هوا ساووق بولیشی بیلن بیرگه هرات ده زلزله باعث زیان کورگنلر باش پناه‌لری یوق‌لیگیدن نالیب ایتیشلریچه، ساووق هوا ده خیمه‌لر آستیده تیریکچیلیک قیلیش قیین و باش پناه‌لری یوق‌لیگی اولر نینگ قیینچیلیگینی ایکی برابر آشیرگن.
اسلام امیرلیگی رسمی‌لری نینگ ایتیشلریچه، هرات ده زلزله باعث یشش اوی‌لری بوزیلگن‌لر گه اوی قوریش طرحی اوستیده ایشلشماقده و یقینده زلزله طفیلی اوی‌لری بوزیلگن کیشی‌لر گه اوی توزه‌تیش ایشینی باشله‌یدیلر.
اسلام امیرلیگی سوزلاوچیسی نینگ اورین باسرلریدن بلال کریمی نینگ سلام‌وطندار گه ایتیشیچه: «اسلام امیرلیگی مسئوللری یشش اوی‌لرنی قنده‌ی توزه‌تیش طرحی اوستیده ایشله‌ماقده‌لر و تورلی خیل شرکت‌لر نماینده‌لری بیلن مذاکره قیلیشماقده، بو ایش تیزلیک بیلن باشلنه‌دی و قیش ییتیب کیلمسدن آلدین باش پناه‌سیز کیشی‌لر گه یشش اوی توزه‌تیب بیریله‌دی.»
بیزلرنینگ فیسبوک صحیفه‌میزگه باش اورینگ!
هرات ولایتی نایب تومنی یشاوچیسی عبدالمحمد نینگ سلام‌وطندار گه ایتیشیچه: «کوپ سانده خیمه‌لر یامغیر و بوران ده بوزیلگن و قیته تیکلش قیین دیر، قیش ده نیمه قیلیشنی بیلمه‌یمیز. بیز اوچون یشش اوی قوریب بیریلمسه قیش ده تیریک قیلیش ممکن‌سیز دیر چونکه قیش ده هوا کوپ ساووق بوله‌دی.»
هرات زنده‌جان تومنی یشاوچیسی عصمت‌الله گه کوره: «نیچه کوندن بیری بو ییرده بوران یوز بیرماقده هیچ کیم تشقری چیق‌آلمه‌یدی، بیر خیمه ده نیچه عایله تیریکچیلیک قیله‌دی، بیز گه قیش ده باش پناه قوریب بیریلمسه تیریک قالیش ممکن‌سیز دیر.»
شونینگدیک، مملکت طبیعی آفت‌لرنی باشقریش ایشلری بوییچه دولت وزیرلیگی نینگ معلوماتی اساسیده، هرات ده سونگی هفته ده یوز بیرگن زلزله عاقبتیده قریب ایکی مینگ یشش اوی بوزیلگن.
مملکت طبیعی آفت‌لرنی باشقریش ایشلری بوییچه دولت وزیرلیگی، هرات ده زلزله باعث زیان کورگنلر گه باش پناه توزه‌تیلیشی اوستیگه تاکیدلب ایتیشیشچه، اولر نینگ قیینچیلیگی حلی اوچون تلاش قیلماقده‌لر.
طبیعی آفت‌لرنی باشقریش ایشلری بوییچه دولت وزیرلیگی سوزلاوچیسی عبدالله‌جان سایق نینگ سلام‌وطندار گه ایتیشیچه: «حاضر زلزله باعث زیان کورگنلر گه ییگولیک ماده توزیع بولگن و یشش اوی‌لری بوزیلگن‌لر گه باش پناه توزه‌تیب بیریلیشی اوچون نقد پول ییغیش کمیته شکللنگن، قیش ده هوا ساووق بوله‌دی و خیمه‌لر آستیده تیریکچیلیک قیلیش ممکن‌سیز، ایچکی و تشقری ده نقد پول یاردم بیره‌دیگنلر کمیته گه تاپشیرسین.»
بیزلرنینگ «ایکس» ترماغی ده هم تعقیب قیلینگ!
افغان قیزیل آی جمعیتی گه کوره، مذکور جمغرمه هرات ولایتی زنده‌جان تومنی ده زلزله باعث زیان کورگن اوچ مینگ عایله گه یاردم کورستگن و حاضر هم اوشبو واقعه طفیلی زیان کورگنلر یاردم گه جدی نیازمندلر.
مذکور اداره سوزلاوچیسی عرفان‌الله شرف‌زوی گه کوره: «بیز زلزله باعث زیان کورگنلر گه ییگولیک ماده، طبی اوسکونه، خیمه، کمپل و سوو کبی باشقه نرسه‌لر یاردم بیردیک، بیراق اولر جدی یاردم گه نیازمندلر و اولر گه یشش اوی توزه‌تیب بیریلیشی جدی نیاز دیر، شونی اوچون تشقی نهادلر نینگ اعتبارینی قره‌تیش مقصدیده تلاش قیلماقده‌میز.»
عینی‌حالده، اسلام امیرلیگی باش وزیرلیگی نینگ اقتصادی اورین باسری عبدالغنی برادر هرات گه قیلگن سفری ده، اوشبو ولایت یشاوچیلری گه زلزله طفیلی اوی‌لری بوزیلگن کیشی‌لر گه یشش اوی توزه‌تیب بیریش وعده‌سینی بیرگن ایدی.