده، افغانستان اوچون اوزبیکستان ایلچیسی یادگار خواجه شادمانوف، اسلام امیرلیگی اقتصاد وزیرلیگی نینگ معینی عالم جمیل، بیرقطار یازووچیلر، تیل‌شناس‌لر، شاعرلر، فرهنگی‌لر و مدنی جماعه‌‌چیلیک فعاللری اشتراک ایتگن ایدیلر.
بیزلرنینگ فیسبوک صحیفه‌میزگه باش اورینگ!
تدبیر ده سوزگه چیققن‌لر شرق نینگ ایکی پارلاق یولدوزی و بویوک اجدادلریمیز امیر علیشیرنوایی و ظهیرالدین محمدبابر قالدیرگن ادبی_علمی میراثی نینگ قدر_قیمتی حقیده فکر_ملاحظه بیلدیردیلر.
اوشبو احتفال ده اشتراک ایتگنلردن اوزبیکستان ایلچیسی یادگار خواجه شادمانوف، بو ایکی پارلاق یولدوز نینگ اثرلری حقیده گپیریب و اولر نینگ اثرلرینی دقت بیلن اوقیب اورگه‌نیش هر بیر تورک_اوزبیک فرزندی نینگ اساسی بورچی سنه‌له‌دی دیب ایتدی.
شونینگدیک مذکور احتفال ده اوزبیک خلقی نینگ ییریک و تانیقلی یازووچی و شاعری محمدعالم لبیب، نوایی و بابر نینگ ادبی_میراثی و فعالیتی حقیده معلومات کیریتدی.
شوکبی، علیشیرنوایی و ظهیرالدین محمد بابر نینگ توغیلگن ییل‌لیگیدن نشانلش مقصدیده یولگه قوییلگن مراسمده نطق سوزله‌گن مدنی فعال صبغت سیزر، تدبیر کیم تامانیدن یولگه قویلگنی و دولت رسمی‌لری تامانیدن نشانلنمسلیگیدن تنقید ایتدی.
عین‌حالده، بیلیم یورت اوقیتووچیلریدن گوهرشاد یلدرم، بیر اوزبیک اوله‌راق بو تیل رواجله‌نیشی اوچون بو کبی احتفال‌لر یولگه قوییلیشینی ایسته‌یدی.
بیزلرنینگ توییترده هم تعقیب قیلینگ!
شونینگدیک، بیلیم یورت اوقیتووچیلریدن باشقه بیری محمدعالم ایرکین، علیشیر نوایی و ظهیرالدین محمد بابر نینگ ادبی و علمی میراث‌لریدن قدرلش اوچون، بو کبی احتفال‌لر علمی و تعلیمی مرکزلرده یولگه قوییلیشینی طلب قیلدی.
امیرعلی‌شیرنوایی و ظهیرالدین محمدبابر صادق، عدالت پرور شخصیت بولگن، هر بیر انسان اینیقسه یاش‌لر اولر نینگ بی‌بها اثرلرینی اوقیب، وطن پرورلیک تویغولری و شوکبی معنویات‌لرینی یوکسلتیریشی کیره‌ک دیدی محمد عالم ایرکین.
ایتیش کیره‌ک که، جمهوریت توزومی ده بو ایکی پارلاق یولدوز نینگ توغیلگن ییل‌لیگیدن دولت رسمی‌لری تامانیدن شانلی روشده نشانلنر ایدی، لیکن افغانستان بویلب اسلام امیرلیگی حاکمیتیدن کیین یالغیز اهالی و نهادلر تامانیدن کابل شامل ولایت‌لرده نشانلنماقده.