کابل بیلیم یورتی اوستیده‌گی هجوم حقیده ترقه‌تیلگن ینگی معلومات اساسیده، هجومچیلر ۱۰ کون آلدین بیلیم یورت نی تیکشیریب و بو نتیجه‌ده ییتیشگن ایکنلر کیم، زمانوی (شیک) کییم بیلن کیره‌دیگن کیشیلر کمراق شبهه گه دوچ کیلیشه‌دی و شو یوزه‌دن رسمی و شیک کییم بیلن بیلیم یورت گه کیرگنلر.
جمهورلیک ریاست بیرینچی اورین باسری امرالله صالح نینگ فیسبوک صحیفه‌سیده یازیشیچه، کابل بیلیم یورتی اوستیگه اویوشتیریلگن هجوم نی ریجه‌لنتیرگن عادل ناملی کیشی، ایکی کون آلدین قولگه آلیندی.
قولگه آلینگن کیشی نینگ اعترافی اساسیده، هجومیچلر طلبه‌لرنینگ کییمی گه اوخشه‌گن کییم قوللنگنی باعث، بیلیم یورت گه کیریش پیتده توغری تیکشیریلمه‌گن.
اعترافلر اساسیده، بیرینچی هجومچی تیکشیریلگن صورتده، کیینگی هجومچی پولیس نینگ اوققه توتیب اولدیریش گه قرار قیلینگن ایکن.
شونینگدیک جناب صالح کابل بیلیم یورتی اوستیگه اویوشتیریلگن هجوم نی ریجه‌لنتیرگن گروه نینگ ایکینچی اعضاسی احمد نینگ هلاک ایتیلگنی و بو گروه نینگ اوچینچی اعضاسی نینگ قولگه آلینگنیدن خبر بیرگن.
جاری نوامبر آیی نینگ ایکینچی کونیده اوچ هجومچی کابل بیلیم‌یورتی اوستیگه هجوم قیلدی. مذکور هجوم ده کمیده ۲۲ کیشی هلاک و باشقه ۴۰ کیشی یره‌لندی. اوشبو هجوم قربانی‌لریدن کوپینچه‌سی بو بیلیم‌یورت طلبه‌لری ایدی.
افغانستان حکومتی بو هجوم نی طالبان گروهی گه نسبت بیرگن بیرحالده، طالبان بو هجوم گه قوللری بارلیگی نی رد قیلگن و شونینگدیک بو هجوم مسئولیتی نی داعش گروهی بوینیگه آلگن.