کابل شهری دارالامان قصری‌ده بوگون پنج‌شنبه، ۲۳-قوس، ایچکی تولیدلردن حمایت قیلیش مقصد، «خدمات برتر ملی» ایکینچی کورگزمه‌سی آچیلگن.
مذکور کورگزمه، معلومات و مدنیت وزیرلیگی، اقتصاد وزیرلیگی، سوداگرلیک و سرمایه یاتقیزیش اتاق‌لری و بیر قطار صناعت‌چیلر آرقه‌لی، ایچکی تولیدلردن حمایت قیلیش مقصد، تورت کونگچه یولگه قوییلگن.
خدمات برتر ملی کورگزمه‌سی نینگ آچیلیش مراسمی‌ده معلومات و مدنیت وزیرلیگی مالی اورین‌باسری سعد‌الدین سعید نینگ ایتیشیچه، ایچکی تولیدلردن حمایت بولینیشی، واردات میزانی نی کمه‌یتیریب و مملکت اقتصادی رواجلنیشی گه سبب بوله‌دی و انه شوو باعث، سرپرست حکومت ایچکی تولیدلردن حمایت قیلیش گه متعهد دیر.
اونینگ کوپه‌یتیریشیچه: «حکومت هردایم تدبیرکارلر و ایشخانه ایگه‌لرینی قولب-قوتله‌گن، اولرنی ایشی اوستیده‌گی سالیق‌لر آزه‌یتیریلیب یاده معاف ایتیلگن، بیز تدبیرکارلر برقی نی تامین ایتکن‌میز و شونگه اوخشش کوپلب قوله‌یلیک‌لرنی یره‌تکن‌میز.»
شونده‌ی بیرحالده، مذکور کورگزمه نینگ یولگه قوییگنلردن «تسل-مدیا گروپ» مسئولی تسل خان نینگ ایتیشیچه، بو کبی کورگزمهلر نینگ یولگه قوییلیشی، ایچکی تولیدلر نینگ تانیشتیریش، قرار‌دادلر نینگ جذب قیلیش، بازار تاپیش و ایچکی تولیدلر رواجلنیشی گه سبب بوله‌دی. تسل-میدیا گروپ مسئولی نینگ کوپه‌یتیریشیچه: «ایش زمینه‌لری، ایچکی محصوللر قولب_قوتلنگن تقدیرده کوپه‌ییشی ممکن، بیز بو کورگزمه‌نی ایچکی محصوللر گه ماس بازار تاپیش همده اولرنی رواجلنتیریش مقصد یولگه قویگن‌میز، بو ایچکی محصوللر رواجلنیشی اوچون یالغیز بیر فرصت دیر.»
خدمات برتر ملی کورگزمه‌سیده، تورلی بولیم‌لرده ۲۵۰ غرفه‌ده قول صناعتی، تیمیر، ییگولیک ماده، دارو، نقاش‌لیک و بیزه‌لتیریش نرسه‌لر نمایش گه قوییلیب و ۱۰۰ غرفه ایسه عیال‌لر گه اختصاص بیریلگن.
باشقه بیر تامان‌دن، اوشبو کورگزمه‌ده توارلری نمایش گه قوییلگن کیشی‌لردن قطاری نینگ ایتیشلریچه، بو کورگزمه نینگ اولر اوچون فایده‌لی بولیشی نی کوتیب تورگنلر.
مذکور کورگزمه گه شرکت قیلگنلردن صوفیا نینگ ایتیشیچه: «محصو‌لریمیز ساغلیق همده آرایش محصوللری دیر، یخشی یوتوق‌لرنی بو کورگزمه‌دن کوتماقده‌من، چونکه بو کورگزمه بیزنی ساتیش‌لریمیز یخشی‌لنیش و محصوللریمیزنی تانیشتیریلیشی اوچون مهم دیر.»
شونینگدیک اوشبو کورگزمه گه شرکت قیلگنلردن باشقه بیری احمد ولید نینگ ایتیشیچه: «بو کورگزمه خلق‌نی آگاه‌لنتیریش همده ایچکی محصوللر رواجلنیشی اوچون اوته مهم دیر، کورگزمه یکونی‌گچه مشتری تاپیش‌گه امید بیلدیره‌میز.»
شونده‌ی بیرحالده، اوشبو کورگزمه گه کوزه‌تیش اوچون بارگنلر نینگ ایتیشلریچه، بو کبی کورگزمهلر نینگ یولگه قوییلیشی، ایچکی تولیدلر نینگ ساتیب آلینیشی خصوصیده اهالی نینگ ترغیب قیله‌دی.
دشت‌برچی منطقه‌سیدن اوشبو کورگزمه گه بارگن زهرا نینگ ایتیشیچه: «مین کوریب چیققن غرفه‌لرگه یخشی کییم‌لر موجود ایدی، بو کوپ یخشی بیر ایش چونکه تدبیرکارلر ترغیب ایتیله‌دی و شونینگدیک اهالی ایچکی محصوللر بیلن تانیشه‌دیلر.»
ایتیش کیره‌ک که، خدمات برتر ملی کورگزمه‌سی نینگ بیرینچی دوری حمل آیی‌ده یولگه قوییلگن ایدی و اوتگن بیر ییل‌ده، کابل شهری و بیر قطار ولایت‌لرده ایچکی تولیدلر نینگ رواجلنیشی اوچون نیچه کیچیک و بویوک کورگزمهلر یولگه قوییلگن.
