قندوز محلی مسوول‌لری و ولایتی کینگش اعضالری نینگ ایتیشلریچه، اوشبو ولایت نینگ امام‌صاحب تومنی طالبان قولیگه سقوط قیلگنیدن سونگ، طالبان جنگریلری شیرخان بندر اوستیگه هجوم قیلیب بوگون “سه‌شنبه” ایرته‌دن چاغیده اوشبو بندرنی تصرف قیلگن.
قندوز ولایتی کینگش عضوی امرالدین ولی نینگ سلام‌وطندارگه ایتیشیچه، شیرخان بندرگه جایلشگن امنیتی کوچلر اوشبو بندر طالبان تامانیدن تصرف ایتیلگنیدن سونگ، چیگره او تامانیده جایلشگن‌لر و اولردن بیرقطاری طالبان قولیگه اسیر بولگنلر.
قندوز ولایتی کینگش اوشبو عضوی نینگ ایتیشیچه، مذکور بندر ده بولگن بوتون امنیتی پوسته‌لر طالبان قولیگه توشگن و سوداگرلرنینگ اموال‌لریدن هیچ‌قنده‌ی خبر یوق.
عین‌حالده، قندوز ولایتی بوییچه صناعت و سوداگرلیک اتاقی سوزلاوچیسی مسعود وحدت نینگ سلام‌وطندارگه ایتیشیچه، شیرخان بندر قتناو یول‌لری بیر هفته دن بویان امنیتی تهدیدلر آستیگه قرار تاپگن ایدی و بوگون “سه‌شنبه” ایرته‌دن چاغیده طالبان قولیگه سقوط قیلگن. اونینگ ایتیشیچه، کمیده ۱۵۰ یوک تاشیووچی موتر سوداگرلیک توارلر بیلن اوشبو بندر گمرکی‌ده ایدی و اولرنینگ سرنوشتی بیللی ایمس.
قندوز ولایتی بوییچه صناعت و سوداگرلیک اتاقی سوزلاوچیسی نینگ کوپه‌یتیریشیچه، سوداگرلرنی اموال‌لری و نقلیه واسطه‌لر نابود بولگن صورتده، سوداگرلرگه کوپینچه زیان ییتیشه‌دی.
شونینگدیک، قندوز یشاوچی‌لری نینگ امنیتی وضعیت یمان بولگنیدن خواطر بیلدیریب ایتیشلریچه، اوچ کوندن بویان قندوز شهری نینگ سوو و برقی کیسیلگن و اهالی یمان وضعیتده حیات کیچیره‌دیلر.
شیرخان بندری نینگ سقوط قیلگنی و امنیتی کوچلرنی چیگره او تامانیگه جایلشگنی خصوصیده قندوز امنیتی مسوول‌لری فکرینی آلیش اوچون سعی و حرکت قیلدیک، لیکن موفق بولمه‌دیک.
ایتیلیشیچه، قندوز ولایتی نینگ دشت‌ارچی، امام‌صاحب، خان‌آباد، چهاردره، گل‌تپه و علی‌آباد تومن‌لری ایکی کون آلدین طالبان قولیگه سقوط قیلگن ایدی، بیراق بوگون سه‌شنبه توش چاغیده علی‌آباد تومنی قیته دن امنیتی کوچلر نظارتی‌گه اوتگن.
گزارش‌لرگه کوره، امنیتی خاص کوچلردن یوزلرچه‌سی قول اردو قومندانلیگی نینگ ارکان رییسی محمدعلی یزدانی رهبرلیگی گه قندوز شهری‌گه باریب طالبان‌گه قرشی حربی عملیات‌نی باشله‌گنلر.
